‘ବିଜେଡିରେ କେବଳ ମୁଖ୍ୟମନ୍ତ୍ରୀଙ୍କ ଟିକେଟ୍‌ କନ୍‌ଫର୍ମ, ବାକି ସେ ଯାହାକୁ ଟିକେଟ୍‌ ଦେବେ’

ବିଜେଡିରେ କେବଳ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଟିକେଟ୍‌ କନ୍‌ଫର୍ମ । ବାକି ସେ ଯାହାକୁ ଟିକେଟ୍‌ ଦେବେ । ଗତକାଲି ସମ୍ବଲପୁରରେ ହୋଇଥିବା ଦଳର ଏକ ରୁଦ୍ଧଦ୍ୱାର ବୈଠକରେ ବିଜେଡି ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସ ଏହି ସୂଚନା ଦେଇଥିବା କୁହାଯାଉଛି । ବୈଠକରେ ଉପସ୍ଥିତ ଥିବା ବିଜୁ ଛାତ୍ର ଜନତା ଦଳ ସମ୍ବଲପୁର ଜୋନର ସଭାପତି ମିଲନ ହୋତା ଏନେଇ ଚର୍ଚ୍ଚା ହୋଇଥିବା ସୂଚନା ଦେଇଛନ୍ତି ।

ଆଗାମୀ ନିର୍ବାଚନ ପାଇଁ ଦଳର ଟିକେଟ୍‌ ନେଇ ମନ୍ତ୍ରୀ, ବିଧାୟକ ମାନେ ଚର୍ଚ୍ଚା କରୁଥିବା ବେଳେ ଏହା ଉପରେ ବିରାମ ଲଗାଇବାକୁ ପ୍ରଣବ ଏଭଳି କହିଥିବା ଆଲୋଚନା ହେଉଛି । ଗତକାଲି ବୈଠକ ବେଳେ ମୋବାଇଲ ବନ୍ଦ କରବାକୁ କହିଥିଲେ ପ୍ରଣବ । ଏହା ଘର କଥା ବୋଲି ମଧ୍ୟ କହିଥିଲେ । ଯାହାକୁ ନେଇ ଏବେ ଚର୍ଚ୍ଚା ହେଉଛି।

ଅନ୍ୟପକ୍ଷେ, ୨୦୨୪ ନିର୍ବାଚନରେ ପୁରୀରୁ ଲଢିବେ କି ନବୀନ ? ଏ ପ୍ରସଙ୍ଗରେ ଚର୍ଚ୍ଚା ଭିତରେ ପ୍ରତିକ୍ରିୟା ରଖିଛି ବିଜେଡି । ଦଳର ବରିଷ୍ଠ ନେତା ଶଶିଭୂଷଣ ବେହେରା କହିଛନ୍ତି, ‘ନବୀନ ପଟ୍ଟନାୟକ ଯେକୌଣସି ସ୍ଥାନ ପାଇଁ ପ୍ରାର୍ଥୀ ହୋଇପାରନ୍ତି । ସେ କେଉଁଠୁ ଲଢିବେ, ତାହା ନବୀନ ବାବୁଙ୍କ ନିଜସ୍ୱ ନିଷ୍ପତ୍ତି ।’ ତେବେ ପୁରୀ ଲୋକଙ୍କ ମନରୁ ସ୍ୱତଃ ପ୍ରବୃତ୍ତ ଭାବେ ଏକଥା ଆସିଥିବା ଶଶି କହିଛନ୍ତି ।

ନବୀନ ପଟ୍ଟନାୟକ ପୁରୀରୁ ନିର୍ବାଚନ ଲଢିବା ନେଇ ବିଜେଡି ନେତା ତଥା ବରିଷ୍ଠ ଦଇତାପତି ସେବାୟତ ରାମକୃଷ୍ଣ ଦାସମହାପାତ୍ର କହିବା ପରେ ଚର୍ଚ୍ଚା ଜୋର ଧରିଥିଲା । ରାମକୃଷ୍ଣ ଦାସମହାପାତ୍ର କହିଥିଲେ ଯେ, ମୁଖ୍ୟମନ୍ତ୍ରୀ ଜଗନ୍ନାଥ ଧାମରୁ ନିର୍ବାଚନ ଲଢିଲେ ଦଳମତ ନିର୍ବିଶେଷରେ ସମସ୍ତେ ସ୍ୱାଗତ କରିବେ।