ବିଲ୍ୟୁଙ୍କୁ ଧୋକା ଦେଲା ଗୁଗୁଲ୍‌ ମ୍ୟାପ୍‌ ! କୋଲକାତା ବଦଳରେ ପହଞ୍ଚିଲେ ସୋରରେ

ଭାବିଥିଲେ ଗୁଗୁଲ୍ ମ୍ୟାପ୍ ଦେଖି ଲକ୍ଷ୍ୟସ୍ଥଳରେ ପହଞ୍ଚିବେ, ଆଉ ମନଭରି ପ୍ରାକୃତିକ ଦୃଶ୍ୟରାଜିର ଉପଭୋଗ କରି ଭଲରେ ଭଲରେ ସ୍ୱଦେଶ ଫେରିଯିବେ । ସେଥିପାଇଁ ଧାଇଁ ଆସିଥିଲେ ସୁଦୂର ଫ୍ରାନ୍ସର ଜଣେ ପର୍ଯ୍ୟଟକ । କିନ୍ତୁ ଦୁର୍ଭାଗ୍ୟ, ବାଟ ହୁଡ଼ାଇଦେଲା ଗୁଗୁଲ ମ୍ୟାପ୍ । ୱାଟର୍ ଫଲ୍ ବଦଳରେ ବିଦେଶୀ ପର୍ଯ୍ୟଟକଙ୍କୁ ଦେଖାଇଦେଲା ଡ୍ୟାମ୍ । ଆଉ ତା’ପରେ ସଂପୃକ୍ତ ବିଦେଶୀ ପର୍ଯ୍ୟଟକଙ୍କ ସହ ଯାହା ଘଟିଗଲା, ଜାଣନ୍ତୁ..

ବିଦେଶୀ ପର୍ଯ୍ୟଟକଙ୍କୁ ବାଟ ହୁଡ଼ାଇ ଦେଲା ଗୁଗୁଲ୍ ମ୍ୟାପ୍ । କେଉଁଠୁ ଆଣି କେଉଁଠୁ ପହଞ୍ଚାଇଦେଇଥିଲା ଏହି ଯୁବକଙ୍କୁ ବିଶ୍ୱର ଲୋକପ୍ରିୟ ସର୍ଚ୍ଚ ଇଞ୍ଜିନ୍ ଗୁଗୁଲ ମ୍ୟାପରୁ ଠିକଣା ପାଇ ଯୁବକଙ୍କ ମୁଣ୍ଡଗୋଲ୍ । ପହଞ୍ଚିଯାଇଛନ୍ତି ବାଲେଶ୍ୱର ଜିଲ୍ଲା ସୋର ଥାନା ମହୁମୁହାଣ ପଞ୍ଚାୟତ ଗୁଠୁଣା ଗାଁ । ସେ ହେଉଛନ୍ତି ବିଲ୍ୟୁ ଓରଫ୍ ମାର୍ଶଲ ।

ଫ୍ରାନସ ଭଳି ରାଷ୍ଟ୍ରରୁ ଆସିଥିବାରୁ ବିଲ୍ୟୁଙ୍କୁ ଅତିଥି ଭଳି ସେବା ସତ୍କାର କରୁଛନ୍ତି ସ୍ଥାନୀୟ ଯୁବକ ମାନେ । ଆତିଥ୍ୟ ପାଇ ବିଲ୍ୟୁ ବି ଖୁସ୍ । ହସୁଛନ୍ତି, ବୁଲୁଛନ୍ତି, ଖାଉଛନ୍ତି, ସ୍ଥାନୀୟ ଯୁବକଙ୍କ ସହ ସେଲଫି ନେଇ ମଜା ଉଠାଉଛନ୍ତି । ଗୁଗୁଲ୍ ମ୍ୟାପ୍ ଦେଖି ବାଟ ଭୁଲି ଆସିଥାନ୍ତୁ ପଛକେ, ଏଇଠି ଯେଉଁ ସ୍ନେହ ଆଉ ସରାଗ ପାଉଛନ୍ତି ତାକୁ ନେଇ ଗଦଗଦ୍ ବିଲ୍ୟୁ । ଭାବ ବିହ୍ୱଳ ହୋଇଯାଇଛନ୍ତି ଗୋଟାପଣେ । ଏବେ ଗାଁରେ ଚାଲିଥିବା କ୍ରିକେଟ୍ ଟୁର୍ଣ୍ଣାମେଣ୍ଟର ମଜା ନେଉଛନ୍ତି । ତେଣୁ ଟୁର୍ଣ୍ଣାମେଣ୍ଟ ସରିଲେ ସେ ଫେରିଯିବେ ବୋଲି କହିଛନ୍ତି ।

Also Read

ଉଦ୍ଧାର ପରେ ଶିଶୁକନ୍ୟାର ଅବସ୍ଥା ସଙ୍କଟାପନ୍ନ; ଗୁରୁତ୍ୱପୂର୍ଣ୍ଣ ଆଗାମୀ ୩ଦିନ

Read More

‘୨୪ ରେ ବାଜି ମାରିବ ବିଜେପି, ୮ ନୁହେଁ ୧୫ ଲୋକସଭା ଦଖଲ କରିବୁ’

Read More

ବୋରୱେଲ୍ ପାଇଁ ବ୍ୟାଙ୍କ୍ ଆଗରେ ଅସମ୍ଭାଳ ଭିଡ଼, ନିର୍ଦ୍ଦିଷ୍ଟ ବ୍ୟାଙ୍କରେ ଆବେଦନ ନିୟମକୁ ନେଇ ଚାଷୀ କ୍ଷୁବ୍ଧ

Read More

ଗତ ନଭେମ୍ବରରୁ ଭାରତ ଭ୍ରମଣରେ ଆସିଥିବା ବିଲ୍ୟୁ ପ୍ରଥମେ ଦିଲ୍ଲୀ, ବାରାଣସୀ ବୁଲି ଟ୍ରେନରେ ଯାଇଥିଲେ ଖଡ଼ଗପୁର । ସେଠାରୁ ଭୁବନେଶ୍ୱର ଓ ପୁରୀ ଆସି ପୁଣି ଟ୍ରେନରେ ଯାଇଥିଲେ ଭଦ୍ରକ । ବିଲ୍ୟୁଙ୍କ କହିବା କଥା, ଭଦ୍ରକରୁ କୋଲାକାତା ଯାଇ ଗୋପାଳପୁର ୱାଟରଫଲ୍ ଯାଇଥାନ୍ତେ । ତେଣୁ ଟ୍ରେନରେ ଯିବାବେଳେ ଗୁଗୁଲ ମ୍ୟାପରେ ସର୍ଚ୍ଚ କରିଦେଲେ ଗୋପାଳପୁର ୱାଟରଫଲ୍ । କିନ୍ତୁ ସୋର ଅଞ୍ଚଳରେ ଥିବା ସିନ୍ଧୁଆ ଡ୍ୟାମକୁ ଗୁଗୁଲ୍ ମ୍ୟାପ୍ ଗୋପାଳପୁର ୱାଟରଫଲ୍ ଦର୍ଶାଇଥିଲା ।

ଶେଷରେ ସୋର ଷ୍ଟେସନରେ ଓହ୍ଲାଇ ଚାଲି ଚାଲି ସିନ୍ଧୁଆ ଡ୍ୟାମ୍ ଯାଉଥିଲେ ବିଲ୍ୟୁ । ଏହି ସମୟରେ ରାସ୍ତାରେ କିଛି ଲୋକ ହଇରାଣ ହରକତ କରୁଥିବାବେଳେ ଗୁଠୁଣାର କିଛି ଯୁବକ ତାଙ୍କୁ ଉଦ୍ଧାର କରି ପୋଲିସକୁ ହସ୍ତାନ୍ତର କରିଥିଲେ । ପୋଲିସ ପାସପୋର୍ଟ, ଭିସା ଆଦି ଗୁରୁତ୍ୱପୂର୍ଣ୍ଣ କାଗଜପତ୍ର ଯାଞ୍ଚ କରିବା ସହ ଖୋଳତାଡ଼ ପରେ ଜଣାପଡ଼ିଲା, ବିଲ୍ୟୁଙ୍କୁ ବାଟବଣା କରିଛି ଗୁଗୁଲ୍ ମ୍ୟାପ୍ ।

କେବଳ ବିଲ୍ୟୁ ନୁହଁନ୍ତି, ଗୁଗୁଲ୍ ମ୍ୟାପ୍ ପୂର୍ବରୁ ଅନେକଙ୍କୁ ବାଟବଣା କରିଥିବା ଅଭିଯୋଗ ହୋଇଛି । ତେଣୁ ଆଇଟି ବିଶେଷଜ୍ଞଙ୍କ କହିବା କଥା, ଗୁଗୁଲ୍ ମ୍ୟାପ୍ ହେଉଛି ଏକ ସଫ୍ଟୱେୟାର । ପୂର୍ବରୁ ଲୋକେ ଯାହା ଫିଡବ୍ୟାକ୍ ଦେଇଥିବେ ସେହି ଅନୁଯାୟୀ ମ୍ୟାପରେ ତଥ୍ୟ ଦର୍ଶାଇବ । ତେଣୁ ଅଜଣା ଜାଗାକୁ ଯାଉଥିଲେ ଗୁଗୁଲ୍ ମ୍ୟାପ୍ ଉପରେ ସମ୍ପୂର୍ଣ୍ଣ ଭରସା ନକରି ସ୍ଥାନୀୟ ଲୋକଙ୍କୁ ବି ଠିକଣା ପଚାରିଦେବା ଉଚିତ୍ ।

ଆଧୁନିକ ଯାନ୍ତ୍ରିକ ଯୁଗରେ ସବୁ କାର୍ଯ୍ୟକୁ ଅତି ସହଜ କରିବା ପାଇଁ ବିଶ୍ୱର ଲୋକପ୍ରିୟ ସର୍ଚ୍ଚ ଇଞ୍ଜିନ୍ ଗୁଗୁଲ ଅନେକ ପ୍ରଶଂସନୀୟ ପଦକ୍ଷେପ ହାତକୁ ନେଇଥିବାବେଳେ ୟୁଜର୍ସଜ୍ଞ ସ୍ୱଳ୍ପ ଜ୍ଞାନ, ଦକ୍ଷତା ଓ ବ୍ୟାବହାରିକ କୌଶଳ ବେଳେବେଳେ ଅକଳରେ ପକାଇଥାଏ ।