ନାଚୁଛି ରାଇରଙ୍ଗପୁର, ଝୁମୁଛି ଓଡ଼ିଶା: ଅଖ୍ୟାତ ପଲ୍ଲୀର ପ୍ରଖ୍ୟାତ ଝିଅ ପାଇଁ ଚାରିଆଡ଼େ ସେଲିବ୍ରେସନ୍

ନାଚି ଉଠୁଛି ମନ...ନାଚି ଉଠୁଛି ପ୍ରାଣ...ପାରମ୍ପାରିକ ବାଦ୍ୟର ତାଳେ ତାଳେ ମସ୍‌ଗୁଲ ଯୁବଠୁ ବୟସ୍କ, ମହିଳାଙ୍କଠୁ ପୁରୁଷ । ଆଦିବାସୀ ବହୁଳ ମୟୁରଭଞ୍ଜ ଆଜି ଖୁସି ମଉଜରେ ମଜ୍ଜିଯାଇଛି । ଗାଁରୁ ସହର ଉତ୍ସବମୁଖର ହୋଇଯାଇଛି । କାରଣ ମାଟିର ଝିଅ ଆଜି ମହାମହିମ ରାଷ୍ଟ୍ରପତି ହେବାକୁ ଯାଉଛନ୍ତି । ସେଥିପାଇଁ ଭୋଜି ଭାତ, ନୃତ୍ୟ ସଂଗୀତରେ ମାତିଯାଇଛି ସାରା ସାନ୍ତାଳୀ ସଂପ୍ରଦାୟ । ମୟୁରଭଞ୍ଜ ଜିଲ୍ଲା କୁସୁମୀ ବ୍ଲକର ପାହାଡ଼ପୁର ଦ୍ରୌପଦୀଙ୍କ ଶାଶୂଘର ଗାଁର ବୋହୂ ଆଜି ଯେତେବେଳେ ରାଷ୍ଟ୍ରପତି ବନୁଛନ୍ତି ଛାତି କୁଣ୍ଢେମୋଟ ହେବା ସ୍ୱାଭାବିକ । ଚାଷବାସ କାମ ଛାଡ଼ି ଆଜି ବିଜୟ ଉତ୍ସବରେ ଆତ୍ମବିଭୋର ଦ୍ରେପଦିଙ୍କ ମାଟିର ମଣିଷମାନେ ।

ରାଇରଙ୍ଗପୁରରୁ ରାଇସିନା ହିଲ୍ସ । କୁସୁମୀ ବ୍ଲକ ଉପରବେଡ଼ାର ଝିଅ ଦ୍ରେପଦୀଙ୍କ ଏତେବଡ଼ ସଫଳତା ଆଜି ଇତିହାସ ପାଲଟିବାକୁ ଯାଉଛି । ସ୍ୱାର୍ଣ୍ଣାକ୍ଷରରେ ଲିପିବଦ୍ଧ ହେବାକୁ ଯାଉଛି ଦ୍ରୌପଦୀଙ୍କ ନାଁ । ଆଉ ତାଙ୍କ ପୈତୃକ ଗାଁ ଉପରବେଡ଼ା । ପରିବାର ଲୋକଙ୍କ ଖୁସି କହିଲେ ନସରେ । ଗର୍ବରେ ଆଜି ଛାତି ଫୁଲିଉଠୁଛି । ଦେଶର ସର୍ବୋଚ୍ଚ ଆସନରେ ବସିବାକୁ ଯାଉଥିବା ଖୁସିରେ ପୂଜାପାଠ, ନାଚଗୀତରେ ସମସ୍ତେ ମସ୍‌ଗୁଲ ହୋଇଯାଇଛନ୍ତି ।

ଦ୍ରୌପଦୀ ଘରକୁ ଆସିଲେ ସାଧାରଣତଃ ପଖାଳ ଖାଆନ୍ତି । ପଖାଳ ସହିତ ତାଙ୍କ ପସନ୍ଦ ହେଉଛି ଶାଗଭଜା, ଆଳୁଭଜା, ଲାଉ ତରକାରୀ, ପିଠା ମଧ୍ୟ ଖାଆନ୍ତି । ତେଣୁ ଦ୍ରେପଦୀଙ୍କ ପୁତୁରା ବୋହୁ କହିଛନ୍ତି, ଏଥର ଯେବେ ଘରକୁ ଆସିବେ ତାଙ୍କ ପସନ୍ଦ ଅନୁଯାୟୀ, ପଖାଳ ଖୁଆଇବେ ।

ଏପଟେ ଦ୍ରେପଦୀ ରାଷ୍ଟ୍ରପତି ଭାବେ ବିଜୟୀ ହେଲେ ଆସନ୍ତା ୨୫ ତାରିଖରେ ଶପଥ ପାଠ ରହିଛି । ଉତ୍ସବରେ ଯୋଗଦେବା ଦ୍ରୌପଦୀଙ୍କ ଭାଇ ପାଇଁ ବିମାନରେ ଦିଲ୍ଲୀ ଯାଉଥିବା କହିଛନ୍ତି ।

ଦ୍ରୌପଦୀଙ୍କ ସ୍କୁଲ ଶିକ୍ଷକ ବାସୁଦେବ ବେହେରା । ସେ ପ୍ରଥମରୁ ସପ୍ତମ ଯାଏଁ ପାଠପଢ଼ାଇଥିଲେ । ଦ୍ରୌପଦୀଯେତେବେଳେ ଛାତ୍ରୀ ଥିଲେ, ପ୍ରତ୍ୟେକଟି କଥା ଆଜି ତାଙ୍କର ଆଖି ସାମ୍ନାରେ ନାଚିଉଠୁଛି । ସ୍କୁଲରେ ପ୍ରଥମ ହେଉଥିଲେ ଦ୍ରେପଦୀ । ସ୍କୁଲରେ ମନିଟର ଥିଲେ, ଖେଳକୁଦରେ ବେଶ ପାରଙ୍ଗମ ଥିଲେ । ବିଶେଷ କରି ଅତି ସୁନ୍ଦର ଭାବେ ଦ୍ରୌପଦୀ ପ୍ରାର୍ଥନା ବୋଲୁଥିଲେ । ଥରେ ଖରସ୍ରୋତା ନାଳରେ ପହଁରି ଦ୍ରେପଦୀ କେମିତି ସ୍କୁଲ ଆସିଥିଲେ ତାହା ବର୍ଣ୍ଣନା କରିଛନ୍ତି ଦ୍ରୌପଦୀଙ୍କ ଶିକ୍ଷକ ବାସୁଦେବ ବେହେରା । ଆଜି ସେହି ଛାତ୍ରୀ ରାଷ୍ଟ୍ରପତି ହୋଇଥିବାରୁ ଶିକ୍ଷକ ଜନ୍ମ ସାର୍ଥକ ହୋଇଗଲା ବୋଲି ସେ କହିଛନ୍ତି ।

ସେହିପରି ଦୁଇ ପୁଅ ଲକ୍ଷ୍ମଣ, ସିପୁନ ଏବଂ ସ୍ୱାମୀ ଶ୍ୟାମଚରଣ ମୁର୍ମୁଙ୍କ ସ୍ମୃତିରେ ଏହି ଆବାସିକ ସ୍କୁଲ ନିର୍ମାଣ କରାଯାଇଛି । ତାଙ୍କ ସ୍ୱାମୀଙ୍କ ପ୍ରତିମୂର୍ତ୍ତିରେ ବି ଆଜି ଫୁଲମାଳ ଦେଇ ପୂଜାର୍ଚ୍ଚନା କରାଯାଇଛି । ତାସହ ଦ୍ରୌପଦୀ ରାଷ୍ଟ୍ରପତି ହେବାକୁ ଯାଉଥିବାରୁ ନାଚଗୀତ କରି ବିଭୋର ହୋଇଛନ୍ତି ପାହାଡ଼ପୁର SLS ସ୍କୁଲର ଛାତ୍ରଛାତ୍ରୀ ।

ତେବେ ଦିଲ୍ଲୀରୁ ପଲ୍ଲୀ ହେଉ କିମ୍ବା ରାଇରଙ୍ଗପୁରରୁ ରାଜଧାନୀ । ଆଜି ସମସ୍ତେ ବିଜୟ ଉତ୍ସବରେ ମସଗୁଲ । ଏବେ କେବଳ ଅପେକ୍ଷା, ଆସନ୍ତା ୨୫ ତାରିଖର ଶପଥ ଗ୍ରହଣ ଉତ୍ସବକୁ । ଯେଉଁଦିନ ଦେଶର ସର୍ବୋଚ୍ଚ ଆସନରେ ଅଳଙ୍କୃତ ହୋଇ ସାରା ଓଡ଼ିଶାକୁ ଆହୁରି ଗର୍ବିତ କରିବେ ଓଡ଼ିଆ ଝିଅ ଦ୍ରୌପଦୀ ମୁର୍ମୁ ।