ମଦ ପିଇ ଗାଡ଼ି ଚଳାଉଥିଲେ ସାବଧାନ ! ଏଣିକି ୨ ବର୍ଷ ଜେଲ୍, ୧୫୦୦୦ ଫାଇନ୍

ବନ୍ଧା ହେବେ, ଜେଲ୍ ଯିବେ ମଦୁଆ ଗାଡ଼ି ଚାଳକ। ସଡ଼କ ଦୁର୍ଘଟଣା କମାଇବା ଲକ୍ଷ୍ୟରେ ମଦୁଆ ଗାଡ଼ି ଚାଳକଙ୍କ ବିରୋଧରେ ଏଭଳି କଠୋର ଆଭିମୁଖ୍ୟ ପାଇଁ ନିଷ୍ପତ୍ତି ନେଇଛନ୍ତି ରାଜ୍ୟ ସରକାର । ଏନେଇ ପୋଲିସ ଡିଜିଙ୍କୁ ଚିଠି ଲେଖିଛି ବାଣିଜ୍ୟ ଓ ପରିବହନ ବିଭାଗ ।

ମଦ ପିଇ ଗାଡ଼ି ଚଳାଉଛନ୍ତି କି ? ହୁସିଆର ! ଧରାପଡ଼ିଲେ ଆଉ ଦୟାମାୟା ନାହିଁ। ଖାଲି ଫାଇନରେ ମିଳିବନି ନିସ୍ତାର । ଗିରଫ ହେବେ, ଜେଲ୍ ଯିବେ । ମଦୁଆ ଗାଡ଼ି ଚାଳକଙ୍କ ବିରୋଧରେ ଏଭଳି କଠୋର ଆଭିମୁଖ୍ୟ ଗ୍ରହଣ ପାଇଁ ରାଜ୍ୟର ସବୁ ଥାନାକୁ ନିର୍ଦ୍ଦେଶ ଜାରି ପାଇଁ କହିଛି ବାଣିଜ୍ୟ ଓ ପରିବହନ ବିଭାଗ । ଏନେଇ ପୋଲିସ୍ ଡିଜିଙ୍କୁ ଚିଠି ଲେଖିଛନ୍ତି ବିଭାଗୀୟ ସଚିବ ଉଷା ପାଢ଼ୀ । ଚିଠିରେ କୁହାଯାଇଛି, ମଦପିଇ ଗାଡ଼ି ଚାଳନା ରାଜ୍ୟରେ ସଡ଼କ ଦୁର୍ଘଟଣାର ଏକ ବଡ଼ କାରଣ । ଗତ ଏପ୍ରିଲ ପ୍ରଥମ ସପ୍ତାହରେ ଜିରୋ ଫାଟାଲିଟି ୱିକ୍ ପାଳନ ବେଳେ RTOମାନେ ୧୨ଶହ ୫୭ଟି ଓ ପୋଲିସ୍ ୧୩୩ଟି ମଦ୍ୟପାନ କରି ଗାଡ଼ିଚାଳନା ମାମଲା ଚିହ୍ନଟ କରିଥିଲେ ।

ମଦ୍ୟପାନ କରି ଗାଡ଼ି ଚାଳନା ପାଇଁ ମୋଟର ଯାନ ଆଇନରେ ଜେଲ୍ ଦଣ୍ଡ ଓ ଲାଇସେନ୍ସ ବାତିଲ୍ ଭଳି ଦଣ୍ଡବିଧାନ ବ୍ୟବସ୍ଥା ଥିଲେ ବି ସେମାନଙ୍କୁ ଗିରଫ ନକରି ଛାଡ଼ି ଦିଆଯାଇଥିଲା । ମଦୁଆ ଗାଡ଼ି ଚାଳକଙ୍କୁ ଗିରଫ କରି ଡ୍ରିଙ୍କ୍ ଆଣ୍ଡ ଡ୍ରାଇଭ୍‌କୁ ନିରୁତ୍ସାହିତ କରିବା ଲାଗି କଡ଼ା ଆଭିମୁଖ୍ୟ ଗ୍ରହଣ ପାଇଁ ପୋଲିସ୍ ଡିଜିଙ୍କୁ ପରାମର୍ଶ ଦିଆଯାଇଛି । ଏଥିପାଇଁ ଥାନା ଓ RTO ଗୁଡ଼ିକୁ ପର୍ଯ୍ୟାପ୍ତ ପରିମାଣର ବ୍ରିଦ୍ ଆନାଲାଇଜର ଯୋଗାଇ ଦିଆଯାଇଥିବା ମଧ୍ୟ କହିଛନ୍ତି ବିଭାଗୀୟ ସଚିବ। ଏମିତିକି ପ୍ରତି ମଙ୍ଗଳବାର ଜିରୋ ଟଲେରାନ୍ସ ଡେ’ରେ ଟ୍ରାଫିକ୍ ନିୟମ ଉଲ୍ଲଂଘନକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ନିର୍ଦ୍ଦେଶ ଦେଇଛନ୍ତି ପରିବହନ ସଚିବ ।

ମୋଟର ଯାନ ଆଇନ ଧାରା ୧୮୫ ଅନୁସାରେ, ମଦ୍ୟପାନ କରି ଗାଡ଼ି ଚାଳନା ପାଇଁ ପ୍ରଥମ ଥର ଲାଗି ଧରାପଡ଼ିଲେ ୬ ମାସ ଜେଲ୍ ଦଣ୍ଡ ବା ୧୦ ହଜାର ଟଙ୍କା ପର୍ଯ୍ୟନ୍ତ ଜରିମାନା ଅଥବା ଉଭୟ ଦଣ୍ଡରେ ଦଣ୍ଡିତ କରିବାର ବ୍ୟବସ୍ଥା ରହିଛି । ଦ୍ୱିତୀୟ ଥର ପରଠାରୁ ଏଭଳି ମାମଲାରେ ଧରାପଡ଼ିଲେ, ୨ ବର୍ଷ ପର୍ଯ୍ୟନ୍ତ ଜେଲ୍ କିମ୍ବା ୧୫ ହଜାର ଟଙ୍କା ଯାଏଁ ଜରିମାନା ବା ଉଭୟ ଦଣ୍ଡରେ ଦଣ୍ଡିତ କରାଯାଇପାରିବ । ମଦ୍ୟପାନ କରି ଗାଡ଼ି ଚଳାଉଥିବା ଚାଳକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଜରିଆରେ ସଡ଼କ ଦୁର୍ଘଟଣା ରୋକିବା ଲାଗି ରାଜ୍ୟ ସରକାରଙ୍କ କଡ଼ା ଆଭିମୁଖ୍ୟକୁ ସ୍ୱାଗତ କରିଛନ୍ତି ଗାଡ଼ି ଚାଳକ । ବିଶେଷଜ୍ଞ କହିଛନ୍ତି, ଏହି ନିୟମ ପୂର୍ବରୁ ରହିଛି। ପୋଲିସ୍ ହେଲମେଟ୍‌ ଓ ସିଟ୍ ବେଲ୍ଟ ଚେକିଂ କରୁଥିଲେ ବି ମାନବ ସମ୍ବଳ ଅଭାବରୁ ଡ୍ରିଙ୍କ୍ ଆଣ୍ଡ ଡ୍ରାଇଭ୍ ମାମଲାଗୁଡ଼ିକୁ ଅଣଦେଖା କରୁଛି। 

୨୦୨୩ ଏପ୍ରିଲ ୧ରୁ ୭ ତାରିଖ ଯାଏଁ ପାଳନ ହୋଇଥିବା ଜିରୋ ଫାଟାଲିଟି ୱିକରେ ରାଜ୍ୟରେ ସଡ଼କ ଦୁର୍ଘଟଣା ୩୯.୯ ପ୍ରତିଶତ କମିଥିବା ବେଳେ ସଡ଼କ ଦୁର୍ଘଟଣାଜନିତ ମୃତ୍ୟୁ ସଂଖ୍ୟା ୨୮.୬ ପ୍ରତିଶତ କମିଛି । ୨୦୨୧ରେ ରାଜ୍ୟରେ ୧୦ ହଜାର ୯୮୩ ସଡ଼କ ଦୁର୍ଘଟଣା ଘଟିଥିବା ବେଳେ ସେଥିରେ ପ୍ରାଣ ହରାଇଥିଲେ ୫ ହଜାର ୮୧ ଜଣ। ଏଥିରେ ବ୍ରେକ୍ ଲଗାଇବା ପାଇଁ ଚାହୁଁଛି ପରିବହନ ବିଭାଗ ।