ଅଢ଼େଇ ଦଶନ୍ଧି ଧରି ଶାସନର ମଙ୍ଗ ମୁଖ୍ୟମନ୍ତ୍ରୀଙ୍କ ହାତରେ, ତଥାପି ବଦଳିନି ହିଞ୍ଜିଳି; କଣ୍ଟାବାଞ୍ଜିକୁ ନେଇ ପ୍ରଶ୍ନ

ନବୀନଙ୍କ ୨୪ ବର୍ଷର ଶାସନ ପରେ ବି ଭୋକର ଭୂଗୋଳ ଭିତରେ ଦି’ମୁଠା ଦାନା ପାଇଁ ଦାଦନ ଯାଉଛି ଗରିବ ଖଟିଖିଆ ମଣିଷ । ସେ ଗଞ୍ଜାମ ହେଉ ଅବା ବଲାଙ୍ଗିର । ଆଜି ବି ଦାଦନ ଦହନରେ ଜଡ଼ସଡ଼ । ସଂଯୋଗର କଥା ହେଉଛି, ଚଳିତ ନିର୍ବାଚନରେ ଏହି ୨ ଜିଲ୍ଲାର ମଙ୍ଗ ଧରିବାକୁ ଯାଉଛନ୍ତି ନିଜେ ମୁଖ୍ୟମନ୍ତ୍ରୀ । ତେବେ କ’ଣ ବଦଳିଯିବ ଦାଦନର ଏହି ପେଣ୍ଠସ୍ଥଳୀର ଭାଗ୍ୟ ?

ଉତ୍କଟ ଦାଦନ ସମସ୍ୟାକୁ ନେଇ ଛଟପଟ ବଲାଙ୍ଗିର ଜିଲ୍ଲା ଦେଖିବ ତ ବିକାଶର ନୂତନ ସୂର୍ଯ୍ୟୋଦୟ ? ବର୍ଷ ବର୍ଷ ଧରି ଭୋଟ୍ ଦେଇ ଆସୁଛନ୍ତି, କିନ୍ତୁ ପରିବର୍ତ୍ତନ ହୋଇପାରୁନି ଏମାନଙ୍କ ଭାଗ୍ୟ । ଯାହାଙ୍କ ଭୋଟ୍ ବଳରେ ମୁଖ୍ୟମନ୍ତ୍ରୀ ବନିଯାଉଛନ୍ତି ନେତା, ଅଥଚ ମୌଳିକ ସୁବିଧା ସାତ ସପନ । ରାଜ୍ୟ ରାଜନୀତିର ବହୁଚର୍ଚ୍ଚିତ ଜିଲ୍ଲା ଗଞ୍ଜାମର ହିଞ୍ଜିଳି ନିର୍ବାଚନମଣ୍ଡଳୀ ।

ଆଜିକୁ ପ୍ରାୟ ଅଢ଼େଇ ଦଶନ୍ଧି ଧରି ଶାସନର ମଙ୍ଗ ଧରିଛନ୍ତି ନିଜେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କିନ୍ତୁ ଆଜି ବି ଦାନା ପାଇଁ ଦାଦନ ଯାଉଛନ୍ତି ଲୋକେ । ଆଜି ବି କାମଧନ୍ଧା ଅଭାବରୁ ହାତ ବାନ୍ଧି ବସି ରହିଛନ୍ତି ସମସ୍ତେ । ହିଞ୍ଜିଳି ବ୍ଲକ ବୁରୁପଡ଼ା ପଞ୍ଚାୟତ । କୁହାଯାଉଛି, ଏହି ଗୋଟିଏ ପଞ୍ଚାୟତରୁ ହିଁ ୨ ଶହରୁ ଅଧିକ ଲୋକ ରାଜ୍ୟ ବାହାରକୁ ଦାଦନ ଖଟିବାକୁ ଯାଇଛନ୍ତି ।

Also Read

ଭାରତ ଫେରିଲେ ଇସ୍ରାଏଲ୍ ଜାହାଜରେ ବନ୍ଦୀ ଥିବା ମହିଳା, ବାକି ୧୬ଜଣଙ୍କୁ ଆଣିବାକୁ ପ୍ରୟାସ

Read More

କେଜ୍ରିୱାଲଙ୍କୁ ମିଳିବ କି ‘ୱାର୍କ ଫ୍ରମ୍‌ ଜେଲ୍‌’ ଅନୁମତି, ହାଇକୋର୍ଟରେ କଲେ ଗୁହାରୀ

Read More

ଆମୀରଙ୍କ ପରେ ରଣବୀରଙ୍କ ପାଳି, ଭାଇରାଲ ହେଲା ଡିପଫେକ୍ ଭିଡିଓ

Read More

କାହା ଘର ପୁରୁଷ ଶୂନ୍ୟ ତ ଆଉ କାହା ଘରେ ତାଟି କବାଟ ପଡ଼ିଛି । କେବଳ ଯାହା ଭାଗ୍ୟକୁ ଆଦରି ପଡ଼ିରହିଛନ୍ତି ଏମାନେ । କେବଳ ଗୋଟିଏ ପଞ୍ଚାୟତ ନୁହଁ, ହିଞ୍ଜିଳି ନିର୍ବାଚନମଣ୍ଡଳୀ ସାରା ଏଭଳି ଦୁର୍ଦ୍ଦଶାର ଅଭିଯୋଗ ଆଣିଛନ୍ତି ଲୋକେ । ତେବେ ଏନେଇ ପ୍ରଶାସନ ପକ୍ଷରୁ ପ୍ରତିକ୍ରିୟା ମିଳିପାରିନି ।

୨୦୦୦ରୁ ଆଜି ଯାଏଁ, ୨୪ ବର୍ଷ ଧରି ଦାଦନ ପ୍ରବଣ ଗଞ୍ଜାମ ଜିଲ୍ଲା ହିଞ୍ଜିଳି ନିର୍ବାଚନମଣ୍ଡଳୀର କ୍ରମାଗତ ପ୍ରତିନିଧିତ୍ୱ କରିଆସୁଛନ୍ତି ନିଜେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଉ ଏବେ ଉତ୍କଟ ଦାଦନ ଦହନରେ ଜଡ଼ସଡ଼ ବଲାଙ୍ଗିର ଜିଲ୍ଲା କଣ୍ଟାବାଞ୍ଜିକୁ ନବୀନ ପୁଣି ବାଛିଛନ୍ତି ପ୍ରତିନିଧିତ୍ୱ ପାଇଁ । ଦଳୀୟ କର୍ମୀ ଓ ନେତା ବି ଉତ୍ସାହିତ ଅଛନ୍ତି ।

ହେଲେ ଯେଉଁ ଗାଁରେ ଆଜି ବି ଅଭାବୀର ଅନ୍ଧାର ଗ୍ରାସିଛି, ସେହି ଗାଁରେ କିନ୍ତୁ ସରାଗ ନାହିଁ । ଏହି ଯେମିତି ମୁରିବାହାଲ ବ୍ଳକ ଇଛାପଡା ପଞ୍ଚାୟତ କତରଲଗା ଗାଁ । ସେ ଗାଁରେ ତାଟିକବାଟ ବନ୍ଦ ରହିଛି । ଯେଉଁ ଘରେ ଲୋକ ଅଛନ୍ତି, ପରିଣତ ବୟସରେ ସେମାନେ ଯାହା ଘରକୁ ଜଗି ରହିଛନ୍ତି । ଏହି ଗାଁରେ ଭୋଟର୍ ସଂଖ୍ୟା ୪୫୦ । କିନ୍ତୁ ଅଛନ୍ତି ପ୍ରାୟ ଶହେ ଜଣ ।

୩୫୦ରୁ ଅଧିକ ଭୋଟର ରାଜ୍ୟ ବାହାରକୁ ଯାଇଛନ୍ତି ଦାଦନ ଖଟି । କେବଳ କତରଲଗା ନୁହଁ, କଣ୍ଟାବାଂଜି ନିର୍ବାଚନ ମଣ୍ଡଳୀର ପ୍ରାୟ ୫୦ ହଜାର ଭୋଟର୍ ଆଜି ବି ବନ୍ଧା ପଡ଼ିଛନ୍ତି ରାଜ୍ୟ ବାହାରର ଇଟାଭାଟିରେ । ପ୍ରଶ୍ନ ଉଠୁଛି, ୨୪ ବର୍ଷର ସ୍ଥିର ଶାସନ କାଳରେ ଗଞ୍ଜାମ ହିଞ୍ଜିଳିର ଭାଗ୍ୟ ବଦଳେଇ ପାରିନଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କଣ୍ଟାବାଞ୍ଜିରୁ ପ୍ରତିନିଧିତ୍ୱ କରି ବଲାଙ୍ଗିର ଜିଲ୍ଲାକୁ ଦାଦନ ମୁକ୍ତ କରିପାରିବେ ତ ?

ଦାଦନଗଡ଼ ଏବଂ ରାଜ୍ୟର ଅନ୍ୟତମ ପଛୁଆ ଜିଲ୍ଲା ଭାବେ ପରିଗଣିତ ବଲାଙ୍ଗିରର ସାମଗ୍ରିକ ରୂପରେଖ ବଦଳାଇବାରେ କେତେ ସକ୍ଷମ ହେବେ ନବୀନ ? ନିର୍ବାଚନୀ ପ୍ରଚାର ବେଳେ ଦାଦନ ପ୍ରସଙ୍ଗକୁ ମୁଦ୍ଦା କରି ଭୋଟ୍ ହାତେଇବା ପରେ ବିଜେପୁର ଭଳି କଣ୍ଟାବାଞ୍ଜିବାସୀଙ୍କ ହାତ ଛାଡ଼ିଦେବେନି ତ ମୁଖ୍ୟମନ୍ତ୍ରୀ ?