ଫାଉଡ଼ା ଧରି ନିଜେ କେନାଲରୁ ମାଟି ଖୋଲିଲେ ସାଂସଦ ଅପରାଜିତା !

ମାଟି ତାଡ଼ି କେନାଲ ଖୋଲିଲେ ନିଜେ ସାଂସଦ ଅପରାଜିତା ଷଡ଼ଙ୍ଗୀ। ଲୋକେ ମାଟି ଖୋଳି କେନାଲର ପୁନରୁଦ୍ଧାର କରୁଥିବା ବେଳେ ଏଥିରେ ନିଜେ ସହଯୋଗ କରିଥିଲେ ଅପରାଜିତା । ଆଗରୁ ଅଭିଯୋଗ ହୋଇଥିଲା ଯେ, ଭୁବନେଶ୍ୱର ଉପକଣ୍ଠ ଚନ୍ଦକା ଅଞ୍ଚଳରେ ଥିବା ଡେରାସ୍ ଡ୍ୟାମର କ୍ଷୁଦ୍ର ଜଳସେଚନ ପ୍ରକଳ୍ପକୁ ଅବରୋଧ କରାଯାଇଛି । ମାଟି ପକାଇ କେନାଲକୁ ପୋତା ଯାଇଛି ।

ଏହା ଦ୍ୱାରା ୪ ଶହ ଏକର ଜମି ଜଳସେଚନରୁ ବଞ୍ଚିତ ହୋଇଥିବା ସ୍ଥାନୀୟ ଚାଷୀ ଅଭିଯୋଗ କରିଥିଲେ । ଆଜି ସେହି ଅଞ୍ଚଳକୁ ପରିଦର୍ଶନରେ ଯାଇଛନ୍ତି ବିଜେପି ସାଂସଦ ଅପରାଜିତା ଷଡ଼ଙ୍ଗୀ । ଘଟଣାସ୍ଥଳ ଦେଖିବା ପରେ ଅପରାଜିତା କହିଛନ୍ତି, କିରୁଥିକା ପ୍ରଭାକରନ-ଜଣେ ସରକାରୀ କର୍ମଚାରୀଙ୍କ ମିଲିଭଗତରେ ଏହି ଅବରୋଧ କରାଯାଇଛି ।

ଆଜି ସାଂସଦଙ୍କ ଉପସ୍ଥିତିରେ ବେଆଇନ ଭାବେ ହୋଇଥିବା ଅବରୋଧକୁ ଖୋଳି ଦେଇଛନ୍ତି ଲୋକେ । ମାଟି ଖୋଳିବାରୁ ତଳେ କଂକ୍ରିଟ କେନାଲ ଥିବା ଦେଖା ଯାଇଥିଲା । ଏହି କାମରେ ଲୋକଙ୍କୁ ନିଜେ ସହଯୋଗ କରିଥିଲେ ଅପରାଜିତା ଷଡ଼ଙ୍ଗୀ । ସେପଟେ ପ୍ରଭାକରନ କିମ୍ବା ସରକାରଙ୍କ ପ୍ରତିକ୍ରିୟା ମିଳିପାରିନି ।