LIVE TV
ରାଷ୍ଟ୍ରପତି ଭବନରୁ ରଘୁବର ଦାସଙ୍କ ନାଁରେ ମୋହର ପରେ ଝାଡ଼ଖଣ୍ଡ ବିଜେପିରେ ଖୁସିର ମାହୋଲ । ଓଡ଼ିଶାର ନୂଆ ରାଜ୍ୟପାଳ ଭାବେ ତାଙ୍କ ନାଁ ଘୋଷଣା ହେଉ ହେଉ ଜାମସେଦପୁର ସ୍ଥିତ ବାସଭବନରେ ଜମିଥିଲା ଶୁଭେଛୁଙ୍କ ଭିଡ଼ । ମିଠା ଖୁଆଇ ଏହି ମୁହୂର୍ତ୍ତକୁ ସେଲିବ୍ରେସନ କରିଥିଲେ ସମସ୍ତେ । ଏପଟେ ଆଜି ବଡ଼ ଭଉଣୀ, ରଘୁବୀରଙ୍କ ମଥାରେ ଚନ୍ଦନ, ସିନ୍ଦୁର ଲଗାଇ ଶୁଭ ମନାସି ଥିବା ବେଳେ ରଘୁବୀର ଭଉଣୀଙ୍କ ପାଦ ଛୁଇଁ ଆଶୀର୍ବାଦ ନେଇଥିଲେ । ଝାଡ଼ଖଣ୍ଡ ବିଜେପି ଟିମ୍ ମଧ୍ୟ ରଘୁବରଙ୍କୁ ଶୁଭେଛା ଓ ଅଭିନନ୍ଦନ ଜଣାଇଛି ।
ତେବେ ଜାମସେଦପୁର ଟାଟା ଷ୍ଟିଲ କଂପାନୀର ଜଣେ ସାଧାରଣ ଶ୍ରମିକରୁ ଝାଡ଼ଖଣ୍ଡର ମୁଖ୍ୟମନ୍ତ୍ରୀ ଓ ଏବେ ଓଡ଼ିଶାର ରାଜ୍ୟପାଳ ହେବା ରଘୁବରଙ୍କ ପାଇଁ ଏତେ ସହଜ ନଥିଲା । ୧୯୭୭ରେ ସେ ପ୍ରଥମେ ଜନତା ଦଳ, ପରେ ୧୯୮୦ରେ ବିଜେପିରେ ଯୋଗ ଦେଇଥିଲେ । ୫ ଥର ବିଧାୟକ ହେବା ସହ ମନ୍ତ୍ରୀ, ଉପମୁଖ୍ୟମନ୍ତ୍ରୀ ଏବଂ ପରେ ୨୦୧୪ରୁ ୧୯ ଯାଏଁ ଝାଡ଼ଖଣ୍ଡର ମୁଖ୍ୟମନ୍ତ୍ରୀ ହୋଇଥିଲେ । ଦୁଇଥର ଝାଡ଼ଖଣ୍ଡ ବିଜେପିର ରାଜ୍ୟ ସଭାପତି ରହିବା ସହିତ ଏବେ ବିଜେପିର ରାଷ୍ଟ୍ରୀୟ ଉପାଧ୍ୟକ୍ଷ ଅଛନ୍ତି ।
Also Read
ଓଡ଼ିଶାର ରାଜ୍ୟପାଳ ଭାବେ ନିଯୁକ୍ତ ହେବା ପରେ ରଘୁବର କହିଛନ୍ତି, ପ୍ରଧାନମନ୍ତ୍ରୀ ମୋଦି ଟିମ୍ ଇଣ୍ଡିଆକୁ ନେଇ କାମ କରୁଛନ୍ତି । ସଂଘୀୟ ବ୍ୟବସ୍ଥା ଅନୁସାରେ ସେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ସମନ୍ୱୟ ରଖି କାମ କରିବେ ।
ରଘୁବର ବିଜେପିର ଜଣେ ତୃଣମୂଳ ସ୍ତରର ନେତା ସହିତ ଦଳର ଜଣେ ହୋର୍ଡକୋର୍ ସଦସ୍ୟ ରହିଆସିଛନ୍ତି । ତେବେ ରାଜ୍ୟପାଳ ଭାବେ କିଭଳି ରହିବ ତାଙ୍କ କାର୍ଯ୍ୟଧାରା ? ଆଗକୁ ନିର୍ବାଚନ ଥିବାରୁ କଣ ହେବ ରଘୁବରଙ୍କ ଭୂମିକା ? ରାଜ୍ୟ ସରକାରଙ୍କ ସହ ସମନ୍ୱୟ ରକ୍ଷା କରି କାମ କରିବେ ନା ନିଜ କ୍ଷମତାର ଉପଯୋଗ କରି ସରକାରଙ୍କୁ ଅଡୁଆରେ ପକାଇବେ ? ଅନ୍ୟ କିଛି ରାଜ୍ୟରେ ଯେମିତି ରାଜ୍ୟପାଳ ଓ ରାଜ୍ୟ ସରକାର ଭିତରେ ବିବାଦ ଲାଗି ରହିଛି ସେମିତି ସ୍ଥିତି ଉପୁଜିବ ନାହିଁ ତ, ତାକୁ ନେଇ ଚର୍ଚ୍ଚା ଆରମ୍ଭ ହୋଇଛି ।
ବର୍ତ୍ତମାନର ରାଜ୍ୟପାଳ ପ୍ରଫେସର୍ ଗଣେଶୀ ଲାଲ୍ଙ୍କର କାର୍ଯ୍ୟକାଳ ଗତ ମେ ମାସରେ ଶେଷ ହୋଇଥିଲା । ହେଲେ ନୂଆ ରାଜ୍ୟପାଳ ନିଯୁକ୍ତ ହୋଇନଥିବାରୁ ସେ ଏହି ଦାୟିତ୍ୱରେ ରହିଥିଲେ । ତେବେ ଗଣେଶୀ ଲାଲ ନିଜ ୫ ବର୍ଷ ୫ ମାସ କାର୍ଯ୍ୟକାଳ ସମୟରେ ବେଶ୍ ଲୋକପ୍ରିୟତା ଅର୍ଜନ କରିଛନ୍ତି । ଏବେ ସମସ୍ତଙ୍କ ନଜର ନୂଆ ରାଜ୍ୟପାଳ ରଘୁବର ଦାସଙ୍କ ଉପରେ ।
- Reported by:
- HARIHARA CHAND
