ଜଣେ କହିଲେ ‘ମୋତେ ମନ୍ତ୍ରୀ ନକଲେ ମୁଁ ଇସ୍ତଫା ଦେବି, ଆଉ ଜଣେ କହିଲେ ‘ମୋତେ ମନ୍ତ୍ରୀ ପଦ ନିହାତି ଦରକାର’..!

ଆମେ ସମସ୍ତେ ଜାଣିଛନ୍ତି ମହାରାଷ୍ଟ୍ର ରାଜନୀତି କଥା । ଏଠି ଘଡ଼ିକେ ଘୋଡ଼ା ଛୁଟେ ନୀତିରେ ଚାଲେ ସରକାର । ସକାଳେ ଗୋଟିଏ ସରକାର ଗଢ଼ା ହୋଇଥିବା ବଳେ ସନ୍ଧ୍ୟାରେ ଆଉ କାହା ସରକାର ଚାଲେ । ଏଠି ଦେଖିବାକୁ ମିଳେ ଅନେକ ଟ୍ୱିଷ୍ଟ । ମୁହୁର୍ତ୍ତକ ମଧ୍ୟରେ ଏଠି ମୁଖ୍ୟମନ୍ତ୍ରୀ ବି ବଦଳିଯିବେନି, ତାହା କହିହେବ ନାହିଁ । ତେବେ ହଠାତ୍ ଆମେ ଆଜି ପୁଣି ମହାରାଷ୍ଟ୍ର ରାଜନୀତି କଥା କାହିଁକି କହୁଛୁ, ଆପଣ ଭାବୁଥିବେ । ତେବେ ଏହା ପଛରେ ଏକ ବଡ଼ କାରଣ ରହିଛି ।

ମହାରାଷ୍ଟ୍ର ରାଜନୀତିକୁ ନେଇ ଶିବସେନାର ଜଣେ ବରିଷ୍ଠ ବିଧାୟକଙ୍କ ବୟାନ ଏବେ ଖୁବ୍‌ ଚର୍ଚ୍ଚାରେ। ରାଇଗଡ଼ ବିଧାୟକ ତଥା ଶିବସେନାର ଚିଫ୍‌ ହ୍ୱିପ୍‌ ଭାରତ ଗୋଗାୱାଲେ ବୁଧବାର ଦେଇଛନ୍ତି ଏମିତି କିଛି ବୟାନ । ଯାହା ଶୁଣିଲେ ଆପଣ ଆଶ୍ଚର୍ଯ୍ୟ ହେବେ । ଆଉ ଆପଣ ନହସି ରହିପାରିବେନି ।

ଗୋଗାୱାଲେ କହିଛନ୍ତି, ମହାରାଷ୍ଟ୍ରରେ ଅନେକ ନେତାଙ୍କୁ ମନ୍ତ୍ରୀପଦ ଦିଆଯିବା ପଛରେ ରହିଛି ଅଜବ କାରଣ । ଯେମିତିକି ଜଣେ ନେତା ଆସି କହିଲେ, ‘ମୋତେ ଯଦି ମନ୍ତ୍ରୀ ପଦ ନମିଳେ ତେବେ ମୋ ପତ୍ନୀ ଆତ୍ମହତ୍ୟା କରିଦେବେ’ । ଠିକ୍‌ ସେହିଭଳି ଆଉ ଜଣେ ବିଧାୟକ କହିଲେ ‘ମୋତେ ମନ୍ତ୍ରୀପଦ ନମିଳିଲେ ମୁଁ ବିଧାୟକ ପଦରୁ ଇସ୍ତଫା ଦେଇଦେବି’। ତାପରେ ଆଉ ଜଣେ ବିଧାୟକ ଦାବି କଲେ ଯେ,‘ମୋତେ ମନ୍ତ୍ରୀପଦ ନିହାତି ଦରକାର । ନଚେତ୍‌ କେନ୍ଦ୍ରମନ୍ତ୍ରୀ ନାରାୟଣ ରାଣେ ତାଙ୍କୁ ଶେଷ କରିଦେବେ’ ।

ବୁଧବାର ଏକ ସାଧାରଣ ସଭାରେ ଗୋଗାୱାଲେ ଭାଷଣ ଦେବା ବେଳେ ଏଭଳି କଥା କହିଛନ୍ତି । ସେ ଆହୁରି କହିଛନ୍ତି, ‘ଆଜି ଯଦି ଏକନାଥେ ସିନ୍ଦେ ମୁଖ୍ୟମନ୍ତ୍ରୀ ପଦରେ ବସିଛନ୍ତି ତେବେ ଏହା ପଛରେ ଏଭଳି କିଛି ବିଧାୟକ ତଥା ନେତାଙ୍କ ହାତ ରହିଛି । ସିନ୍ଦେ ମଧ୍ୟ ସେମାନଙ୍କ ମଧ୍ୟରୁ ଜଣେ । ମୋ ଭଳି ନେତାଙ୍କ ପାଇଁ ଆଜି ମୁଖ୍ୟମନ୍ତ୍ରୀ ପଦରେ ବସିଛନ୍ତି ସିନ୍ଦେ’ ।

ଗୋଗାୱାଲେ ଗତ ୨୦୨୨ରୁ ମନ୍ତ୍ରୀ ହେବା ଅପେକ୍ଷାରେ ରହିଛନ୍ତି । ଯେତେବଳେ ୪୦ ଶିବସେନା ବିଧାୟକ ଉଦ୍ଧବ ଠାକ୍‌ରେଙ୍କ ନେତୃତ୍ୱକୁ ବିରୋଧ କରି ଦଳରେ ବିଦ୍ରୋହ କରିଥିଲେ । ଆଉ ତାପରେ ଅନାସ୍ଥା ଆଣି ନୂଆ ସରକାର ଗଢ଼ିବା ସହ ସିନ୍ଦେଙ୍କୁ ମୁଖ୍ୟମନ୍ତ୍ରୀ କରିଥିଲେ ।

ତେବେ ଗୋଗାୱାଲେ ଆହୁରି କହିଛନ୍ତି ଯେ, ମୋତେ କାହିଁ ଲାଗୁଛି ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଏବେ ବିପଦରେ ଅଛନ୍ତି । ଅର୍ଥାତ୍‌ ତାଙ୍କ ଚୌକି ବିପଦରେ ରହିଛି । ତେଣୁ ମୁଁ ନିଜକୁ ଏଇ ମନ୍ତ୍ରୀପଦ ରେସ୍‌ରୁ ବାଦ୍‌ ଦେଉଛି । 

ଗୋଗାୱାଲେ କହୁକହୁ ଆହୁରି ମଜାଦାର କଥା ମଧ୍ୟ କହିଛନ୍ତି, ସେ କହିଛନ୍ତି ମୁଁ ନିଜକୁ ମନ୍ତ୍ରୀପଦ ରେସ୍‌ରେ ରଖିଥିବା ସହ ମନ୍ତ୍ରୀପଦ ନିଶ୍ଚୟ ପାଇବି ବୋଲି ଆଶାବାଦୀ ଥିଲି । ଏମିତିକି ଶପଥ ଗ୍ରହଣ ସମାରୋହ ପାଇଁ ମୁଁ ନୂଆ ସୁଟ୍‌ ମଧ୍ୟ ଆଗୁଆ ସିଲେଇ କରିସାରିଛି । କିନ୍ତୁ ଏବେ ଏଭଳି ପରିସ୍ଥିତି ଦେଖିବା ପରେ ମୁଁ ନିଜକୁ ମନ୍ତ୍ରୀପଦ ରେସ୍‌ରୁ ବାଦ୍‌ ଦେଉଛି ।