LIVE TV
ଉପନିର୍ବାଚନ ସରିବା ପରେ ଆଜି ପଦ୍ମପୁର ଗସ୍ତରେ ଯାଉଛନ୍ତି ନବୀନ ମୁଖ୍ୟମନ୍ତ୍ରୀ ପଟ୍ଟନାୟକ । ନିର୍ବାଚନ ସରିବା ପରେ ନବୀନଙ୍କ ଏହା ପ୍ରଥମ ଗସ୍ତ । ପଦ୍ମପୁରକୁ ଜିଲ୍ଲା ଘୋଷଣା କରିବା ପାଇଁ ବାରମ୍ବାର ଦାବି ହେବା ପରେ ନବୀନ ଏହାକୁ ପୂରଣ କରିବାକୁ ପଦ୍ମପୁରବାସୀଙ୍କୁ ପ୍ରତିଶ୍ରୁତି ଦେଇଥିଲେ । ତେଣୁ ଆଜି ନବୀନଙ୍କ ଗସ୍ତ ଥିବାରୁ ପୂରା ଅଂଚଳରେ ବଢିଲାଣି ଚର୍ଚ୍ଚା ।
ପଦ୍ମପୁର ନିର୍ବାଚନ ମଣ୍ଡଳିର ଝାରବନ୍ଧ, ପାଇକମାଳ ତଥା ପଦ୍ମପୁରର ତିନୋଟି ସ୍ଥାନରେ ସାଧାରଣସଭାରେ ଯୋଗ ଦେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଗତ କିଛିବର୍ଷ ଧରି ପଦ୍ମପୁରକୁ ଜିଲ୍ଲା ମାନ୍ୟତା ଦାବି ଜୋରଧରିଥିଲା । ମିଳିତ କ୍ରିୟାନୁଷ୍ଠାନ କମିଟିର ଆହ୍ୱାନରେ ବିଭିନ୍ନ ସଂଗଠନ ଏକଜୁଟ ବି ହେଲେ । ଖାଲି ଏକଜୁଟ ହେଲେନି ବରଂ ନବୀନଙ୍କୁ ବି ଭେଟିଲେ । ନିର୍ବାଚନ ଆଚରଣବିଧି ଲାଗିଥିବାରୁ ଦଳର ସୁପ୍ରିମୋ ହିସାବରେ ଜିଲ୍ଲା ଦାବିକୁ ନିର୍ବାଚନୀ ଏଜେଣ୍ଡାରେ ସ୍ଥାନ ଦେବେ ବୋଲି ପ୍ରତିଶ୍ରୁତି ଦେଇଥିଲେ । ଆଉ ଆଜି ଗସ୍ତ ଥିବାରୁ ନବୀନ କଣ କହିବେ ତାହା ଉପରେ ସମସ୍ତଙ୍କ ନଜର ରହିଛି ।
ନିର୍ବାଚନ ଘୋଷଣା ପୂର୍ବରୁ ରାଜ୍ୟସରକାର ପଦ୍ମପୁର ପାଇଁ ୪୫୦ କୋଟି ଟଙ୍କାର ପ୍ରକଳ୍ପ ଘୋଷଣା କରିଥିବା ବେଳେ ନିର୍ବାଚନ ପରେ ବି ୬ କୋଟି ଟଙ୍କାର ବିଭିନ୍ନ ପ୍ରକଳ୍ପକୁ ଅନୁମୋଦନ ଦେଇଥିଲେ ସରକାର । କିନ୍ତୁ ବିମାରାଶି ପ୍ରଦାନ, ଇନପୁଟ ସବସିଡି, ପାଇକମାଳକୁ ଏନ.ଏ.ସି. ମାନ୍ୟତା ପରି ଅନେକ ଦାବି ଏଯାଏଁ ପୂରଣ ହୋଇନି । କିନ୍ତୁ ଲୋକଙ୍କ ସବୁ ଦାବି ପୂରଣ ହେବ ବୋଲି ନେତାଏ ପ୍ରତିଶ୍ରୁତି ଦେଇଥିଲେ । ତେଣୁ ପ୍ରତିଶ୍ରୁତି କେତେ ପୂରଣ ହେବ ତାହା ଆଜିର ଗସ୍ତରୁ ପ୍ରମାଣିତ ହେବ । ତେବେ ନବୀନ ପଦ୍ମପୁର ପାଇଁ କଣ ଘୋଷଣା କରୁଛନ୍ତି ? କେତେ ପ୍ରତିଶ୍ରୁତି ପାଳନ କରୁଛନ୍ତି ତାହା ଆଉ କେହି ଘଂଟାରେ ଜଣାପଡ଼ିଯିବ ।
Also Read
ପଦ୍ମପୁରରୁ ସୋମେଶ ମହାନ୍ତି
