ନିଯୁକ୍ତି ଭିତ୍ତିକ ପରୀକ୍ଷା ଆଶାୟୀଙ୍କ ସହ ସବୁବର୍ଗର ପାଠକଙ୍କ ପାଇଁ ଭରସାଯୋଗ୍ୟ ଅନୁଷ୍ଠାନଟିଏ କଟକର ପଣ୍ଡିତ ବିଶ୍ବନାଥ ପାଠାଗାର । ହେଲେ ଏହାର ବିଲ୍ଡିଂକୁ ଭାଙ୍ଗି ନେତାଜୀ ବସ ଟର୍ମିନାଲ ନିର୍ମାଣ ପରଠୁ ନଷ୍ଟ ହୋଇଯାଇଛି ଲାଇବ୍ରେରୀର ଶୈକ୍ଷିକ ବାତାବରଣ । ପଢିବାକୁ ଆବଶ୍ୟକ ପରିବେଶ ନଥିବାବେଳେ ନୂଆ କୋଠା ନିର୍ମାଣ କେବେ ସରିବ ସେନେଇ କିଛି ସ୍ପଷ୍ଟତା ନାହିଁ । ଏହାରି ଭିତରେ ବିଭିନ୍ନ କଟକଣା ପାଇଁ ପାଠକଙ୍କ ମଧ୍ୟରେ ବଢୁଛି ଅସନ୍ତୋଷ ।
କେବେ ସ୍ଥାୟୀ ଠିକଣା ପାଇବ କଟକ ବିଶ୍ବନାଥ ପାଠାଗାର ? ସମୟ ଗଡ଼ୁଛି, ହେଲେ ସରିପାରୁନି ଲାଇବ୍ରେରୀ ନିର୍ମାଣ । ନେତାଜୀ ବସ୍ ଟର୍ମିନାଲ୍ ପାଇଁ ବଳିପଡ଼ିଲା କଟକର ଅନ୍ୟତମ ଗୌରବମୟ ଅଧ୍ୟାୟ ପଣ୍ଡିତ ବିଶ୍ବନାଥ ପାଠାଗାର। ୯୦ ଦଶକରୁ ଠିଆ ହୋଇଥିବା ଲାଇବ୍ରେରୀ ଭାଙ୍ଗି ଠିଆ ହେଲା ନୂଆ ବସଷ୍ଟାଣ୍ଡ । ସେବେଠୁ ଯେମିତି ବେଘର ହୋଇପଡ଼ିଛି ବିଶ୍ବନାଥ ଲାଇବ୍ରେରୀ । ବସ ଟର୍ମିନାଲର ଦ୍ବିତୀୟ ମହଲାରେ ଅସ୍ଥାୟୀ ଭାବେ ଏହା ଚାଲୁଥିଲେ ବି ନା ଶୈକ୍ଷିକ ବାତାବରଣ ରହିଛି, ନା ପାଠକଙ୍କ ପାଇଁ ମୌଳିକ ବ୍ୟବସ୍ଥା। ଅହରହ ଗାଡ଼ିମୋଟର ଶବ୍ଦରେ ୧୦ ମିନିଟ୍ ବସି ପଢିବା ବି ମୁସ୍କିଲ । ବସିବା ପାଇଁ ସ୍ଥାନର ଅଭାବ ସାଙ୍ଗଙ୍କୁ ପାନୀୟ ଜଳ ଠୋପେ ବି ମିଳୁନି ପାଠକଙ୍କୁ ।
Also Read
ଅଧିକ ପଢ଼ନ୍ତୁ: ବଢ଼ିଲା କର୍ଣ୍ଣାଟକ ପୋଲିସ ହାଉସିଂ କର୍ପୋରେସନ୍ ଡିଜିପିଙ୍କ ଅଡୁଆ, ବାଧ୍ୟତାମୂଳକ ଛୁଟିରେ ପଠାଇଲେ ସରକାର
ସେପଟେ ନୂଆ ନିୟମକୁ ନେଇ ଉଠିଛି କେଁ । ଲାଇବ୍ରେରୀକୁ କେବଳ ୩ ଘଣ୍ଟା ପାଇଁ ମିଳୁଛି ଅନୁମତି । ପରିଚୟପତ୍ର ଅବଧିକୁ ଦୁଇ ବର୍ଷକୁ ହ୍ରାସ କରାଯାଇଛି । ଯାହାକୁ ନେଇ ପାଠକଙ୍କ ମଧ୍ୟରେ ଘୋର ଅସନ୍ତୋଷ ଦେଖିବାକୁ ମିଳିଛି ।
ଲାଇବ୍ରେରୀ ସମସ୍ୟାକୁ ନେଇ ବାରମ୍ବାର କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଛନ୍ତି ଛାତ୍ରଛାତ୍ରୀ। ହେଲେ କୌଣସି ସମାଧାନ ନହେବାରୁ ଧାରଣାରେ ବସି ସିଏମସି କମିଶନରଙ୍କୁ ଅଭିଯୋଗ ଜଣାଇଥିଲେ । ସିଏମସି କମିଶନର କହିଛନ୍ତି, ପୁରୁଣା ଅନୁଗୁଳ ବସ ଷ୍ଟାଣ୍ଡରେ ପାଠାଗାର ପାଇଁ ସ୍ଥାୟୀ ବିଲ୍ଡିଂ ନିର୍ମାଣ ଚାଲିଛି । ଆସନ୍ତା କିଛି ମାସରେ ନିର୍ମାଣ ସରିଲେ ଆନୁଷଙ୍ଗିକ ସମସ୍ୟାର ସମାଧାନ ହୋଇପାରିବ ।
ଅନ୍ୟପଟେ ପାଠକଙ୍କ ସଂଖ୍ୟା ପୂର୍ବ ଅପେକ୍ଷା ଅହେତୁକ ବୃଦ୍ଧି ପାଇଛି । ସ୍ଥିତିକୁ ଦେଖି ସମସ୍ତଙ୍କୁ ସୁଯୋଗ ଦିଆଯିବା ଭଳି ନିୟମ କରାଯାଇଛି । ଏଣୁ ସମସ୍ତଙ୍କୁ ପଠନ ପାଇଁ ୩ ଘଣ୍ଟା ପ୍ରଦାନ କରାଯାଉଛି ବୋଲି କହିଛନ୍ତି ସିଏମସି କମିଶନର। ଦେଖିବାକୁ ବାକି ରହିଲା କେବେ ସମ୍ପୂର୍ଣ୍ଣ ହେଉଛି ପଣ୍ଡିତ ବିଶ୍ବନାଥ ପାଠାଗାରର ନୂଆ ବିଲ୍ଡିଂ ନିର୍ମାଣ ।
ଅଧିକ ପଢ଼ନ୍ତୁ: ଏବେ ଫେରିବେନି ସୁନିତା, ହାଇଡ୍ରଲିକ୍ ସିଷ୍ଟମରେ ତ୍ରୁଟି କାରଣରୁ ମିଶନ ସ୍ଥଗିତ