LIVE TV
ମୁଣ୍ଡ ଉପରେ ପ୍ରବଳ ଖରା, ହେଲେ ପରିବାର ଚଳାଇବା ପାଇଁ ମୁଣ୍ଡ ଉପରେ ପାମ୍ପଡ ପାଛିଆ ଧରି ଗଳିକୁ ଗଳି.. ଗାଁ କୁ ଗାଁ ବୁଲି ପାମ୍ପଡ଼ ବିକ୍ରି କରୁଛନ୍ତି ଏଇ ବୃଦ୍ଧା । ବୟସ କେତେ ହେବ ତାହା ଅବଶ୍ୟ ଆମକୁ ଜଣାନାହିଁ । କିନ୍ତୁ ଚେହେରା ଦେଖିଲେ ବୟସ ୭୦ ଉପରେ ହେବ ବୋଲି ଜଣାପଡ଼ୁଛି । ଏତେ ବୟସ ପରେ ବି ସେ ହାର ମାନିନାହାନ୍ତି ବରଂ ପରିବାରର ପେଟ ପୋଷିବା ପାଇଁ ଉଦୁଉଦିଆ ଖରାବେଳେ ରାସ୍ତାରେ ବୁଲି ବୁଲି କରୁଛନ୍ତି ପାମ୍ପଡ ବେପାର ।
Also Read
ସୋସିଆଲ ମିଡିଆରେ ଭାଇରାଲ ହେଉଥିବା ଏକ ଭିଡିଓକୁ ନେଇ ଏବେ ଭାରି ଚର୍ଚ୍ଚା । କାରଣ ପିଚୁ ରାସ୍ତାରେ ଏମିତି ଖରାବେଳେ ବଡ଼ ପାଛିଆଟିଏ ମୁଣ୍ଡରେ ମୁଣ୍ଡାଇ ପାମ୍ପଡ଼ ବେପାର କରୁଛନ୍ତି ବୃଦ୍ଧା ଜଣକ । ଆଉ ବିକ୍ରି କରୁଥିବା ପାମ୍ପଡ଼ର ଦାମ୍ ଗୋଟାକୁ ୨୦ ଟଙ୍କା । ଘରର ସେ ଏକମାତ୍ର ରୋଜଗାରିଆ ହୋଇଥିବା କାରଣରୁ ସକାଳୁ ସନ୍ଧ୍ୟା ପର୍ଯ୍ୟନ୍ତ ଏମିତି ବୁଲି ବୁଲି କରୁଛନ୍ତି ପାମ୍ପଡ ବେପାର ।
ପ୍ରଥମେ ଭିଡିଓଟିକୁ ଏକ ଫୁଡ୍ ବ୍ଲଗିଂ ଚ୍ୟାନେଲ୍ ଷ୍ଟ୍ରିଟ୍ ଫୁଡ୍ ରେସିପି ଇନ୍ଷ୍ଟାଗ୍ରାମ୍ରେ ସେୟାର କରାଯାଇଥିଲା । ଆଉ ତାପରେ ଭିଡିଓଟି ଖୁବ୍ ଜୋର୍ରେ ଭାଇରାଲ୍ ହେଉଛି । ଆଉ କୁହାଯାଇଛି କେମିତି ଏତେ ବୟସ ହେବା ପରେ ମଧ୍ୟ କାହା ସାମ୍ନାରେ ହାତ ନପତାଇ ଗାଁକୁ ଗାଁ ବୁଲି ବୃଦ୍ଧା ଜଣକ କରୁଛନ୍ତି ପାମ୍ପଡ ବେପାର । ଖାଲି ଏତିକି ନୁହେଁ ବରଂ ଅନେକ ୟୁଜର୍ସ ଏଇ ବୃଦ୍ଧାଙ୍କୁ ସମସ୍ତଙ୍କର ପ୍ରେରଣା ବୋଲି କହିଛନ୍ତି ।
ଭିଡିଓକୁ ସୋସିଆଲ ମିଡ଼ିଆରେ ଅନେକ ୟୁଜର୍ସ ଦେଖିସାରିଲେଣି । ବର୍ତ୍ତମାନ ସୁଦ୍ଧା ଭିଡିଓଟିରେ ୨୬ ହଜାର ଲାଇକ୍ ମିଳିସାରିଲାଣି । ତେବେ ବୃଦ୍ଧାଙ୍କ ଠିକଣା ସଠିକ୍ ଭାବରେ ଜଣାପଡ଼ିନଥିବାରୁ ତାଙ୍କୁ ସାହାଯ୍ୟ କରିବା ପାଇଁ ଇଚ୍ଛା କରୁଥିବା ବ୍ୟକ୍ତି ତାଙ୍କର ଠିକଣା ଖୋଜିବାରେ ଏବେ ବ୍ୟସ୍ତ । ସତରେ ଏ ବୟସରେ ଏମିତି ପରିଶ୍ରମ କରି ପରିବାର ପୋଷିବା ନିହାତି ସମାଜ ପାଇଁ ପ୍ରେରଣା ।
