'ସରକାର ରୋକ୍‌ ଲଗାନ୍ତୁ, ନଚେତ୍‌ ପରିଣାମ ଭଲ ହେବନି'

ବାଲିଅନ୍ତାରେ ବେଆଇନ ବାଲି ଚାଲାଣକୁ ନେଇ ବର୍ଷିଲେ ସାଂସଦ ଅପରାଜିତା ଷଡ଼ଙ୍ଗୀ । ଜୟଦେବ ବିଧାନସଭା କ୍ଷେତ୍ରର ବାଲିପାଟଣା ଓ ବାଲିଅନ୍ତା ବ୍ଲକର କୁଆଖାଇ ଓ କୁଶଭଦ୍ରା ନଦୀରେ ବେଆଇନଭାବେ ବାଲି ଉଠାଣ ଚାଲିଛି । ଏଥିରେ ପ୍ରଭାବଶାଳୀ ନେତାଙ୍କ ହାତଥିବା ଅଭିଯୋଗ କରିଛନ୍ତି ସାଂସଦ ଅପରାଜିତା ଷଡଙ୍ଗୀ ।

ଅପରାଜିତା ଅଭିଯୋଗ କରିଛନ୍ତି ଯେ, ଲିଜ୍‌ଧାରୀ ବାଲି ଉଠାଣ ବେଳେ ନୀତି ନିୟମ ମାନୁ ନାହାନ୍ତି । ସବୁ ନୀତିନିୟମକୁ ଜଳାଞ୍ଜଳି ଦେଇ ବାଲି ଖନନ ଓ ଚାଲାଣ କରାଯାଉଛି । ଜେସିବି ଲଗାଇ ଓ ରାତିରେ ବେଆଇନ ଭାବେ ଖନନ ଓ ଚାଲାଣ ଚାଲିଛି । ବେଆଇନ ବାଲି ଚାଲାଣ ପଛରେ ଜଣେ ପ୍ରଭାବଶାଳୀ ରାଜନେତାଙ୍କ ସଂପୃକ୍ତି ରହିଛି ।

ସମ୍ପୃକ୍ତ ରାଜନେତା ଲିଜ୍‌ଧାରୀଙ୍କ ଫାର୍ମ ହାଉସକୁ ଯାଉଛନ୍ତି ବୋଲି ଅପରାଜିତା ଅଭିଯୋଗ କରିଛନ୍ତି । ବେଆଇନ ବାଲି ଚାଲାଣକୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ବଢ଼ୁଛି, ସରକାର ରୋକ୍ ଲଗାନ୍ତୁ  ନଚେତ ପରିଣାମ ଭଲ ହେବନି ବୋଲି ଅପରାଜିତା କହିଛନ୍ତି । ଅପରାଜିତାଙ୍କ ଅଭିଯୋଗ ନେଇ ଜିଲ୍ଲା ପ୍ରଶାସନର ପ୍ରତିକ୍ରିୟା ମିଳିପାରିନାହିଁ ।