Shami Return: ଟିମ୍ ଇଣ୍ଡିଆ ପାଇଁ କେତେ ଗୁରୁତ୍ୱ ରଖେ ଶାମୀଙ୍କ ପ୍ରତ୍ୟାବର୍ତ୍ତନ

ପ୍ରାୟ ୧୪ ମାସର ବ୍ୟବଧାନ ପରେ ଭେଟେରାନ୍ ପେସର୍ ମହମ୍ମଦ ଶାମୀ ଭାରତୀୟ ଟିମ୍‌କୁ ପ୍ରତ୍ୟାବର୍ତ୍ତନ କରିଛନ୍ତି । ଜାନୁଆରୀ ୨୨ରୁ ଇଂଲଣ୍ଡ ବିପକ୍ଷରେ ହେବାକୁ ଥିବା ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ପାଇଁ ସେ ୧୫ ଜଣିଆ ଟିମ୍‌ରେ ସ୍ଥାନ ପାଇଛନ୍ତି । ତାଙ୍କ ପ୍ରତ୍ୟାବର୍ତ୍ତନ କ୍ରିକେଟ୍‌ପ୍ରେମୀଙ୍କ ମଧ୍ୟରେ ଉତ୍ସାହ ଜାତ କରିଛି ।

୩୪ବର୍ଷୀୟ ଶାମୀ ଶେଷ ଥର ୨୦୨୩ ଦିନିକିଆ ବିଶ୍ୱକପ୍ ଫାଇନାଲ୍‌ରେ ଅଷ୍ଟ୍ରେଲିଆ ବିପକ୍ଷରେ ଖେଳିଥିଲେ । ଏହି କ୍ରିକେଟ୍ ମହାସମରରେ ସେ ସର୍ବାଧିକ ୨୪ ୱିକେଟ୍ ହାସଲ କରିଥିଲେ ।

ତେବେ ପାଦର ଗଣ୍ଠିରେ ଯନ୍ତ୍ରଣା ଯୋଗୁଁ ଏହାପରେ ସେ ଆଉ ଆନ୍ତର୍ଜାତିକ କ୍ରିକେଟ୍ ଖେଳିପାରି ନ ଥିଲେ । ଗତ ବର୍ଷ ଜାନୁଆରୀରେ ସେ ସର୍ଜରୀ କରାଇଥିଲେ । ସୁସ୍ଥ ହେବା ପରେ ସେ ଘରୋଇ କ୍ରିକେଟ୍ ଖେଳି ନିଜ ଉପଯୋଗିତା ସାବ୍ୟସ୍ତ କରିଥିଲେ ।

ଟିମ୍ ଇଣ୍ଡିଆ ପାଇଁ କେତେ ଗୁରୁତ୍ୱ ରଖେ ଶାମୀଙ୍କ ପ୍ରତ୍ୟାବର୍ତ୍ତନ

ଶାମୀଙ୍କ ଆନ୍ତର୍ଜାତିକ ପ୍ରତ୍ୟାବର୍ତ୍ତନକୁ ନେଇ ଏବେ କ୍ରିକେଟ୍ ମହଲରେ ଚର୍ଚ୍ଚା ହେଉଛି । ତାଙ୍କ ପ୍ରତ୍ୟାବର୍ତ୍ତନର ଅର୍ଥ ଟିମ୍‌କୁ ଜଣେ ଅଭିଜ୍ଞ ପେସର୍ ମିଳିବେ, ଯିଏ ନିଜର ଗତି, ସ୍ୱିଙ୍ଗ୍ ଓ ୟର୍କର ଜରିଆରେ ପ୍ରତିପକ୍ଷ ଟିମ୍‌କୁ ଚାଲେଞ୍ଜ୍ କରିପାରିବେ । ହ୍ୱାଇଟ୍ ବଲ୍ କ୍ରିକେଟ୍‌ର ଚାପଗ୍ରସ୍ତ ବାତାବରଣରେ ତାଙ୍କ ଅଭିଜ୍ଞତା ଓ ବୋଲିଂ ବିବିଧତା ଟିମ୍‌ର କାମରେ ଆସିବ ।

ବର୍ଡର-ଗାଭାସ୍କର ଟ୍ରଫି ୨୦୨୪-୨୫ରେ ଅନ୍ତତଃ ଶେଷ ଦୁଇ ଟେଷ୍ଟ ପାଇଁ ତାଙ୍କୁ ଟିମ୍‌ରେ ସାମିଲ୍ କରାଯିବ ବୋଲି ଆଶା କରାଯାଉଥିଲା । କିନ୍ତୁ ସେ ଫିଟ୍ ନ ଥିଲେ । ତାଙ୍କ ଅନୁପସ୍ଥିତିରେ ଭାରତୀୟ ଟିମ୍ ୧-୩ରେ ଏହି ସିରିଜ୍ ହାରିଯାଇଥିଲା ।

ଚାମ୍ପିଅନ୍ସ ଟ୍ରଫିକୁ ଦୃଷ୍ଟିରେ ରଖି ଟିମ୍‌କୁ ଡକରା

ଶାମୀଙ୍କ ପ୍ରତ୍ୟାବର୍ତ୍ତନ କେବଳ ଟି-୨୦ ସେଟ୍‌-ଅପ୍ ପାଇଁ ଜରୁରୀ ନୁହେଁ, ଦିନିକିଆ ଆନ୍ତର୍ଜାତିକ ଓ ଟେଷ୍ଟ ଟିମ୍ ପାଇଁ ମଧ୍ୟ ତାଙ୍କର ଆବଶ୍ୟକତା ରହିଛି । ଇଂଲଣ୍ଡ ବିପକ୍ଷ ଟି-୨୦ ସିରିଜ୍‌ରେ ଦୃଢ଼ ପ୍ରଦର୍ଶନ ତାଙ୍କ ଆତ୍ମବିଶ୍ୱାସକୁ ପ୍ରତିଫଳିତ କରିବ ।

ଫେବ୍ରୁଆରୀ-ମାର୍ଚ୍ଚରେ ଦିନିକିଆ ଫର୍ମାଟ୍‌ରେ ଖେଳାଯିବାକୁ ଥିବା ଚାମ୍ପିଅନ୍ସ ଟ୍ରଫିକୁ ଦୃଷ୍ଟିରେ ରଖି ତାଙ୍କୁ ଭାରତୀୟ ଟିମ୍‌ରେ ସାମିଲ୍ କରାଯାଇଛି । ତାଙ୍କ ଫିଟ୍‌ନେସ୍ ଓ ଫର୍ମ ଟିମ୍ ପାଇଁ ଗୁରୁତ୍ୱପୂର୍ଣ୍ଣ ।

ଏହି ମେଗା ଟୁର୍ଣ୍ଣାମେଣ୍ଟ ପୂର୍ବରୁ ଇଂଲଣ୍ଡ ବିପକ୍ଷ ଟି-୨୦ ଓ ଦିନିକିଆ (ଯଦି ସ୍ଥାନ ପାଆନ୍ତି) ସିରିଜ୍ ତାଙ୍କ ପାଇଁ ୱାର୍ମଅପ୍ ଭଳି ହେବ । ଏଥିରେ ଫିଟ୍‌ନେସ୍ ସାବ୍ୟସ୍ତ କରିପାରିଲେ, ବୋଲିଂ ପ୍ରଦର୍ଶନ ଉଲ୍ଲେଖନୀୟ ନ ହେଲେ ବି ତାଙ୍କୁ ଅଭିଜ୍ଞତା ଆଧାରରେ ପ୍ରାରମ୍ଭିକ ଟିମ୍‌ରେ ରଖାଯାଇପାରେ ।

ଟିମ୍‌ର ମୁଖ୍ୟ ପେସର୍ ଯଶପ୍ରୀତ ବୁମ୍‌ରା ଏବେ ଫିଟ୍ ନାହାନ୍ତି । ସେ ଚାମ୍ପିଅନ୍ସ ଟ୍ରଫିର ଗ୍ରୁପ୍ ପର୍ଯ୍ୟାୟ ମ୍ୟାଚ୍‌ରୁ ବାଦ୍ ପଡ଼ିପାରନ୍ତି ବୋଲି ଆଲୋଚନା ହେଉଛି । ଯଦି ସେମିତି ହୁଏ, ତା’ହେଲେ ସେତେବେଳେ ଜଣେ ସିନିଅର୍ ପେସର୍ ଭାବରେ ଶାମୀଙ୍କ ଭୂମିକା ବହୁତ ବଢ଼ିଯିବ ।

ବୁମ୍‌ରା ଓ ଶାମୀ - ଉଭୟଙ୍କ ଉପସ୍ଥିତି ଟିମ୍‌ର ବୋଲିଂ ଲାଇନ୍‌-ଅପ୍‌କୁ ଯେ ମଜଭୁତ କରିବ, ଏଥିରେ ସନ୍ଦେହ ନାହିଁ । ଏହା ଚାମ୍ପିଅନ୍ସ ଟ୍ରଫିରେ ଭାରତର ମୁକୁଟ ସମ୍ଭାବନାକୁ ବି ଉଜ୍ଜ୍ୱଳ କରିବ ।

ଟିମ୍ ଇଣ୍ଡିଆ ପାଇଁ କେତେ ଗୁରୁତ୍ୱ ରଖେ ଶାମୀଙ୍କ ପ୍ରତ୍ୟାବର୍ତ୍ତନ

ଘରୋଇ କ୍ରିକେଟ୍‌ରେ ପ୍ରଭାବଶାଳୀ ପ୍ରଦର୍ଶନ

ମ୍ୟାଚ୍ ଫିଟ୍‌ନେସ୍ ପାଇଁ ଶାମୀ ଘରୋଇ କ୍ରିକେଟ୍ ଖେଳିଥିଲେ, ଯେଉଁଥିରେ ସେ ପ୍ରଭାବଶାଳୀ ପ୍ରଦର୍ଶନ କରିଥିଲେ । ଆଘାତରୁ ସୁସ୍ଥ ହେବା ପରେ ସେ ରଣଜୀ ଟ୍ରଫି ୨୦୨୪-୨୫ର ରାଉଣ୍ଡ-୧ରେ ବଙ୍ଗଳା ପକ୍ଷରୁ ମଧ୍ୟ ପ୍ରଦେଶ ବିପକ୍ଷ ମ୍ୟାଚ୍ ଜରିଆରେ କ୍ରିକେଟ୍‌କୁ ପ୍ରତ୍ୟାବର୍ତ୍ତନ କରିଥିଲେ । ଏହି ମ୍ୟାଚ୍‌ରେ ସେ ୩.୬ ଇକନମୀ ରେଟ୍‌ରେ ବୋଲିଂ କରି ୭ ୱିକେଟ୍ ନେଇଥିଲେ ।

ସୟଦ ମୁସ୍ତାକ୍ ଅଲୀ ଟ୍ରଫି (ଟି-୨୦) ୨୦୨୪ ଓ ବିଜୟ ହଜାରେ ଟ୍ରଫି (ଦିନିକିଆ) ୨୦୨୪-୨୫ରେ ମଧ୍ୟ ଏହି ପେସର୍ ଖେଳିଥିଲେ । ଏହା ଫଳରେ ଭାରତୀୟ ଟିମ୍‌ରେ ତାଙ୍କ ପ୍ରତ୍ୟାବର୍ତ୍ତନର ଆଶା ବଢ଼ିଯାଇଥିଲା । ସୟଦ ମୁସ୍ତାକ୍ ଅଲୀ ଟ୍ରଫିରେ ସେ ନଅ ମ୍ୟାଚ୍ ଖେଳି ୧୧ ୱିକେଟ୍ ନେଇଥିବା ବେଳେ ବିଜୟ ହଜାରେ ଟ୍ରଫିରେ ତିନି ମ୍ୟାଚ୍ ଖେଳି ପାଞ୍ଚ ୱିକେଟ୍ ଅକ୍ତିଆର କରିଥିଲେ ।

ଟି-୨୦ରେ ଯୁବ ପେସର୍‌ଙ୍କ ପାଇଁ ହେବେ ମାର୍ଗଦର୍ଶକ

ଭାରତୀୟ ଟିମ୍ ଡେଥ୍ ଓଭର୍‌ରେ ଅଧିକ ରନ୍ ଦେଉଥିବାର ଦେଖିବାକୁ ମିଳୁଛି । ଶାମୀ ଆସିବା ଦ୍ୱାରା ଏହି ସମସ୍ୟା ଦୂର ହୋଇପାରେ । ଚାପଗ୍ରସ୍ତ ପରିସ୍ଥିତିରେ ତାଙ୍କ ସଠିକ୍ ୟର୍କର, ଧିମା ବୋଲିଂ ଏବଂ ପ୍ରଦର୍ଶନରେ ବିବିଧତା ପ୍ରତିପକ୍ଷ ଟିମ୍‌ର ରନ୍‌ଗତିରେ ଅଙ୍କୁଶ ଲଗାଇବା ପାଇଁ ଯଥେଷ୍ଟ । ବଲ୍‌କୁ ସ୍ୱିଙ୍ଗ୍ କରାଇବାର ସାମର୍ଥ୍ୟ ପାୱାରପ୍ଲେରେ ତାଙ୍କର ପ୍ରମୁଖ ଅସ୍ତ୍ର ହୋଇଥାଏ ।

ଟିମ୍ ଇଣ୍ଡିଆ ପାଇଁ କେତେ ଗୁରୁତ୍ୱ ରଖେ ଶାମୀଙ୍କ ପ୍ରତ୍ୟାବର୍ତ୍ତନ

ଆକ୍ରମଣାତ୍ମକ ଆରମ୍ଭ ପାଇଁ ଜଣାଶୁଣା ଇଂଲଣ୍ଡ ଟିମ୍ ବିପକ୍ଷରେ ଶାମୀଙ୍କ ଉପସ୍ଥିତି ଭାରତ ପାଇଁ ସଅଳ ୱିକେଟ୍ ସୁନିଶ୍ଚିତ କରିବ ଏବଂ ପ୍ରତିପକ୍ଷ ଟିମ୍‌ର ଲୟ ବିଗିଡ଼ିବ । ଯୋଡ଼ି ଭାଙ୍ଗିବା ଓ ପ୍ରମୁଖ ବ୍ୟାଟର୍‌ଙ୍କୁ ପାଭିଲିଅନ୍ ପଠାଇବାରେ ବି ତାଙ୍କର ଭୂମିକା ରହିଆସିଛି ।

ଟି-୨୦ ଆନ୍ତର୍ଜାତିକ ଟିମ୍‌କୁ ଫେରିଥିବା ଶାମୀଙ୍କ ଉପସ୍ଥିତି କେବଳ ବୋଲିଂ ଆକ୍ରମଣକୁ ମଜଭୁତ କରିବନି, ଟିମ୍‌ର ଯୁବ ପେସର୍‌ମାନଙ୍କୁ ମଧ୍ୟ ପ୍ରେରଣା ହେବ । ଅର୍ଶଦୀପ ସିଂହ ଓ ହର୍ଷିତ ରାଣାଙ୍କ ଭଳି ପେସର୍ ଶାମୀଙ୍କ ମାର୍ଗଦର୍ଶନରୁ ଉପକୃତ ହୋଇପାରିବେ ।

ଯଶପ୍ରୀତ ବୁମ୍‌ରାଙ୍କ ଅନୁପସ୍ଥିତିରେ ସେ ବୋଲିଂ ବାହିନୀର ନେତୃତ୍ୱ ନେବା ସହ ଗୁରୁତ୍ୱପୂର୍ଣ୍ଣ ମ୍ୟାଚ୍‌ରେ ଟିମ୍‌କୁ ଜିତାଇବାରେ ସହାୟକ ହେବେ ବୋଲି ଆଶା କରାଯାଉଛି ।

ଇମେଲ୍: [email protected]

(ବି.ଦ୍ର: ଏହି ଲେଖାରେ ଥିବା ସମସ୍ତ ତଥ୍ୟ ଲେଖକଙ୍କ ନିଜସ୍ୱ ମତ)