LIVE TV
୪ ରାଜ୍ୟର ଫଳାଫଳ ଆସିବା ପରେ କିଏ ହେବେ ମୁଖ୍ୟମନ୍ତ୍ରୀ ତାକୁ ନେଇ ଆରମ୍ଭ ହୋଇଛି ଚର୍ଚ୍ଚା । ୨୩୦ ଆସନ ବିଶିଷ୍ଟ ମଧ୍ୟପ୍ରଦେଶ ବିଧାନସଭାରେ ମ୍ୟାଜିକ୍ ନମ୍ବର ୧୧୬ଠୁ ଢେର ଆଗକୁ ଯାଇ ବୃହତ୍ ସଫଳତା ହାସଲ କରିଛି ବିଜେପି । କଂଗ୍ରେସକୁ ଗତ ଥର ତୁଳନାରେ ୫୦ରୁ ଅଧିକ ସିଟ୍ ହରାଇବାକୁ ପଡିଛି । ଏସବୁ ଭିତରେ ପ୍ରଶ୍ନ, ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଶିବରାଜ ରହିବେ ନା ଆଉ କିଏ ହେବେ ? ଶିବରାଜଙ୍କ ସହ କୈଳାସ ବିଜୟବର୍ଗିଆ, ଜ୍ୟୋତିରାଦିତ୍ୟା ସିନ୍ଧିଆ ଓ ନରେନ୍ଦ୍ର ସିଂ ତୋମର ନାଁକୁ ନେଇ ବି ଚର୍ଚ୍ଚା ଚାଲିଛି ।
ତେବେ ଦଳ ଯାହାକୁ ଚାହିଁବ ସେ ହିଁ ଦାୟିତ୍ୱ ନେବ ବୋଲି କହୁଛନ୍ତି ନେତା । ରାଜସ୍ଥାନରେ ପଦ୍ମ ଫୁଟିବା ପରେ ଏବେ କଳ୍ପନାଜଳ୍ପନା- କିଏ ପିନ୍ଧିବ ମୁଖ୍ୟମନ୍ତ୍ରୀ ମୁକୁଟ ? କାହାକୁ ସିଏମ୍ ଚୌକିରେ ବସାଇବ ବିଜେପି ? ବିଜେପି କୌଣସି ନେତାଙ୍କୁ ପୂର୍ବରୁ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ସ୍ପଷ୍ଟ କରିନଥିବାରୁ, ଏବେ ରେସରେ ଅତିକମରେ ୫ ଜଣ ନେତାଙ୍କ ନାଁ ଚର୍ଚ୍ଚା ହେଉଛି । ସେମାନେ ହେଲେ ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେ, ସାଂସଦ ମହନ୍ତ, ବାଲକନାଥ, ସାଂସଦ ଦୀୟା କୁମାରୀ, କେନ୍ଦ୍ରମନ୍ତ୍ରୀ ଗଜେନ୍ଦ୍ର ସିଂ ଶେଖାୱତ ଏବଂ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ । ତେବେ ବସୁନ୍ଧରା ରାଜେଙ୍କ ଉପରେ କେନ୍ଦ୍ରୀୟ ନେତୃତ୍ୱ ଏତେଟା ସନ୍ତୁଷ୍ଟ ନଥିବା କୁହାଯାଉଛି ।
Also Read
ତେଣୁ ନୂଆ ଚେହେରା ଭାବେ ଚର୍ଚ୍ଚାରେ ସବୁଠୁ ଆଗରେ ଅଛନ୍ତି ମହନ୍ତ ବାଲକନାଥ ଓରଫ୍ ରାଜସ୍ଥାନର 'ଯୋଗୀ ଆଦିତ୍ୟନାଥ'। ଆଉ ଜଣେ ଚର୍ଚ୍ଚିତ ନୂଆ ଚେହେରା ହେଉଛନ୍ତି ରାଜସମନ୍ଦର ଏମପି ତଥା ଏଥର ବିଦ୍ୟାଧରନଗରରୁ ବିଧାନସଭା ନିର୍ବାଚନ ଜିତିଥିବା ଦୀୟା କୁମାରୀ । ଜଣେ ମହିଳା ଓ ରାଜ ପରିବାର ଦୃଷ୍ଟିରୁ ସେ ମୁଖ୍ୟମନ୍ତ୍ରୀ ଭାବେ ବସୁନ୍ଧରାଙ୍କ ବିକଳ୍ପ ଭାବେ ଉଭା ହୋଇପାରନ୍ତି । କେବଳ ଏମାନେ ନୁହଁନ୍ତି, ରାଜସ୍ଥାନର ପରବର୍ତ୍ତୀ ମୁଖ୍ୟମନ୍ତ୍ରୀ ଭାବେ ଦୁଇ ଯୋଧପୁରୀ କେନ୍ଦ୍ରମନ୍ତ୍ରୀ ଗଜେନ୍ଦ୍ର ସିଂ ଶେଖାୱତ ଓ ଅଶ୍ୱିନୀ ବୈଷ୍ଣବଙ୍କ ନାଁ ବି ମୁଖ୍ୟମନ୍ତ୍ରୀ ଆଶାୟୀ ଭାବେ ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି ।
ଛତିଶଗଡରେ ବିଜେପି ସରକାରକୁ ଆସିବା ପରେ ଆରମ୍ଭ ହୋଇଛି ସିଏମ୍ ପାଇଁ ରେସ୍ । ଆଉ ଏହି ରେସରେ ସବୁଠୁ ଆଗରେ ରହିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ରମଣ ସିଂହ । ସେପଟେ ତେଲେଙ୍ଗାନାରେ କଂଗ୍ରେସର ବିଜୟ ପରେ ମୁଖ୍ୟମନ୍ତ୍ରୀ ଦୌଡ଼ରେ ଆଗରେ ଅଛନ୍ତି ପିସିସି ସଭାପତି ରେବନ୍ତ ରେଡ୍ଡୀ ।
