LIVE TV
କଟକରେ ଭାରତ-ଦକ୍ଷିଣ ଆଫ୍ରିକା ମହାମୁକାବିଲା ପାଇଁ ସଜେଇ ହୋଇଛି ବାରବାଟୀ, ପ୍ରସ୍ତୁତ ହୋଇଛି ଓସିଏ । ଆଜି ପୋଲିସ ଡିଜି ବାରବାଟୀ ଯାଇ ଖେଳାଳିଙ୍କ ସୁରକ୍ଷା ଓ ଦର୍ଶକଙ୍କ ଶୃଙ୍ଖଳିତ ଖେଳଦେଖା ବ୍ୟବସ୍ଥା ନେଇ ସମସ୍ତ ପ୍ରସ୍ତୁତିର ଯାଞ୍ଚ୍ କରିଛନ୍ତି । ରବିବାର ମ୍ୟାଚ ଓ ଶନିବାର ନେଟ୍ ପ୍ରାକ୍ଟିସ୍ । ଏଥିପାଇଁ ଭୁବନେଶ୍ୱର ହୋଟେଲରୁ ବାରବାଟୀ ପଡ଼ଇା ଯାଏଁ ବହୁ ସ୍ତରୀୟ ସୁରକ୍ଷା ବ୍ୟବସ୍ଥା କରିଛି । କମିଶନରେଟ୍ ପୋଲିସ କଟକରେ ୬୨ ଓ ଭୁବନେଶ୍ୱରରେ ୨୦ ପ୍ଲାଟୁନ୍ ସହ ମୋଟ ୮୨ ପ୍ଲାଟୁନ୍ ଫୋର୍ସ ମୁତୟନ ହୋଇଛନ୍ତି ।
ଭାରତ-ଦକ୍ଷିଣ ଆଫ୍ରିକା ଟି ଟ୍ୱେଣ୍ଟି ସିରିଜର ଦ୍ୱିତୀୟ ମ୍ୟାଚ୍ ଲାଗି ସମ୍ପୂର୍ଣ୍ଣ ପ୍ରସ୍ତୁତ ବାରବାଟୀ ପଡ଼ିଇା । ଖେଳାଳିଙ୍କୁ ଭବ୍ୟ ସ୍ୱାଗତ ଆଉ ଦର୍ଶକଙ୍କୁ ଭରପୁର ମନୋରଞ୍ଜନ ଦେବାକୁ ଆକର୍ଷଣୀୟ ରୂପରେ ସଜେଇ ହୋଇଛି । ଗ୍ରାଉଣ୍ଡ ଚକାଚକ୍ ପଡ଼ିଆ ସାଙ୍ଗକୁ ରଙ୍ଗାରଙ୍ଗ ଗ୍ୟାଲେରୀ ଗ୍ରୀନରୁମରୁ ଭିଆଇପି ବକ୍ସ ପର୍ଯ୍ୟନ୍ତ ସବୁଠି ଦିଆଯାଉଛି ପ୍ରସ୍ତୁତିର ଶେଷ ସ୍ପର୍ଶ । ଏପଟେ ରବିବାର ମ୍ୟାଚ୍ ଓ ଶନିବାର ନେଟ୍ ପ୍ରାକ୍ଟିସ ଲାଗି ଖେଳାଳିଙ୍କ ପାଇଁ ହୋଇଛି ବ୍ୟାପକ ସୁରକ୍ଷା ବନ୍ଦୋବସ୍ତ ।
ଆଜି ପୋଲିସ ଡିଜି, ଟୁଇନି ସିଟି ପୋଲିସ କମିଶନର ଓ ଡିସିପି ବାରବାଟୀ ଯାଇ ବହୁସ୍ତରୀୟ କଡ଼ା ସୁରକ୍ଷା ବ୍ୟବସ୍ଥାର ତନ୍ନ ତନ୍ନ ଯାଞ୍ଚ୍ କରିଛନ୍ତି । କ୍ରାଇମବ୍ରାଞ୍ଚର କେ-9 ଡଗ୍ ସ୍କ୍ବାର୍ଡ ବାରବାଟୀର କୋଣ ଅନୁକୋଣ ବୁଲିଛି । ମ୍ୟାଚ୍ ଲାଗି କେବଳ କଟକରେ ନିୟୋଜିତ ହେବେ ୬୨ ପ୍ଲାଟୁନ୍ ଫୋର୍ସ । ସେହିଭଳି ୪ ଡିସିପି, ୭ ଅତିରିକ୍ତ ଡିସିପି, ୨୮୦ ଅଫିସର ସୁରକ୍ଷା ବ୍ୟବସ୍ଥା ପରିଚାଳନା କରିବେ । ସୁରକ୍ଷା ପ୍ରୋଟୋକଲ ଭିତରେ ଏସଓଜି ଟିମ୍, କ୍ୱିକ୍ ଆକ୍ସନ ଟିମ୍ ସହ ପିଟିଜେଡ୍ କ୍ୟାମେରାକୁ ବି ସାମିଲ କରାଯାଇଛି ।
ଏପଟେ ଗତକାଲି ଅଫଲାଇନ୍ ଟିକେଟ୍ ପାଇଁ ରଣକ୍ଷେତ୍ର ପାଲଟିବା ପରେ ଆଜି ଟିକେଟ୍ କଳାବଜାରୀ ଆଶଙ୍କା ସତ ହୋଇଛି । ବିଭିନ୍ନ ଅନଲାଇନ୍ କିଣାବିକା ସାଇଟରେ ୮ରୁ ୧୦ ଗୁଣା ଅଧିକ ରେଟ୍ ଟିକେଟ୍ ବିକ୍ରିର ଅଭିଯୋଗ ସାମ୍ନାକୁ ଆସିଛି । କେଉଁଠି ୭ ଶହ ଟଙ୍କାର ଟିକେଟ୍ ୫ହଜାରରେ ତ ଆଉ କେଉଁଠି ୭ ହଜାରର ଟିକେଟ୍ ୧୫ ହଜାର ଟଙ୍କାରେ ବିକ୍ରି ହୋଇଥିବା ଦେଖିବାକୁ ମିଳିଛି । ତେବେ ଗତକାଲି ଘଟଣା ପରେ ବାରବାଟୀର ଦର୍ଶକ କ୍ଷମତା ବୃଦ୍ଧି ଉପରେ ବିଚାର କରାଯାଉଥିବା କହିଛନ୍ତି ଓସିଏ ସମ୍ପାଦକ ।
ରବିବାର ମ୍ୟାଚ୍ ଦେଖିବାକୁ ମୁଖ୍ୟମନ୍ତ୍ରୀ ନବୀନ ବାରବାଟୀ ଆସିବା ସମ୍ଭାବନା ରହିଛି ତା ସହ ବିସିସିଆଇ ସଭାପତି ସୌରଭ ଗାଙ୍ଗୁଲିଙ୍କୁ ମଧ୍ୟ ଆମନ୍ତ୍ରଣ କରାଯାଇଥିବାରୁ ସେ ବି ମାଚର ଅନ୍ୟତମ ଆକର୍ଷଣ ବନିବା ଆଶା କରାଯାଉଛି ।
