ରତ୍ନଭଣ୍ତାର ଖୋଲିବାରେ ଅସୁବିଧା କେଉଁଠି ?

ଆମିକସକ୍ୟୁରିଙ୍କ ଗସ୍ତ ପରେ ପୁଣି ଜୋର୍ ଧରିଲା ଶ୍ରୀମନ୍ଦିର ରତ୍ନଭଣ୍ଡାର ଖୋଲିବା ଦାବି । ସାମ୍ବାଦିକ ସମ୍ମିଳନୀ କରି ଦାବି ଉଠାଇଲେ ବରିଷ୍ଠ ବିଜେପି ନେତା ବିଜୟ ମହାପାତ୍ର । ସେ କହିଛନ୍ତି ଯେ, ନିକଟରେ ଆମିକସକ୍ୟୁରି କୋର୍ଟଙ୍କ ନିର୍ଦ୍ଦେଶରେ ପୁରୀ ଆସିଥିଲେ । ସେ ମଧ୍ୟ ଅନୁଭବ କରିଛନ୍ତି ଯେ, ସୁରକ୍ଷା ଓ ମରାମତି ଦିଗରେ ଅବହେଳା ହୋଇଛି ।

ପୂର୍ବରୁ ୧୯୭୮, ୧୯୮୨  ଓ ୧୯୮୫ ମସିହାରେ ୩ ଥର ରତ୍ନଭଣ୍ଡାର ଖୋଲା ଯାଇଥିଲା । ପ୍ରଭୁଙ୍କ ୧୨ ହଜାର ୮ଶହ ୩୮ ଭରି ସୁନା ଥିବା ମଧ୍ୟ ଆକଳନ କରାଯାଇଥିଲା । ଯଦି ସେ ସମୟରେ ରତ୍ନଭଣ୍ଡାର ଖୋଲାଯାଇପାରିଲା, ତେବେ ଏବେ ଅସୁବିଧା କେଉଁଠି ବୋଲି ପ୍ରଶ୍ନ କରିଛନ୍ତି ବିଜୟ । ଶ୍ରୀମନ୍ଦିର ରକ୍ଷଣାବେକ୍ଷଣ ଦାୟିତ୍ୱ ଏଏସ୍‌ଆର ରହିଛି। ଶ୍ରୀମନ୍ଦିର ପ୍ରଶାସନ ବା ରାଜ୍ୟ ସରକାରଙ୍କ କାମ ଖୁବ୍ କମ୍। ତେଣୁ ଏଏସଆଇ ଠିକ୍ ଭାବେ କାମ କରିନାହିଁ ବୋଲି ସ୍ପଷ୍ଟ ହୋଇଛି।

ସେପଟେ ବିଜେଡି କହିଛି, ସରକାର ତତ୍ପର ଅଛନ୍ତି । ମନ୍ଦିର ପ୍ରଶାସନ, ରତ୍ନଭଣ୍ଡାର ସହ ସଂସ୍କାର ବାବଦରେ ସରକାର କହିସାରିଛନ୍ତି । ଏଣୁ ବିଜୟଙ୍କ ବୟାନର କୌଣସି ଯଥାର୍ଥତା ନାହିଁ ବୋଲି ବିଜେଡି ମୁଖପାତ୍ର ଲେନିନ୍ ମହାପାତ୍ର କହିଛନ୍ତି । ତେବେ କଂଗ୍ରେସର ପୂର୍ବତନ ପିସିସି ସଭାପତି କହିଛନ୍ତି ଯେ, ରତ୍ନଭଣ୍ଡାର ଖୋଲିଲେ ସରକାରଙ୍କ ଗୁମର ଖୋଲିଯିବ । ମାତ୍ର ଜଗନ୍ନାଥ ପ୍ରେମୀ ଚାହୁଁଛନ୍ତି ରତ୍ନଭଣ୍ଡାର ଖୋଲୁ ।