ପଦ୍ମପୁର ପଶାପାଲିରେ ରେଳ ଆଉ କୃଷି ବୀମା ଗୋଟି ! କ୍ୟାମ୍ପେନ ବେଳେ ରାଜ୍ୟ ସରକାରଙ୍କୁ ଜୋରଦାର ଟାର୍ଗେଟ

ପଦ୍ମପୁର ଉପନିର୍ବାଚନ ପ୍ରଚାର ମୈଦାନକୁ ଓହ୍ଲାଇ ଆଜି ବିଜେପି ପ୍ରାର୍ଥୀ ପ୍ରଦୀପ ପୁରୋହିତଙ୍କ ଲାଗି ଭୋଟ୍ ମାଗିବା ବେଳେ ରାଜ୍ୟ ସରକାରଙ୍କୁ ନିଶାନା କରିଛନ୍ତି ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ଓ କେନ୍ଦ୍ର କୃଷିମନ୍ତ୍ରୀ ନରେନ୍ଦ୍ର ସିଂ ତୋମାର । ଗତକାଲି ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡାଙ୍କ ହମଲା ପରେ ଆଜି ପାଇକମାଳ ସଭାରେ ବିଜେଡି ସରକାର ଉପରେ ବର୍ଷିଛନ୍ତି ଉଭୟ ମନ୍ତ୍ରୀ ।

ପଦ୍ମପୁରକୁ ରେଳ ସଂଯୋଗ ପ୍ରସଙ୍ଗରେ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ରାଜ୍ୟ ସରକାରଙ୍କୁ ଦେଇଛନ୍ତି ଖୋଲା ଚ୍ୟାଲେଞ୍ଜ୍ । ବରଗଡ଼-ନୂଆପଡ଼ା ଭାୟା ପଦ୍ମପୁର ରେଳପଥ ନେଇ ପୂର୍ବରୁ ମନ୍ତ୍ରୀ ଟୁକୁନି ସାହୁ ରେଳମନ୍ତ୍ରୀଙ୍କୁ ଚିଠି ଲେଖିଥିବାରୁ ଏ ପ୍ରସଙ୍ଗ ଉଠାଇଥିଲେ ବୈଷ୍ଣବ । କହିଥିଲେ ରାଜ୍ୟ ସରକାର କାଲି ଯାଗା ଦେଲେ, ତା ପରଦିନ କାମ ଆରମ୍ଭ ହେବ । ଏହାସହିତ ଦାଦନ ପ୍ରସଙ୍ଗ ବି ଉଠାଇଥିଲେ ବୈଷ୍ଣବ ।

ସେପଟେ ଚାଷୀଙ୍କୁ ଫସଲ ବୀମା ଇସ୍ୟୁରେ ବିଜେଡି ସରକାରଙ୍କୁ ସିଧା ତୀର ମାରିଥିଲେ ତୋମାର । କହିଥିଲେ, ଫସଲ ବୀମା ଯୋଜନା ଟଙ୍କା ରିଲିଜ୍ ହୋଇସରିଛି ,ହେଲେ ରାଜ୍ୟ ସରକାରଙ୍କ ମନ୍ଥରତା ଯୋଗୁଁ ଚାଷୀ ଟଙ୍କା ପାଇବାରେ ବିଳମ୍ବ ହେଉଛି । ବୀମା ଟଙ୍କା ବାବଦରେ ବିଜେଡିର ନେତାମାନେ ଦୁଷ୍ପ୍ରଚାର କରୁଥିବା ଅଭିଯୋଗ ଆଣିଛନ୍ତି ତୋମାର ।

ଅନ୍ୟପଟେ ଦୁଇ କେନ୍ଦ୍ରମନ୍ତ୍ରୀଙ୍କ ଶାଣିତ ଅଭିଯୋଗର ଜବାବ ରଖିଛନ୍ତି ବିଜେଡିର ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ । କହିଛନ୍ତି କୃଷିମନ୍ତ୍ରୀ ସାଧାରଣ ସଭାରେ ଜାଣିଶୁଣି ପ୍ରବଞ୍ଚନାପୂର୍ଣ୍ଣ କଥା କହୁଛନ୍ତି ।

ଦୁଇ କେନ୍ଦ୍ରମନ୍ତ୍ରୀ ପାଇକମାଳ ସଭା ପରେ ପଦ୍ମପୁରରେ ଆୟୋଜିତ ବିଶାଳ ସଧାରଣ ସଭାରେ ବିଜେପି ପ୍ରାର୍ଥୀଙ୍କ ପାଇଁ ଭୋଟ୍ ମାଗିଥିଲେ । ଏହି ମଞ୍ଚରେ ରାଜ୍ୟ ବିଜେପିର ସବୁ ତୁଙ୍ଗ ନେତାଙ୍କୁ ଦେଖିବାକୁ ମିଳିଥିଲା । ସେପଟେ ବିଜେଡି ପାଇଁ ପ୍ରଚାରର ମଙ୍ଗ ଧରିଥିଲେ ପୂର୍ବତନ ସାଂସଦ କଳିକେଶ ସିଂଦେଓ, ପ୍ରଦୀପ ମାଝୀ, ସାରଦା ନାୟକ ଓ ଅନ୍ୟ ନେତା । ପ୍ରାର୍ଥୀ ବର୍ଷା ସିଂ ବରିହା ମଧ୍ୟ ପଦ୍ମପୁରରେ ଘର ଘର ବୁଲି ଭୋଟ୍ ମାଗିଥିଲେ । ବିଜେଡି ସୁପ୍ରିମୋ ନବୀନ ପଟ୍ଟନାୟକ ଖୁବଶୀଘ୍ର ମୈଦାନକୁ ଓହ୍ଲାଇବା ନେଇ ସଂକେତ ଦେଇଛନ୍ତି ପୂର୍ବତନ ସାଂସଦ କଳୀକେଶ ସିଂଦେଓ । ଏଣେ କଂଗ୍ରେସର ପ୍ରଚାର ସମ୍ଭାଳିଥିଲେ ପିସିସି ସଭାପତି ଶରତ ପଟ୍ଟନାୟକ, ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ ସହ୍ୟ ଅନ୍ୟ ନେତା ।