ପରାଜୟ ସତ୍ତ୍ୱେ ମହାନଗରରେ ବଢିଛି ବିଜେପିର ଭୋଟ୍ ପ୍ରତିଶତ : ଅପରାଜିତା କହିଲେ, ରାଜ୍ୟ ନେତୃତ୍ୱ ଶକ୍ତିଶାଳୀ ହୋଇଥିଲେ ଆହୁରି ଭଲ ହୋଇଥାନ୍ତା ପ୍ରଦର୍ଶନ

ତିନି ମହାନଗର ନିଗମର ମେୟର ପଦ ହାତେଇବା ସହ କର୍ପୋରେଟର ନିର୍ବାଚନରେ ବି ସବୁଠି ସଂଖ୍ୟା ଗରିଷ୍ଠତା ହାସଲ କରିଛି ବିଜେଡି । ହେଲେ ସବୁଠି ବଢ଼ିଛି ବିଜେପିର ଭୋଟ୍ ପ୍ରତିଶତ । ଏମିତିକି ଗତଥର ତୁଳନାରେ ଏଥର ଦଳର କର୍ପୋରେଟର ସଂଖ୍ୟା ବି ବଢ଼ିଛନ୍ତି । କିନ୍ତୁ କେବଳ କଟକକୁ ଛାଡ଼ି ଦେଲେ ସବୁଠି ଶୋଚନୀୟ ସ୍ଥିତିରେ କଂଗ୍ରେସ । ଅପରପକ୍ଷେ ବିଦ୍ରୋହୀଙ୍କୁ ମ୍ୟାନେଜ୍ କରି ନପାରିବାରୁ ବହୁ ସ୍ଥାନରେ ବିଜେଡି କର୍ପୋରେଟର ପ୍ରାର୍ଥୀଙ୍କୁ ପରାଜୟର ମୁହଁ ଦେଖିବାକୁ ମିଳିଛି । ତେଣୁ ଡେପୁଟି ମେୟର ନିର୍ବାଚନ ପୂର୍ବରୁ ସ୍ୱାଧୀନ ପ୍ରାର୍ଥୀଙ୍କୁ ନିଜ ଆଡକୁ ଆଣିବାକୁ ପ୍ଲାନ୍ ବି ପ୍ରସ୍ତୁତ କରିସାରିଲାଣି ଶାସକ ଦଳ ।

ବିଜେଡି ପାଇଁ କାଳ ହେଲେ କି ବିଦ୍ରୋହୀ? ବଦଳୁଛି କି ରାଜଧାନୀବାସୀଙ୍କ ମୁଡ୍? ଭୁବନେଶ୍ୱର ମହାନଗର ନିଗମର ବିଜେପି ମେୟର ପ୍ରାର୍ଥୀ ସୁନୀତି ମୁଣ୍ଡଙ୍କୁ ଏକ ଲକ୍ଷ ୧୩ ହଜାର ୪ଶହ ଭୋଟ ମିଳିବା ପରେ ଏବେ ଏଭଳି ପ୍ରଶ୍ନ ଉଠିଛି । ମେୟର ପଦ ଲାଗି ପ୍ରତ୍ୟକ୍ଷ ନିର୍ବାଚନ ହୋଇଥିବାରୁ ସ୍ପ୍ଲିଟ୍ ଭୋଟିଂ ଓ କର୍ପୋରେଟର ଟିକେଟ ବଣ୍ଟାକୁ ନେଇ ଦ୍ୱନ୍ଦ୍ୱ ଉପୁଜିଥିବାରୁ ଅସନ୍ତୁଷ୍ଟ ମାନେ ଦଳର ଭୋଟ ମାଇନସ୍ କରାଇ ଥାଇପାରନ୍ତି ବୋଲି ଚର୍ଚ୍ଚା ହେଉଛି ।

ମନ୍ତ୍ରୀ ଅଶୋକ ପଣ୍ଡାଙ୍କ ଏକାମ୍ର ନିର୍ବାଚନ ମଣ୍ଡଳୀର ସର୍ବାଧିକ ୮ଟି ଓ୍ୱାର୍ଡରେ ବିଜେଡି ପରାସ୍ତ ହୋଇଛି । ୪ଟିରେ ବିଜେପି ଜିତିଥିବାବେଳେ ଅନ୍ୟ ୪ଟିରେ ବିଜେଡି ବିଦ୍ରୋହୀ ଜିତିଛନ୍ତି । ସେହିପରି ବିଧାୟକ ଅନନ୍ତନାରାୟଣ ଜେନାଙ୍କ ମଧ୍ୟ ନିର୍ବାଚନ ମଣ୍ଡଳୀର ୧୯ଟି ଓ୍ୱାର୍ଡରୁ ବିଜେଡି ୫ଟିରେ ପରାସ୍ତ ହୋଇଛି । ୩ଟିରେ ବିଜେପି ଓ ୨ଟି ଓ୍ୱା଼ର୍ଡରେ ସ୍ୱାଧୀନ ପ୍ରାର୍ଥୀ ବିଜୟୀ ହୋଇଛନ୍ତି ।

ସେହିପରି ବିଧାୟକ ସୁଶାନ୍ତ ରାଉତଙ୍କ ଭୁବନେଶ୍ୱର ଉତ୍ତର ନିର୍ବାଚନ ମଣ୍ଡଳୀର ୬ଟି ଓ୍ୱାର୍ଡରେ ଦଳ ପରାଜୟର ସ୍ୱାଦ ଚାଖିଛି । ଏଠାରେ ୩ଟି ଓ୍ୱାର୍ଡରେ ବିଜେପି ଓ ୩ଟି ଓ୍ୱାର୍ଡରେ ସ୍ୱାଧୀନ ପ୍ରାର୍ଥୀ ବିଜୟୀ ହୋଇଛନ୍ତି । ବିଜେଡି ନିଜ ବିଧାୟକଙ୍କ ମୁଣ୍ଡରେ ଟିକେଟ ବଣ୍ଟା ଦାୟିତ୍ୱ ଲଦିବି ବିଜୟ ଓ୍ୱାର୍ଡ ସଂଖ୍ୟାକୁ ୫୦କୁ ନେଇପାରିନି । ସେପଟେ ବିଜେପି ଗତଥରର ୪ସିଟରୁ ବଢି ୧୦ରେ ପହଞ୍ଚିଛି । ସେହିପରି ୮ଟି ଓ୍ୱାର୍ଡରେ ତୀବ୍ର ପ୍ରତିନ୍ଦ୍ୱନ୍ଦିତା କରିଛି ବିଜେପି । ତେବେ ରାଜ୍ୟ ନେତୃତ୍ୱ ଶକ୍ତିଶାଳୀ ହୋଇଥିଲେ ଦଳ ଆହୁରି ଭଲ ପ୍ରଦର୍ଶନ କରିଥାନ୍ତା ବୋଲି ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ କହିଛନ୍ତି । ସେପଟେ ଓ୍ୱାର୍ଡରେ ଖାତା ଖୋଲିପାରିନଥିବା କଂଗ୍ରେସ କହିଛି, ଶୋଚନୀୟ ପ୍ରଦର୍ଶନର ସମୀକ୍ଷା ହେବ ।

ସିଲଭରି ସିଟି କଟକରେ କିନ୍ତୁ ମେୟର ପଦବୀରେ ବିଜେଡିକୁ କଡା ଟକ୍କର ଦେଇ ପରାଜିତ ହୋଇଥିବା କଂଗ୍ରେସ ୮ଟି ଓ୍ୱାର୍ଡରେ ବିଜୟୀ ହୋଇଛି । ଅନ୍ୟପଟେ ମେୟର ଭୋଟରେ ବିଜେପି ତୃତୀୟରେ ରହିଛି ସତ ଦଳର ଭୋଟ ହାର କିନ୍ତୁ ବଢିଛି । ପୂର୍ବ ନିର୍ବାଚନ ତୁଳନାରେ ଅଧିକ ୩ଟି ଓ୍ୱାର୍ଡ ସହ ୭ଟି ଓ୍ୱାର୍ଡ ଦଖଲ କରିଛି ଦଳ । ସେପଟେ ଟିକେଟ୍ କନ୍ଦଳରୁ ୩ ବିଜେଡି ବିଦ୍ରୋହୀଙ୍କ ସମେତ ୬ ଜଣ ସ୍ୱାଧୀନ ପ୍ରାର୍ଥୀ ଜିତିଛନ୍ତି । ତେଣୁ ବିଜେଡି ଏଠି ବିଜୟୀ ବିଦ୍ରୋହୀ ପ୍ରାର୍ଥୀଙ୍କ ଘର ବାହୁଡ଼ା ପାଇଁ ପ୍ରୟାସ ଆରମ୍ଭ କରିଦେଇଛି ।

ସେମିତି ବ୍ରହ୍ମପୁରରେ ମଧ୍ୟ ମେୟର ପଦ ଲାଗି ଶାସକ ବିଜେଡିକୁ କଡା ଟକ୍କର ଦେଇ ବିଜେପି ଦ୍ୱିତୀୟରେ ରହିଛି । ଗତ ଥର ୭ ପ୍ରତିଶତ ଭୋଟ୍ ପାଇ ଖାତା ଖୋଲି ପାରି ନଥିବା ବିଜେପି ଏଥର ଭୋଟ୍ ପ୍ରତିଶତକୁ ଖାଲି ୩୪କୁ ବଢ଼ାଇନି, ୭ଟି କର୍ପୋରେଟର ସିଟ୍ ବି ଅକ୍ତିଆର କିରଛି । ସେହିପରି ବିଜେଡି ୩୦, କଂଗ୍ରେସ ଗୋଟିଏ ଓ ସ୍ବାଧୀନ ପ୍ରାର୍ଥୀ ୪ଟିରେ ବିଜୟୀ ହୋଇଛନ୍ତି । ମହାନଗର ନିର୍ବାଚନରେ ବିଜେପିର ଭୋଟ ହାର ବଢିବା ପରେ ବିଜେଡି ଶିବିରରେ ଆରମ୍ଭ ହୋଇଯାଇଛି କାଉଣ୍ଟର କସରତ ।

ବ୍ରହ୍ମପୁରରୁ ଅଶୋକ ବ୍ରହ୍ମା, କଟକରୁ ଦେବାଶିଷ ମହାନ୍ତି, ଭୁବନେଶ୍ୱରରୁ କପିଳେନ୍ଦ୍ର ପ୍ରଧାନ ଓ ଜଗଦୀଶ ଦାସଙ୍କ ରିପୋର୍ଟ