Viral Video: ଥାନାର ତୃତୀୟ ମହଲାରେ ଫସିଗଲା ଷଣ୍ଢ, ନାକେଦମ ପୋଲିସ...ଭାଇରାଲ ହେଲା ଭିଡିଓ

ଥାନାରେ ଷଣ୍ଢ ଆତଙ୍କ । କେତେବେଳେ ଥାନା ଭିତରେ କୁକୁର କେତେବେଳେ ମାଙ୍କଡ ପଶିଯାଇଥିବା ଖବର ଶୁଣିଥିବେ । ତାର ଭିଡିଓ ବି ସୋସିଆଲ ମିଡିଆରେ ଭାଇରାଲ ହୋଇଥାଏ । ଥାନା ଭିତରେ ଷଣ୍ଢ ପଶିଯିବା ବଡ଼ କଥା ନୁହେଁ । କିନ୍ତୁ ହୋହଲ୍ଲା ସେତେବେଳେ ଘଟଥିଲା ଯେତେବେଳେ ଷଣ୍ଢଟି ଥାନାର ତୃତୀୟ ମହଲାକୁ ଚଢ଼ିଯାଇଥିଲା । ଏଭଳି କିଛି ଘଟଣା ଘଟିଛି ଉତ୍ତରପ୍ରଦେଶର ବଦାୟୁଁରେ ।

ହଠାତ ଗୋଟିଏ ଷଣ୍ଢ  ଉଝାନୀର ଥାନା ପରିସରରେ ପଶିଯାଇଥିଲା । ପ୍ରଥମେ ଲୋକଙ୍କୁ ଲାଗିଲା ଷଣ୍ଢଟି କିଛି ସମୟ ବୁଲିବ ତାପରେ ଚାଲିଯିବ । କିନ୍ତୁ ଷଣ୍ଢଟି ବାହାରକୁ ନଯାଇ ଥାନାର ବିଲଡିଂ ଭିତରେ ପଶିଥିଲା ଓ ସିଡ଼ି ଚଢ଼ିକି ସିଧା ତୃତୀୟ ମହଲାରେ ପହଞ୍ଚିଯାଇଥିଲା ।

ଏହି ଦୃଶ୍ୟ ଦେଖି ପୋଲିସ କର୍ମଚାରୀ ଓ ଥାନାକୁ ଆସିଥିବା ଲୋକମାନେ ଆଶ୍ଚର୍ଯ୍ୟ ହୋଇଯାଇଥିଲେ । ଥାନାଟି ତିନି ମହଲା ବିଲଡିଂ । ଷଣ୍ଢଟି ଏତେ ଉପରକୁ ଚଢ଼ିଯାଇଥିବା ଦେଖି ଲୋକମାନେ ବ୍ୟସ୍ତବିବ୍ରତ ହୋଇପଡିଥିଲେ । ସବୁ ଲୋକ ଏଣେତେଣେ ଦୌଡ଼ିବାକୁ ଲାଗିଲେ । କେହି ବି ଭାବିନଥିଲେ ଏତେ ଓଜନର ଷଣ୍ଢ ଏତେ ଉପରକୁ ସିଡ଼ି ଚଢ଼ି ଯାଇପାରିବ ।

ଅଧିକ ପଢ଼ନ୍ତୁ: ଗେଟ ଖୋଲୁ ଖୋଲୁ ଏ କ’ଣ ହେଲା ? ସିସିଟିଭି ଭିଜୁଆଲ ଭାଇରାଲ

ଘଟଣା ବିଷୟରେ ସୂଚନା ମିଳିବା ପରେ ନଗର ପାଳିକା ଓ ପଶୁପାଳନ ବିଭାଗର ଟିମ ଆସି ପହଞ୍ଚିଥିଲେ । ସମସ୍ତେ ଷଣ୍ଢକୁ ସୁରକ୍ଷିତ ଭାବେ ତଳକୁ ଆଣିବାର ଯୋଜନା ଉପରେ କାମ କରିବାକୁ ଆରମ୍ଭ କରିଦେଇଥିଲେ । ଷଣ୍ଢର ରେସକ୍ୟୁରେ ଲାଗିଥିଲେ ପାଖାପାଖି ଡର୍ଜନେ ଲୋକ ।

ତୃତୀୟ ମହଲାରେ ଫସିଥିବା ଷଣ୍ଢକୁ ତଳକୁ ଆଣିବା ଏତେ ସହଜ ନଥିଲା । ଷଣ୍ଢଟି ତଳକୁ ଆସିପାରୁନଥିବାରୁ ରାଗରେ ଉତ୍ତେଜିତ ହୋଇପଡିଥିଲା। ସେଥିପାଇଁ ଷଣ୍ଢଟିକୁ ତଳକୁ ଆଣିବା ପାଇଁ ତାକୁ ବେହୋଶ କରିବାକୁ ପଡ଼ିଲା । ଯେମିତିକି ସେ କାହାକୁ ଆଘାତ ନକରିବ ଓ ଷଣ୍ଢର ବି କିଛି କ୍ଷତି ହେବନି । ସେଥିପାଇଁ ପଶୁ ଚିକିତ୍ସକ ଷଣ୍ଢଟିକୁ ଇଂଜେକ୍ସନ ଦେଇ ବେହୋସ କରିଥିଲେ । ଏହା ପରେ ରଶି ଦ୍ବାରା ଅନେକ ଲୋକଙ୍କ ସାହାଯ୍ୟରେ ଷଣ୍ଢଟିକୁ ତଳକୁ ଅଣାଯାଇଥିଲା ।

ତଳକୁ ଆଣିବା ପ୍ରକ୍ରିୟାରେ ଷଣ୍ଢଟିକୁ ଆଘାତ ଲାଗିଛି । ରେସକ୍ୟୁ ଅପରେସନ ପାଖାପାଖି ୩ଘଣ୍ଟା ଧରି ଚାଲିଥିଲା । ପୁରା ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ଲୋକମାନେ ଆଶ୍ଚର୍ଯ୍ୟ ହେଉଛନ୍ତି ଷଣ୍ଢଟି ଏତେ ଉପରକୁ କେମିତି ଚଢ଼ିଗଲା ।

ଅଧିକ ପଢ଼ନ୍ତୁ: ପରୀକ୍ଷା କେନ୍ଦ୍ରରେ ଛାତ୍ରଙ୍କୁ ଚାପୁଡା ମାରି ବିବାଦରେ ଆଇଏଏସ ଅଫିସର