LIVE TV
ବିଶ୍ୱ ଟେଷ୍ଟ ଚାମ୍ପିଅନ୍ସିପ୍ (ଡବ୍ଲ୍ୟୁଟିସି) ୨୦୨୩-୨୫ ଚକ୍ରର ଫାଇନାଲ୍ ମ୍ୟାଚ୍କୁ ପ୍ରାୟ ଆଠ ମାସ ବାକି ଅଛି । ଏହା ପୂର୍ବରୁ ବିଭିନ୍ନ ଟିମ୍ ଅନେକ ଟେଷ୍ଟ ମ୍ୟାଚ୍ ଖେଳିବେ । ସେଥିମଧ୍ୟରେ ଭାରତ ଆଉ ନଅ ମ୍ୟାଚ୍ ଖେଳିବ । ଏବେ ଟିମ୍ ଘରେ ବାଂଲାଦେଶ ବିପକ୍ଷରେ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଖେଳୁଛି ।
ତେବେ ଦମ୍ଦାର ଫର୍ମରେ ଥିବା ଟିମ୍ ଇଣ୍ଡିଆ କ’ଣ କ୍ରମାଗତ ତୃତୀୟ ଥର ଡବ୍ଲ୍ୟୁଟିସି ଫାଇନାଲ୍ରେ ପହଞ୍ଚିପାରିବ? ରୋହିତ ଶର୍ମାଙ୍କ ଟିମ୍ କ’ଣ ଟେଷ୍ଟରେ ଭାରତର ବିଶ୍ୱବିଜୟ ସ୍ୱପ୍ନକୁ ସାକାର କରିପାରିବ? ଏହାକୁ ନେଇ ଏବେ ଠାରୁ ଚର୍ଚ୍ଚା ଆରମ୍ଭ ହୋଇଗଲାଣି ।
Also Read
ପ୍ରଦର୍ଶନକୁ ବିଚାରକୁ ନେଲେ, ଭାରତ ଫାଇନାଲ୍ରେ ପହଞ୍ଚିବାର ସମ୍ଭାବନା ଅଧିକ । ପୂର୍ବ ଦୁଇ ଥର ଭାରତୀୟ ଟିମ୍ ଫାଇନାଲ୍କୁ ଯାଇଥିଲେ ବି ମୁକୁଟ ଜିତିପାରି ନ ଥିଲା । ପ୍ରଥମ ଥର ନ୍ୟୁଜିଲାଣ୍ଡ ଓ ଦ୍ୱିତୀୟ ଥର ଅଷ୍ଟ୍ରେଲିଆ ପ୍ରତିବନ୍ଧକ ସାଜିଥିଲା ।
ଏଥର ଫାଇନାଲ୍କୁ ଯିବା ସ୍ଥଳେ ଟିମ୍ ଠାରୁ ଟ୍ରଫି ଆଶା କରାଯିବା ସ୍ୱାଭାବିକ । ତେବେ ଦୀର୍ଘ ପ୍ରତୀକ୍ଷାର ଅନ୍ତ ଘଟାଇ ଭାରତ ଟି-୨୦ ବିଶ୍ୱକପ୍ ମୁକୁଟ ଜିତିବା ପରେ ଏହି ଆଶା ଅନେକ ଗୁଣରେ ବଢ଼ିଯିବ ।
ଡବ୍ଲ୍ୟୁଟିସି ଟେବୁଲ୍ ଶୀର୍ଷରେ ଟିମ୍ ଇଣ୍ଡିଆ:
ଡବ୍ଲ୍ୟୁଟିସି ୨୦୨୩-୨୫ ଟେବୁଲ୍ରେ ଟିମ୍ ଇଣ୍ଡିଆ ଏବେ ୭୧.୬୭ ପଏଣ୍ଟ ପ୍ରତିଶତ ସହ ଶୀର୍ଷରେ ଥିବା ବେଳେ ପୂର୍ବ ସଂସ୍କରଣ (୨୦୨୧-୨୩) ଚାମ୍ପିଅନ୍ ଅଷ୍ଟ୍ରେଲିଆ ୬୨.୫୦ ପ୍ରତିଶତ ସହ ଦ୍ୱିତୀୟ ସ୍ଥାନରେ ରହିଛି ।
ସିଂହଳୀ ଟିମ୍ ଇଂଲଣ୍ଡ ଗସ୍ତରେ ଗୋଟିଏ ଓ ଘରେ ନ୍ୟୁଜିଲାଣ୍ଡ ବିପକ୍ଷରେ ପ୍ରଥମ ମ୍ୟାଚ୍ ଜିତିବା ପରେ ଡବ୍ଲ୍ୟୁଟିସିର ଗଣିତ ବଦଳିଯାଇଛି । ଶ୍ରୀଲଙ୍କା ଏବେ ୫୦ ପ୍ରତିଶତ ସହ ଦୁଇ ସ୍ଥାନ ଉଠି ତୃତୀୟ ସ୍ଥାନକୁ ଚାଲିଆସିଛି ।
ଏହି ଚକ୍ରରେ ରୋହିତ ସେନା ଚାରି ସିରିଜ୍ରେ ୧୦ ଟେଷ୍ଟ ଖେଳି ସାତ ମ୍ୟାଚ୍ ଜିତିଥିବା ବେଳେ ଦୁଇ ମ୍ୟାଚ୍ ହାରିଛି ଏବଂ ଗୋଟିଏ ଡ୍ର’ ରହିଛି । ଟିମ୍ ମୋଟ୍ ୮୬ ପଏଣ୍ଟ ପାଇଛି । ଦକ୍ଷିଣ ଆଫ୍ରିକା ଗସ୍ତରେ ଦୁଇ ପେନାଲ୍ଟି ପଏଣ୍ଟ ମିଳିଥିଲା ଅନ୍ୟଥା ଏହା ୮୮ ପଏଣ୍ଟ ହୋଇଥା’ନ୍ତା ।
ଟିମ୍ ଇଣ୍ଡିଆ ୱେଷ୍ଟଇଣ୍ଡିଜ୍ ବିପକ୍ଷ ଟେଷ୍ଟ ସିରିଜ୍କୁ ୧-୦ରେ ଜିତିଥିବା ବେଳେ ଦକ୍ଷିଣ ଆଫ୍ରିକା ବିପକ୍ଷ ସିରିଜ୍କୁ ୧-୧ରେ ଡ୍ର’ ରଖିଥିଲା । ଦୁଇ ବିଦେଶ ଗସ୍ତ ପରେ ଇଂଲଣ୍ଡ ବିପକ୍ଷ ଘରୋଇ ସିରିଜ୍ରେ ଟିମ୍ର ପ୍ରଦର୍ଶନ ଉଲ୍ଲେଖନୀୟ ଥିଲା । ଇଂଲଣ୍ଡର ‘ବାଜ୍ବଲ୍’ ରଣକୌଶଳକୁ ବିଫଳ କରି ଆୟୋଜକ ଟିମ୍ ୪-୧ରେ ବିଜୟୀ ହୋଇଥିଲା ।
ଏବେ ଚାଲିଥିବା ବାଂଲାଦେଶ ବିପକ୍ଷ ସିରିଜ୍ର ପ୍ରଥମ ମ୍ୟାଚ୍ରେ ଭାରତୀୟ ଟିମ୍ ବଡ଼ ବ୍ୟବଧାନରେ ବିଜୟ ହାସଲ କରିଛି । ଆଗକୁ ମଧ୍ୟ ଟିମ୍ ତା’ର ଜୋର୍ଦାର ଅଭିଯାନ ଜାରି ରଖିବ ବୋଲି ଆଶା କରାଯାଉଛି ।
ଭାରତକୁ ଚାରି ବିଜୟ ଓ ଗୋଟିଏ ଡ୍ର’ ଆବଶ୍ୟକ:
ଡବ୍ଲ୍ୟୁଟିସି ଟେବୁଲ୍ରେ ସୁରକ୍ଷିତ ରହିବା ପାଇଁ ଭାରତ ତା’ର ପଏଣ୍ଟ ପ୍ରତିଶତକୁ ୬୦ରୁ ଉପରେ ରଖିବାକୁ ଚାହିଁବ, ଯାହା ଫଳରେ ଟିମ୍ ଶୀର୍ଷ ଦୁଇ ମଧ୍ୟରେ ରହିପାରିବ । ସେଥିପାଇଁ ରୋହିତ ସେନାକୁ ବର୍ତ୍ତମାନର ୮୬ ପଏଣ୍ଟରେ ଆଉ ୫୧ ପଏଣ୍ଟ ଯୋଡ଼ିବାକୁ ହେବ ।
୬୦ ପ୍ରତିଶତରୁ ଉପରେ ରହିବା ପାଇଁ ଟିମ୍ ଇଣ୍ଡିଆକୁ ପରବର୍ତ୍ତୀ ନଅ ଟେଷ୍ଟ ମଧ୍ୟରୁ ଅତି କମ୍ରେ ଚାରି ବିଜୟ ଓ ଗୋଟିଏ ଡ୍ର’ ଆବଶ୍ୟକ । ଯଦି ଟିମ୍ ପାଞ୍ଚ ମ୍ୟାଚ୍ ଜିତେ, ତା’ହେଲେ ତା’ର ପ୍ରତିଶତ ୬୪.୦୩ରେ ପହଞ୍ଚିବ ।
ଆଗକୁ ଭାରତୀୟ ଟିମ୍ ଘରେ ବାଂଲାଦେଶ ବିପକ୍ଷରେ ଗୋଟିଏ (ସିରିଜ୍ର ଶେଷ ମ୍ୟାଚ୍) ଓ ନ୍ୟୁଜିଲାଣ୍ଡ ବିପକ୍ଷରେ ତିନି ଟେଷ୍ଟ ଖେଳିବ । ଏହାପରେ ରୋହିତ ସେନା ଅଷ୍ଟ୍ରେଲିଆ ଗସ୍ତରେ ଯାଇ ବର୍ଡର-ଗାଭାସ୍କର ଟ୍ରଫି ପାଇଁ ପାଞ୍ଚ ଟେଷ୍ଟ ବିଶିଷ୍ଟ ସିରିଜ୍ ଖେଳିବ, ଯାହା ନଭେମ୍ବର ୨୨ରୁ ଆରମ୍ଭ ହେବ । କିଏ ଡବ୍ଲ୍ୟୁଟିସି ଟେବୁଲ୍ର ଶୀର୍ଷରେ ରହିବ, ତାହା ଏହି ସିରିଜ୍ରୁ ସ୍ଥିର ହୋଇପାରେ ।
ଅଷ୍ଟ୍ରେଲିଆ ସାତରୁ ଚାରି ଓ ଶ୍ରୀଲଙ୍କା ପାଞ୍ଚରୁ ଚାରି ଟେଷ୍ଟ ଜିତିବା ଜରୁରୀ:
ଅଷ୍ଟ୍ରେଲିଆ ଏ ଯାବତ ଚାରି ସିରିଜ୍ରେ ୧୨ ମ୍ୟାଚ୍ ଖେଳି ୯୦ ପଏଣ୍ଟ ପାଇଛି । ସେଥିମଧ୍ୟରୁ କଙ୍ଗାରୁ ଟିମ୍ ଆଠ ମ୍ୟାଚ୍ ଜିତିଥିବା ବେଳେ ତିନି ମ୍ୟାଚ୍ ହାରିଛି ଏବଂ ଗୋଟିଏ ଡ୍ର’ ରହିଛି ।
୨୦୨୩-୨୫ ଚକ୍ରରେ ଅବଶିଷ୍ଟ ସାତ ଟେଷ୍ଟ ମଧ୍ୟରୁ ପାଟ୍ କମିନ୍ସଙ୍କ ଟିମ୍ ଘରେ ଭାରତ ବିପକ୍ଷରେ ପାଞ୍ଚ ଓ ଶ୍ରୀଲଙ୍କାରେ ଦୁଇ ମ୍ୟାଚ୍ ଖେଳିବ । ୬୦ ପ୍ରତିଶତରୁ ଉପରେ ରହିବା ପାଇଁ ଅଷ୍ଟ୍ରେଲିଆକୁ ସେଥିମଧ୍ୟରୁ ଚାରି ମ୍ୟାଚ୍ ଜିତିବାକୁ ହେବ । ଅବଶ୍ୟ ଟିମ୍ ତିନି ବିଜୟ ଓ ତିନି ଡ୍ର’ ସହ ମଧ୍ୟ ଏତିକି ପ୍ରତିଶତ ହାସଲ କରିପାରିବ । ଭାରତ ବିପକ୍ଷ ଟେଷ୍ଟ ସିରିଜ୍ରୁ ହିଁ ତା’ର ଚୂଡ଼ାନ୍ତ ସ୍ଥାନ ନିରୂପିତ ହେବ ।
ଶ୍ରୀଲଙ୍କା ଏ ଯାବତ ଚାରି ସିରିଜ୍ରେ ଆଠ ମ୍ୟାଚ୍ ଖେଳି ଚାରି ବିଜୟ ଓ ଚାରି ପରାଜୟ ସହ ୪୮ ପଏଣ୍ଟ ପାଇଛି । ଏବେ ଚାଲିଥିବା ନ୍ୟୁଜିଲାଣ୍ଡ ବିପକ୍ଷ ଘରୋଇ ସିରିଜ୍ରେ ସିଂହଳୀ ଟିମ୍ ପ୍ରଥମ ମ୍ୟାଚ୍ରେ ରୋମାଞ୍ଚକ ବିଜୟ ହାସଲ କରିଛି ।
ଏହି ସିରିଜ୍ରେ ଆୟୋଜକ ଟିମ୍ ଭ୍ରମଣକାରୀ ନ୍ୟୁଜିଲାଣ୍ଡ ବିପକ୍ଷରେ ଆଉ ଏକ ମ୍ୟାଚ୍ ଖେଳିବ । ଏହାପରେ ଧନଞ୍ଜୟ ଡି’ ସିଲ୍ଭାଙ୍କ ଟିମ୍ ଘରେ ଅଷ୍ଟ୍ରେଲିଆ ବିପକ୍ଷରେ ଦୁଇ ଓ ଦକ୍ଷିଣ ଆଫ୍ରିକାରେ ଦୁଇ ଟେଷ୍ଟ ଖେଳିବ ।
ଏହି ଦୁଇ ସିରିଜ୍ ଟିମ୍ ପାଇଁ କଷ୍ଟସାଧ୍ୟ ହେବ । ୬୦ ପ୍ରତିଶତରୁ ଉପରେ ରହିବା ପାଇଁ ଶ୍ରୀଲଙ୍କା ଅବଶିଷ୍ଟ ପାଞ୍ଚ ଟେଷ୍ଟ ମଧ୍ୟରୁ ଚାରି ମ୍ୟାଚ୍ ଜିତିବା ନିହାତି ଜରୁରୀ ।
ପ୍ରଥମ ସଂସ୍କରଣ (୨୦୧୯-୨୧) ଚାମ୍ପିଅନ୍ ନ୍ୟୁଜିଲାଣ୍ଡ ଏବେ ଶ୍ରୀଲଙ୍କା ଗସ୍ତରେ ପ୍ରଥମ ଟେଷ୍ଟ ହାରିବା ପରେ ୪୨.୮୫ ପ୍ରତିଶତ ସହ ଟେବୁଲ୍ରେ ଗୋଟିଏ ସ୍ଥାନ ହରାଇ ଚତୁର୍ଥ ସ୍ଥାନକୁ ଖସିଆସିଛି ।
୩୬ ପଏଣ୍ଟ ପାଇଥିବା କିୱି ଟିମ୍ ଏ ଯାବତ ଚାରି ସିରିଜ୍ରେ ସାତ ଟେଷ୍ଟ ଖେଳି ତିନି ମ୍ୟାଚ୍ ଜିତିଥିବା ବେଳେ ଚାରି ମ୍ୟାଚ୍ ହାରିଛି । ଶ୍ରୀଲଙ୍କାରେ ଆଉ ଗୋଟିଏ ଓ ଭାରତରେ ତିନି ମ୍ୟାଚ୍ ଖେଳିବା ପରେ ନ୍ୟୁଜିଲାଣ୍ଡ ଘରେ ଇଂଲଣ୍ଡ ବିପକ୍ଷରେ ତିନି ମ୍ୟାଚ୍ର ସିରିଜ୍ ଆୟୋଜନ କରିବ ।
୬୦ ପ୍ରତିଶତରୁ ଉପରେ ରହିବା ପାଇଁ ନ୍ୟୁଜିଲାଣ୍ଡକୁ ଅବଶିଷ୍ଟ ସାତରୁ ଛଅ ଟେଷ୍ଟ ଜିତିବାକୁ ହେବ । ଟିମ୍ ପାଇଁ ପାଞ୍ଚ ବିଜୟ ଓ ଗୋଟିଏ ଡ୍ର’ ଯଥେଷ୍ଟ ନୁହେଁ । ଟିମ୍ ସାଉଦୀଙ୍କ ସେନା ପାଇଁ ଭାରତ ଓ ଇଂଲଣ୍ଡ ବିପକ୍ଷ ସିରିଜ୍ ଆହ୍ୱାନପୂର୍ଣ୍ଣ ହେବ ।
ଏହାଛଡ଼ା ଷଷ୍ଠ ସ୍ଥାନରେ ଥିବା ବାଂଲାଦେଶ (୩୯.୨୯ ପ୍ରତିଶତ) ଓ ସପ୍ତମରେ ଥିବା ଦକ୍ଷିଣ ଆଫ୍ରିକା (୩୮.୮୯ ପ୍ରତିଶତ) ପାଖରେ ବି ସୁଯୋଗ ରହିଛି ।
ବାଂଲାଦେଶ ତା’ର ଅବଶିଷ୍ଟ ପାଞ୍ଚ ଟେଷ୍ଟ ମଧ୍ୟରୁ ଭାରତରେ ଆଉ ଗୋଟିଏ ଓ ୱେଷ୍ଟଇଣ୍ଡିଜ୍ରେ ଦୁଇ ଏବଂ ଘରେ ଦକ୍ଷିଣ ଆଫ୍ରିକା ବିପକ୍ଷରେ ଦୁଇ ମ୍ୟାଚ୍ ଖେଳିବ । ଟିମ୍ ପାଇଁ ଏବେ ସମସ୍ତ ମ୍ୟାଚ୍ ଜିତିବା ଜରୁରୀ ହୋଇଯାଇଛି ।
ସେହିପରି ଆଫ୍ରିକୀୟ ଟିମ୍ ଘରେ ଶ୍ରୀଲଙ୍କା ଓ ପାକିସ୍ତାନ ବିପକ୍ଷରେ ଦୁଇ ଲେଖାଏଁ ଏବଂ ବାଂଲାଦେଶରେ ଦୁଇ ଟେଷ୍ଟ ଖେଳିବ । ତେମ୍ବା ବାଭୁମାଙ୍କ ଟିମ୍ ପାଇଁ ୬୦ ପ୍ରତିଶତରୁ ଉପରେ ରହିବା ଲାଗି ଅବଶିଷ୍ଟ ଛଅ ମ୍ୟାଚ୍ରୁ ଅତି କମ୍ରେ ପାଞ୍ଚ ବିଜୟ ଆବଶ୍ୟକ । ତେବେ ଏହି ଦୁଇ ଟିମ୍ର ପଥ ଏତେ ସୁଗମ ନୁହେଁ ।
ଅନ୍ୟପଟେ, ପଞ୍ଚମ ସ୍ଥାନରେ ଥିବା ଇଂଲଣ୍ଡ ଓ ଅଷ୍ଟମରେ ଥିବା ପାକିସ୍ତାନ ଡବ୍ଲ୍ୟୁଟିସି ଫାଇନାଲ୍ ଦୌଡ଼ରୁ ଆପାତତଃ ବାଦ୍ ପଡ଼ିଥିବା ବେଳେ ସର୍ବନିମ୍ନ ନବମରେ ଥିବା ୱେଷ୍ଟଇଣ୍ଡିଜ୍ର ସମ୍ଭାବନା ନାହିଁ ।
ଇମେଲ୍: biswasports@gmail.com
(ବି.ଦ୍ର: ଏହି ଲେଖାରେ ଥିବା ସମସ୍ତ ତଥ୍ୟ ଲେଖକଙ୍କ ନିଜସ୍ୱ ମତ)
