Naveen Patnaik: ସାଙ୍ଗ ହୋଇ ଫେରିଲେ ନବୀନ ଓ ପାଣ୍ଡିଆନ୍, ଯାଇଥିଲେ ରାଜ୍ୟ ବାହାରକୁ

ଓଡ଼ିଶା ଫେରିଲେ ବିରୋଧୀ ଦଳ ନେତା ନବୀନ ପଟ୍ଟନାୟକ ଓ ପୂର୍ବତନ 5T ଅଧ୍ୟକ୍ଷ ଭି କେ ପାଣ୍ଡିଆନ । ଗତକାଲି ରାତି ପ୍ରାୟ ସାଢେ ୧୨ଟାରୁ ଗୋଟାଏ ମଧ୍ୟରେ ଦୁଇ ଜଣଯାକ ଭୁବନେଶ୍ବର ଫେରିଥିବା ସୂଚନା ମିଳିଛି । ଉଭୟ ଭୁବନେଶ୍ବର ବିମାନ ବନ୍ଦରରେ ଥିବାର ଏକ ଭିଡିଓ ସାମ୍ନାକୁ ଆସିଛି । ଦୁହେଁ ଏକାଠି ବିମାନରେ ଭୁବନେଶ୍ବର ଫେରିଥିବା ସୂଚନା ମିଳିଛି। ଗତକାଲି କୋଏମ୍ବାଟୁର ଏୟାରପୋର୍ଟରେ ଏହି ଦୁଇଜଣଙ୍କୁ ଦେଖିବାକୁ ମିଳିଥିଲା । ଉଭୟ ନବୀନ ଓ ପାଣ୍ଡିଆନ୍ ତାମିଲନାଡୁର କୋଏମ୍ବାଟୁର ବିମାନ ବନ୍ଦରକୁ ପ୍ରବେଶ କରୁଥିବାବେଳେ ତାଙ୍କୁ ଦେଖି ଜଣେ ଓଡ଼ିଆ ବ୍ୟକ୍ତି ମୋବାଇଲ୍ ରେ ଭିଡିଓ ଉତ୍ତୋଳନ କରିଥିଲେ।

ଉକ୍ତ ଭିଡିଓକୁ ସେ ଓଟିଭିକୁ ସେୟାର କରିଥିଲେ। କେରଳ ନମ୍ବର ଥିବା ଏକ ଗାଡ଼ିରୁ ଓହ୍ଲାଇ ନବୀନ-ପାଣ୍ଡିଆନ୍ କୋଏମ୍ବାଟୁର ଏୟାରପୋର୍ଟକୁ ପ୍ରବେଶ କରିଥିଲେ। ନବୀନ କେଉଁ ଉଦ୍ଦେଶ୍ୟରେ ପାଣ୍ଡିଆନଙ୍କ ସହ କୋଏମ୍ବାଟୁର ଯାଇଥିଲେ ତାହା ଏଯାଏଁ ସ୍ପଷ୍ଟ ହୋଇନାହିଁ । ତେବେ ଏନେଇ ବିଜେଡି ପକ୍ଷରୁ ମଧ୍ୟ କୌଣସି ସ୍ପଷ୍ଟ କରାଯାଇନି ।

ଅଧିକ ପଢ଼ନ୍ତୁ: ଏକ୍ ଆଦମି ସବକୋ ଉଲ୍ଲୁ ବନା ଦିୟା: ଖଣିମନ୍ତ୍ରୀ

ବିଧାନସଭା ଚାଲିଥିବା ବେଳେ ବିରୋଧୀ ଦଳ ନେତା ନବୀନ ପଟ୍ଟନାୟକ ଗୃହରେ ଅନୁପସ୍ଥିତ ରହୁଥିବା ନେଇ ଶାସକ ଦଳ ପକ୍ଷରୁ ଦୋଷାରୋପ କରାଯାଇଥିଲା । ନବୀନ ପଟ୍ଟନାୟକ ଦିଲ୍ଲୀ ଗସ୍ତରେ ଯାଇଥିବାର କିଛି ବିଜେଡି ନେତା କହିଥିଲେ । ତେବେ ଗତ ବିଧାନସଭା ନିର୍ବାଚନ ପରେ ପ୍ରଥମ ଥର ପାଇଁ ନବୀନ ଓ ପାଣ୍ଡିଆନଙ୍କୁ ଏକାଠି ଦେଖିବାକୁ ମିଳିଛି । ନିର୍ବାଚନରେ ବିଜେଡି ହାରିଲେ ରାଜନୀତିରୁ ସନ୍ନ୍ୟାସ ନେବେ ବୋଲି ପୂର୍ବରୁ କହିଥିଲେ ପାଣ୍ଡିଆନ୍ । ନିର୍ବାଚନ ପରେ ସେ ରାଜନୀତିରୁ ଦୂରେଇ ଯାଇଥିବା ଘୋଷଣା କରିଥିଲେ । କିନ୍ତୁ ସେ ନବୀନ ନିବାସରେ ରହୁଥିବା ନେଇ ଚର୍ଚ୍ଚା ହେଉଥିଲା ।