ସ୍ଲିପ୍ ଅଫ୍ ଟଙ୍ଗ୍ ପାଇଁ କ୍ଷମାପ୍ରାର୍ଥନା ଓ ପ୍ରାୟଶ୍ଚିତ ସତ୍ତ୍ୱେ ସମ୍ବିତଙ୍କୁ ଘେରି ଚାଲିଛି BJD

ଭୁଲ୍ ମାଗିଲେ, କ୍ଷମା ପ୍ରାର୍ଥନା କଲେ, ପଶ୍ଚାତାପ କରିବେ ବୋଲି କହିଲେ... ବିଜେପିର ପୁରୀ ଲୋକସଭା ପ୍ରାର୍ଥୀ ସମ୍ବିତ ପାତ୍ରଙ୍କ ମୁହଁରୁ ଖସି ଯାଇଥିବା ଏକ ମନ୍ତବ୍ୟକୁ ନେଇ ଉଠୁଛି ପଡ଼ୁଛି ରାଜନୀତି । ଗତକାଲି ସକାଳେ ପୁରୀରେ ମୋଦିଙ୍କ ରୋଡ୍ ଶୋ’ପରେ ପ୍ରଧାନମନ୍ତ୍ରୀ ମୋଦି ମହାପ୍ରଭୁ ଜଗନ୍ନାଥଙ୍କ ଭକ୍ତ ବଦଳରେ ଭୁଲବଶତଃ ଜଗନ୍ନାଥ ମୋଦିଙ୍କ ଭକ୍ତ ବୋଲି ଏକ ଘରୋଇ ଓଡ଼ିଆ ନ୍ୟୁଜ୍ ଚ୍ୟାନେଲକୁ କହିଦେବା ପରେ ସୃଷ୍ଟି ହୋଇଥିଲା ବିସ୍ଫୋରକ ସ୍ଥିତି ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କଠାରୁ ଆରମ୍ଭ କରି, ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ, କଂଗ୍ରେସ୍ ସଭାପତି ମଲ୍ଲିକାର୍ଜୁନ ଖଡଗେଙ୍କ ଭଳି ନେତା ସୋସିଆଲ୍ ମିଡିଆରେ ଏଭଳି ବକ୍ତବ୍ୟକୁ କଡ଼ାକୁ ସମାଲୋଚନା କରିଥିଲେ । ଏହାପରେ ନିଜ ଦ୍ୱାରା ହୋଇଥିବା ଭୁଲକୁ ସ୍ୱୀକାର କରି ସମ୍ବିତ କହିଛନ୍ତି, ସେ ଯାହା କହିଛନ୍ତି ତାହା ବଡ଼ ଭୁଲ । ସ୍ଲିପ୍ ଅଫ୍ ଟଙ୍ଗ୍ ।

ଏହି ଭୁଲର ପଶ୍ଚାତାପ ପାଇଁ ୩ ଦିନ ଯାଏଁ ଉପବାସ ରଖିବେ ବୋଲି କହିଛନ୍ତି । ସମ୍ବିତ ତ ଭୁଲ୍ ମାଗିଲେ, ପ୍ରାୟଶ୍ଚିତ କରିବେ ବୋଲି କହିଲେ । ହେଲେଏହାପୂର୍ବରୁ ମହାପ୍ରଭୁଙ୍କୁ ନେଇ ଅନେକ ଅରୁଚିକର ମନ୍ତବ୍ୟ ଦେଇଥିବା ନେତା କିନ୍ତୁ କୌଣସି ପଶ୍ଚାତାପ କରିନାହାନ୍ତି । ୨୦୨୨ରେ ମନ୍ତ୍ରୀ ପ୍ରତାପ ଦେବଙ୍କ ଅଲଗା ଥିଓରୀ ଥିଲା ।

ବିଜେଡିର ଏକ କାର୍ଯ୍ୟକ୍ରମରେ ଖୋଲାଖୋଲି ଭାବେ ପ୍ରତାପ ଦେବ କହିଥିଲେ, ସାଢ଼େ ୪ କୋଟି ଓଡ଼ିଆଙ୍କ ପରିଚୟ ପୂର୍ବରୁ ଜଗନ୍ନାଥ ଥିଲେ, ହେଲେ ଏବେ ନବୀନ ପଟ୍ଟନାୟକ । ଖାଲି ସେ ନୁହଁନ୍ତି, ସୋସିଆଲ୍ ମିଡିଆରେ ବିଜେଡି ସାଂସଦ ଅମର ପଟ୍ଟନାୟକଙ୍କ କଥା ମଧ୍ୟ ଭାଇରାଲ୍ ହେଉଛି । ସେ କହିଛନ୍ତି... କାଳେ ନବୀନ ପଟ୍ଟନାୟକ ହିଁ ଜଗନ୍ନାଥ ।

ସେପଟେ ଓଡ଼ିଆ ଅସ୍ମିତା, ସଂସ୍କୃତି କଥା କହି ଭୋଟ୍ ମାଗୁଥିବା ବିଜେଡି ନେତା ଭିକେ ପାଣ୍ଡିଆନ ବି କିଛିଦିନ ତଳେ ଓଡ଼ିଶାର ବରପୁତ୍ରଙ୍କୁ ଅସମ୍ମାନ କରିଥିଲେ । ସମ୍ବଲପୁରରେ ଏକ ନିର୍ବାଚନୀ ସଭାରେ ସ୍ୱଭାବ କବି ଗଙ୍ଗାଧର ମେହେରଙ୍କୁ ସନ୍ଥ କବି କହି ସମ୍ବୋଧନ କରିଥିଲେ ପାଣ୍ଡିଆନ୍ । ଖାଲି ଭୁଲ ସମ୍ବୋଧନ କରିଥିଲେ ତା ନୁହେଁ, ଏହାକୁ ପରେ ସୁଧାରି ବି ନଥିଲେ ।

ଭାଷଣକୁ ନେଇ ବିବାଦ ହେବା ପରେ ବି ଭୁଲ୍ ମାଗିନଥିଲେ ପାଣ୍ଡିଆନ। ବାରମ୍ବାର ଜଗନ୍ନାଥଙ୍କୁ ଅପମାନ କରିବା ଏବଂ ଓଡ଼ିଆ ବରପୁତ୍ରଙ୍କୁ ଅସମ୍ମାନ ବିଜେଡି ନେତାଙ୍କ ସତେ ଯେପରି ଏକ ଅଭ୍ୟାସ ପାଲଟିଛି । ହେଲେ ରୋଚକ କଥା ହେଉଛି ଏହା ସବୁ ଯେପରି କଂଗ୍ରେସକୁ ଦେଖାଯାଉନାହିଁ ।

ସେପଟେ ସମ୍ବିତ ଖୋଲାଖୋଲି ଭୁଲ୍ ମାଗିବା ପରେ ତାଙ୍କୁ ସମାଲୋଚନା କରୁଥିବା ବିଜେଡି ଦଳର ନେତା ନିଜ ଭାଷଣକୁ ନେଇ କେବେ ଭୁଲ ମାଗୁଛନ୍ତି, ତାକୁ ହିଁ ଅପେକ୍ଷା ।