Odisha Politics: ସୁଜାତା କାର୍ତ୍ତିକେୟନଙ୍କ VRS ପରେ, ସାଂଘାତିକ ଅଭିଯୋଗ ଆଣିଲେ ପିସିସି ସଭାପତି

ଭି.କେ. ପାଣ୍ଡିଆନଙ୍କ ପତ୍ନୀ ତଥା ଆଇଏଏସ ସୁଜାତା ରାଉତ କାର୍ତ୍ତିକେୟନଙ୍କ VRSକୁ ନେଇ ଏବେ ରାଜ୍ୟ ରାଜନୀତିରେ ଝଡ଼ । ପିସିସି ସଭାପତି ଦେଲେ ସାଂଘାତିକ ବୟାନ । ଆଜି ବିସ୍ଫୋରକ ବୟାନ ଦେଇ ବିଜେପି-ବିଜେଡି ସଂପର୍କରେ ପ୍ରଶ୍ନବାଚୀ ଲଗାଇଛନ୍ତି ପିସିସି ସଭାପତି ଭକ୍ତ ଦାସ । ଭି.କେ. ପାଣ୍ଡିଆନଙ୍କ ପତ୍ନୀ ସୁଜାତା ରାଉତ କାର୍ତ୍ତିକେୟନ VRS ଲାଗି କରିଥିବା ଆବେଦନକୁ ୨୭ ମାର୍ଚ୍ଚରେ ରାଜ୍ୟ ସରକାର କେନ୍ଦ୍ରକୁ ପଠାଇଥିଲେ । ମାତ୍ର ୨୪ ଘଣ୍ଟା ଭିତରେ ୨୮ ମାର୍ଚ୍ଚରେ ଏହାକୁ ମିଳି ଯାଇଥିଲା ଅନୁମୋଦନ । ଯେଉଁଥିରୁ ସ୍ପଷ୍ଟ ଯେ ଆଜି ବି ପାଣ୍ଡିଆନ୍ ବେଶ୍ ପାୱାରଫୁଲ୍ । ବିଜେପି-ବିଜେଡି ଭିତରେ ଗଭୀର ସଂପର୍କ ଅଛି ବୋଲି ସାଂଘାତିକ ଅଭିଯୋଗ କରିଛନ୍ତି ଭକ୍ତ ।

ସେପଟେ ବିଜେଡି ଭକ୍ତଙ୍କ ଏଭଳି ଅଭିଯୋଗକୁ ଖଣ୍ଡନ କରିଛି । କହିଛି ଭି.କେ. ପାଣ୍ଡିଆନ୍ କି ସୁଜାତା କୌଣସି ଦୁର୍ନୀତିରେ ନଥିଲେ, ଯେଉଁଥିପାଇଁ ଖୁବ୍ କମ୍ ଦିନରେ କେନ୍ଦ୍ର VRSକୁ ଅନୁମୋଦନ ଦେଇଛି । ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ ମଧ୍ୟ ପିସିସି ସଭାପତିଙ୍କ ଅଭିଯୋଗକୁ ଖଣ୍ଡନ କରି କହିଛନ୍ତି, କିଏ ମିଶିକି ଅଛନ୍ତି ତାହା ଗଲା ୨୭ ତାରିଖ କଂଗ୍ରେସର ବିକ୍ଷୋଭ ବେଳେ ହୋଇଥିବା ହିଂସାକାଣ୍ଡରୁ ସ୍ପଷ୍ଟ ହେଉଛି ।

ଅଧିକ ପଢ଼ନ୍ତୁ: ସାଙ୍ଗ ହୋଇ ଫେରିଲେ ନବୀନ ଓ ପାଣ୍ଡିଆନ୍, ଯାଇଥିଲେ ରାଜ୍ୟ ବାହାରକୁ

କିଛି ଦିନ ତଳେ ବିଧାନସଭାରେ ପଞ୍ଚାୟତିରାଜ ବିଭାଗର ଖର୍ଚ୍ଚ ଦାବି ଆଲୋଚନା ସମୟରେ ବିଭାଗୀୟ ମନ୍ତ୍ରୀ ସୁଜାତାଙ୍କ ନାଁ ନେଇ ଟାର୍ଗେଟ୍ କରିଥିଲେ । ମନ୍ତ୍ରୀ କହିଥିଲେ ବିଜେଡି ସରକାର ସମୟରେ ପଞ୍ଚାୟତିରାଜ ବିଭାଗକୁ ସୁଜାତାଙ୍କ ପାଖରେ ସମର୍ପି ଦିଆଯାଇଥିଲା । ଅନ୍ୟପଟେ ପ୍ରଶ୍ନ ଉଠୁଛି ସୁଜାତା କାହିଁକି ସ୍ବାମୀଙ୍କ ପଦାଙ୍କ ଅନୁସରଣ କରି VRS ନେଲେ ? ଯଦିଓ ଓଟିଭିକୁ ନିଜ ପ୍ରତିକ୍ରିୟାରେ ସୁଜାତା କହିଛନ୍ତି, ସେ ରାଜନୀତି କୁ ଆସିବେ ନାହିଁ, ତେବେ ତରବରିଆ ଭାବେ VRS ନେବା ପଛର ଅସଲ କାରଣ କଣ ହୋଇପାରେ? କାହିଁକି ନୋଟିସ ପିରିୟଡରେ ରହିଲେ ନାହିଁ ଏହି ୨୦୦୦ ବ୍ୟାଚର ଆଇଏଏସ?

୬ ମାସିଆ ଛୁଟିରୁ ଫେରି ଅର୍ଥ ବିଭାଗ ସ୍ବତନ୍ତ୍ର ସଚିବ ଭାବେ କାର୍ଯ୍ୟରେ ଯୋଗ ଦେଇଥିଲେ । ତେବେ କଣ ଏମିତି ସ୍ଥିତି ହେଲା ଯେ ନୂଆ ସରକାର ସହିତ ଖାପ ଖୁଆଇ ପାରିଲେନି ସୁଜାତା? ୨୪ ବିପର୍ଯ୍ୟୟ ପରେ ବିଜେଡିରେ ଗୋଷ୍ଠୀ କନ୍ଦଳ ତୀବ୍ର । ଆଉ ଗୋଷ୍ଠୀ କନ୍ଦଳ ପାଇଁ ଦଳର ଅନେକ ନେତା ପାଣ୍ଡିଆନ ହିଁ ମୂଳ କାରଣ ବୋଲି କହୁଛନ୍ତି । କାରଣ ନବୀନଙ୍କ ସହିତ ପାଣ୍ଡିଆନ୍ ଛାଇ ଭଳି ରହୁଛନ୍ତି । ଆଉ ଦଳର ସବୁ ନିଷ୍ପତ୍ତି ବି ଏକ ପ୍ରକାର ତାଙ୍କ ହାତରେ ।

ସେପଟେ କିଛି ପରାଜିତ ବିଜେଡି ନେତା ପାଣ୍ଡିଆନ୍ ଓ ସୁଜାତାଙ୍କୁ ଭୂରି ଭୂରି ପ୍ରସଂଶା କରୁଛନ୍ତି । ଗତକାଲି ପୂର୍ବତନ ମନ୍ତ୍ରୀ ଅତନୁ ସବ୍ୟସାଚୀ ନାୟକ ନିଜ ସୋସିଆଲ୍ ମିଡିଆ ସାଇଟରେ ସୁଜାତାଙ୍କୁ ଜଣେ ଦକ୍ଷ ପ୍ରଶାସନିକ ଅଧିକାରୀ ଭାବେ ବର୍ଣ୍ଣନା କରିଥିଲେ । ଏଣେ ଶଙ୍ଖ ଭବନରେ ଆୟୋଜିତ ଓଡ଼ିଶା ଦିବସ ଉତ୍ସବରେ ନବୀନଙ୍କ ଆଗରେ ପୁଣି ବିଷ ଓଗାଳିଛନ୍ତି ବରିଷ୍ଠ ନେତା ଅଶୋକ ପଣ୍ଡା । ଗୋଟିଏ ପଟେ ପାଣ୍ଡିଆନଙ୍କୁ ଦଳ ଭିତରୁ ପ୍ରବଳ ବିରୋଧ, ଆଉ ଅନ୍ୟପଟେ କିଛି ନେତାଙ୍କ ସମର୍ଥନ ।

ଏହାରି ଭିତରେ ପାଣ୍ଡିଆନ୍ ଦମ୍ପତିଙ୍କ ଭବିଷ୍ୟତକୁ ନେଇ ସାଧାରଣରେ ପ୍ରଶ୍ନ ଉଠିଛି । ନିର୍ବାଚନ ସମୟରେ ମିଶନ୍ ଶକ୍ତି ସଚିବ ଥିବା ସୁଜାତାଙ୍କୁ ନିର୍ବାଚନ କମିଶନଙ୍କ ଛାଟ ବାଜିବାପରେ ତାଙ୍କୁ ଅର୍ଥ ବିଭାଗକୁ ବଦଳି କରାଯାଇଥିଲା । ଆଉ ଏବେ VRS ପରେ ସୁଜାତାଙ୍କ ଆଗାମୀ ପଦକ୍ଷେପ କଣ ରହୁଛି, ତା'ଉପରେ ସମସ୍ତଙ୍କ ନଜର ।

ଅଧିକ ପଢ଼ନ୍ତୁ: କାହିଁକି ଭିଆରଏସ୍ ନେଲେ ପାଣ୍ଡିଆନଙ୍କ ପତ୍ନୀ ? ରାଜନୀତି କରିବେ ନା ଓଡ଼ିଶା ଛାଡ଼ିବେ ?