ଆଶ୍ଚର୍ଯ୍ୟ ! ମୃତ୍ୟୁର ଦୁଇ ବର୍ଷ ପରେ ବିଜେଡି ମହିଳା କର୍ମକର୍ତ୍ତା ତାଲିକାରେ ମୀନାକ୍ଷୀଙ୍କ ନାଁ

ବିଜେଡି ମହିଳା କର୍ମକର୍ତ୍ତା ତାଲିକାରେ ମୃତ ତେତ୍ରୀଙ୍କ ନାଁ । ଦଳ ପକ୍ଷରୁ ଜାରି କରାଯାଇଥିବା ବିଜେଡି ମହିଳା କାର୍ଯ୍ୟକାରିଣୀ ତାଲିକାରେ ବ୍ରହ୍ମପୁରର ମୀନାକ୍ଷୀ ମିଶ୍ରଙ୍କ ନାଁ ସ୍ଥାନ ପାଇବାକୁ ନେଇ ଦଳ ଭିତରେ ଓ ବାହାରେ ଜୋରଦାର ଚର୍ଚ୍ଚା । କୁହାଯାଉଛି ଇଏ ହେଉଛନ୍ତି ବିଜେଡିର ସେଇ ଦିବଙ୍ଗତ ନେତ୍ରୀ, ଯିଏ ନିଜ ପୁଅର ସୁରକ୍ଷାକୁ ନେଇ ପୋଲିସ୍ ପାଖରୁ ନ୍ୟାୟ ନପାଇ ଆତ୍ମହତ୍ୟା କରିଥିଲେ ।

ଦୁଇବର୍ଷ ତଳେ ବ୍ରହ୍ମପୁର ଏସ୍‌ପିଙ୍କ କାର୍ଯ୍ୟାଳୟ ଆଗରେ ଆତ୍ମାହୁତି ଦେଇଥିଲେ ମୀନାକ୍ଷୀ ମିଶ୍ର । ଗତ ୨୦୨୦ ଫେବ୍ରୁଆରୀ ମାସରେ ଘଟିଥିବା ଏହି ସମ୍ବେଦନଶୀଳ ଘଟଣାକୁ ନେଇ ସେତେବେଳେ ସାରା ରାଜ୍ୟରେ ବେଶ୍ ହଇଚଇ ହୋଇଥିଲା । ତେବେ ମୀନାକ୍ଷୀଙ୍କ ମୃତ୍ୟୁର ଦୀର୍ଘ ଦୁଇ ବର୍ଷ ପରେ ସଦ୍ୟ ଘୋଷିତ ବିଜେଡି ମହିଳା କାର୍ଯ୍ୟକାରିଣୀ ସଦସ୍ୟ ତାଲିକାରେ ତାଙ୍କ ନାଁକୁ କିଭଳି ସାମିଲ କରାଗଲା ବୋଲି ପ୍ରଶ୍ନ କରି ବିଜେଡି ଉପରେ ଜୋରଦାର ହମ୍‌ଲା କରିଛି ବିଜେପି ।

ଦଳର ରାଜ୍ୟ କାର୍ଯ୍ୟକାରିଣୀ କମିଟି ସଦସ୍ୟ କାହ୍ନୁଚରଣ ପତି ଅଭିଯୋଗ କରିଛନ୍ତି ଯେ, ଯେମିତି ଭୂତଙ୍କ ନାଁରେ ଭତ୍ତା, ରାସନ୍ ବଣ୍ଟାଚାଲିଛିି, ଜଣେ ଦିବଙ୍ଗତ ନେତ୍ରୀଙ୍କ ନାଁକୁ ସଂଗଠନରେ ସ୍ଥାନ ଦିଆଯିବା ବି ସେହିଭଳି ଏକ ଘଟଣା । ତେବେ ବିଜେପିର ଏଭଳି ଅଭିଯୋଗ ନେଇ ବିଜେଡିର କୌଣସି ପ୍ରତିକ୍ରିୟା ମିଳିପାରିନାହିଁ ।