LIVE TV
ତିନି ବର୍ଷ ପରେ କୋମାରୁ ଉଠିଲେ ସ୍ୱାମୀ । ସ୍ୱାମୀଙ୍କ ଚିକିତ୍ସା ପାଇଁ ମିଳିଥିବା ମୋଟା ଅଙ୍କର ପବ୍ଲିକ ଫଣ୍ତକୁ ଫେରାଇଦେବା ପାଇଁ ନିଷ୍ପତ୍ତି ନେଲେ ସଚ୍ଚୋଟ ପତ୍ନୀ । ଜଣେ କି ଦୁଇ ଜଣଙ୍କୁ ନୁହେଁ ବରଂ ୪ ହଜାରରୁ ଅଧିକ ଲୋକଙ୍କୁ ମୋଟ ୨୧ ଲକ୍ଷ ଟଙ୍କା ଫେରାଇବା ପାଇଁ ନିଷ୍ପତ୍ତି ନେଇଛନ୍ତି ଜଣେ ଚାଇନିଜ୍ ମହିଳା ।
୨୦୨୦ ରେ ଏକ ଭୟଙ୍କର କାର୍ ଦୁର୍ଘଟଣାରେ ଗୁରୁତର ଭାବେ ଆହତ ହୋଇଥିଲେ ଜିଆଙ୍ଗ୍ । ପୁଣି ଥରେ ସେ ନିଜ ପାଦରେ ଛିଡ଼ା ହୋଇପାରିବେ କି ନାହିଁ, ସେନେଇ ଡାକ୍ତର ବି ଆଶା ଛାଡ଼ିଦେଇଥିଲେ । କାରଣ ସେ କଥା କହିପାରୁନଥିଲେ କି ଚାଲି ପାରୁନଥିଲେ । ଏମିତିକି ନିଜ ଦୈନନ୍ଦିନ ନିତ୍ୟକର୍ମ କରିବାକୁ ବି ଅସମର୍ଥ ଥିଲେ । କୋମାରୁ କେବେ ଫେରିବେ ସେନେଇ ଡାକ୍ତର ବି କିଛି କହିନଥିଲେ । ଆର୍ଥିକ ଅବସ୍ଥା ଖରାପ କାରଣରୁ ପତ୍ନୀ ଡିଙ୍ଗ୍ ଲୋକଙ୍କଠୁ ସହାୟତା ଭିକ୍ଷା କରିଥିଲେ । ଜଣେ କି ଦୁଇଜଣ ନୁହେଁ, ବରଂ ୪୦୦୫ ଜଣ ଲୋକ ଡିଙ୍ଗ୍କୁ ସାହାଯ୍ୟର ହାତ ବଢ଼ାଇଥିଲେ ।
Also Read
ଦିନ ରାତି ସ୍ୱାମୀଙ୍କ ସେବା ପରେ ଶେଷରେ କୋମାରୁ ବାହାରିଲେ ଜିଆଙ୍ଗ୍ । ସ୍ୱାମୀଙ୍କ ଭଲ ହୋଇଯିବା ଦେଖି ତାଙ୍କ ଚିକିତ୍ସା ପାଇଁ ଲୋକଙ୍କଠୁ ଆଣିଥିବା ଟଙ୍କାକୁ ଫେରାଇବେ ବୋଲି ନିଷ୍ପତ୍ତି ନେଲେ । ଡିଙ୍ଗ୍ କହିଛନ୍ତି ଯେ, ସେ ପ୍ରତିଟି ଲୋକଙ୍କୁ ଖୋଜି ସେମାନେ ଦେଇଥିବା ଟଙ୍କାକୁ ଫେରାଇବେ । ତାଙ୍କର ଏହି ପ୍ରୟାସକୁ ଲୋକେ ବେଶ୍ ପ୍ରଶଂସା କରିଛନ୍ତି ।
ଜିଆଙ୍ଗ୍ଙ୍କ ଚିକିତ୍ସା ପାଇଁ ମେଡିକାଲ୍ ବିଲ୍, ମେଡିସିନ୍ ଓ ତାଙ୍କ ସ୍ୱାସ୍ଥ୍ୟାବସ୍ଥାରେ ସୁଧାର ଆଣିବା ପାଇଁ ମୋଟ୍ ୨୧ ଲକ୍ଷ ଟଙ୍କା ଖର୍ଚ୍ଚ ହୋଇଥିଲା । ହଜାର ହଜାର ଲୋକ ତାଙ୍କୁ ସହାୟତାର ହାତ ବଢ଼ାଇଥିଲେ । ଯାହାଫଳରେ ଆଜି ଜିଆଙ୍ଗ ସମ୍ପୂର୍ଣ୍ଣ ଭାବେ ସୁସ୍ଥ ହୋଇଛନ୍ତି । ଡିଙ୍ଗ ଖୁବଶୀଘ୍ର ଟଙ୍କା ଫେରାଇଦେବେ ବୋଲି ପ୍ରତିଶ୍ରୁତି ମଧ୍ୟ ଦେଇଛନ୍ତି ।
