ଝାଡ଼ଖଣ୍ଡରେ ରାଜନୈତିକ ସଂକଟ : ମେଣ୍ଟ ସରକାରର ବିଧାୟକଙ୍କୁ ନିଆଯାଉଛି ରାୟପୁର

ଝାଡ଼ଖଣ୍ଡରେ ରାଜନୈତିକ ସଂକଟ ମଧ୍ୟରେ ନିଜ ଏମ୍ଏଲ୍ଏଙ୍କୁ ରାୟପୁର ନେଉଛନ୍ତି କଂଗ୍ରେସ ଓ ଜେଏମ୍ଏମ୍ । ମୁଖ୍ୟମନ୍ତ୍ରୀଙ୍କ ଭାଗ୍ୟ ସୂତାଖିଅରେ ଝୁଲୁଛି । ତେଣୁ ଗଡ଼ ବଞ୍ଚାଇବା ପାଇଁ କଂଗ୍ରେସ ଓ ଜେଏମ୍ଏମ୍ ନିଜ ବିଧାୟକଙ୍କୁ ଏକ ସ୍ୱତନ୍ତ୍ର ଫ୍ଲାଇଟରେ କଂଗ୍ରେସ ଶାସିତ ରାଜ୍ୟ ଛତିଶଗଡ଼ର ରାୟପୁର ନେଉଛନ୍ତି । ହେମନ୍ତ ସୋରେନ ଆଶଙ୍କା କରୁଛନ୍ତି, ହୁଏତ ବିଜେପି, ବିଧାୟକଙ୍କୁ ନିଜ ପଟକୁ ନେବାକୁ ଚେଷ୍ଟା କରିପାରେ ।

ଅପରେସନ ଲୋଟସ୍ ଆଶଙ୍କାରେ ନିଜ ବିଧାୟକଙ୍କୁ ରାୟପୁରକୁ ପଠାଇ ଦିଆଯାଇଛି । ଛତିଶଗଡ଼ କଂଗ୍ରେସ ଶାସିତ ରାଜ୍ୟ ହୋଇଥିବାରୁ ସେଠାରେ ବିଜେପି କିଛି କରିପାରିବ ନାହିଁ ବୋଲି ତାଙ୍କର ବିଶ୍ୱାସ ଅଛି । ସରକାରଙ୍କ ଠାରୁ ନିଜ ନାଁରେ ମାଇନିଂ ଲିଜ୍ ନେଇଛନ୍ତି ହେମନ୍ତ ସୋରେନ । ଏହାକୁ ଅଫିସ୍ ଅଫ୍ ପ୍ରଫିଟ୍ କହି ତାଙ୍କର ବିଧାୟକ ପଦ ରଦ୍ଦ ପାଇଁ ବିଜେପି ଦାବି କରିଥିଲା ।

ନିର୍ବାଚନ କମିଶନ ମଧ୍ୟ ଏଥିପାଇଁ ରାଜ୍ୟପାଳଙ୍କୁ ସୁପାରିଶ କରିଥିବା ଚର୍ଚ୍ଚା ହେଉଛି । ୮୧ ବିଧାନସଭା ଆସନ ବିଶିଷ୍ଟ ଝାଡ଼ଖଣ୍ଡରେ ଜେଏମ୍ଏମର ୩୦ ବିଧାୟକ ଥିବା ବେଳେ କଂଗ୍ରେସର ୧୮ ବିଧାୟକ ଅଛନ୍ତି ବିଜେପିର ୨୬ ବିଧାୟକ ଅଛନ୍ତି ।

ରାଜ୍ୟରେ ଝାରଖଣ୍ଡ ମୁକ୍ତି ମୋର୍ଚ୍ଚା(ଜେଏମଏମ) ଓ କଂଗ୍ରେସ ମିଳିତ ଭାବେ ସରକାର ଗଠନ କରିଛନ୍ତି। ଏବେ ମୁଖ୍ୟମନ୍ତ୍ରୀ ହେମନ୍ତଙ୍କ ବିଧାୟକ ପଦ ଅଫିସ ଅଫ ପ୍ରଫିଟ ମାମଲାରେ ରଦ୍ଦ ହେବାର ଆଶଙ୍କା ଦେଖାଦେଇଛି । ତେଣୁ ଛତିଶଗଡ଼ର ରାୟପୁରକୁ ଚାଲି ଯାଇଛନ୍ତି ମେଣ୍ଟ ସରକାରର ସମସ୍ତ ବିଧାୟକ ।