BJD Protest: ‘ବିଜେଡିର ଆନ୍ଦୋଳନ ବେଳେ କୌଣସି ରବର ବୁଲେଟ ଫାୟାର ହୋଇନି’

ଲୋୟର ପିଏମଜିରେ ବିଜେଡିର ଆନ୍ଦୋଳନ ବେଳେ କୌଣସି ରବର ବୁଲେଟ ଫାୟାର କରାଯାଇନାହିଁ। ଏକଥା ସ୍ପଷ୍ଟ କରିଛନ୍ତି ପୋଲିସ କମିଶନର ଏସ. ଦେବଦତ୍ତ ସିଂ। ଦୁଇଟି ବ୍ୟାରିକେଡ୍ ଭାଙ୍ଗିବାରୁ କେବଳ ପାଣିମାଡ଼ ଓ ଲୁହବୁହା ଗ୍ୟାସ ମାଡ଼ କରାଗଲା। ବିଜେଡିର ଲୋକସେବା ଭବନ ଘେରାଉ ଆନ୍ଦୋଳନ ବେଳେ ପୋଲିସର ଆକ୍ସନ ନେଇ ଏହି ସୂଚନା ଦେଇଛନ୍ତି ପୋଲିସ କମିଶନର।

ସେ କହିଛନ୍ତି, ଏକ ରାଜନୈତିକ ଦଳ ଆନ୍ଦୋଳନ ପାଇଁ ଅନୁମତି ନେଇଥିଲା I ଆମେ ସୁରକ୍ଷା ଦୃଷ୍ଟି କୋଣରୁ ବ୍ୟାପକ ଫୋର୍ସ ମୁତୟନ କରିଥିଲୁ। ବ୍ୟାରିକେଡ଼ ଭାଙ୍ଗିବା ପରେ ପାଣି ମାଡ଼ ଓ ୫ଟି ସେଲ୍ ଟିୟର ଗ୍ୟାସ ମାଡ଼ କରାଯାଇଥିଲା I ଡ୍ରୋନ ସାହାଯ୍ୟରେ ସମସ୍ତ ଆନ୍ଦୋଳନକାରୀଙ୍କ ଉପରେ ନଜର ରଖାଯାଇଥିଲା । ଧାରଣାସ୍ଥଳରେ ଥିବା ସମସ୍ତ ଗତିବିଧି ଓ ଆନ୍ଦୋଳନର ଦୃଶ୍ୟ AI କ୍ୟାମେରାରେ କଏଦ ହୋଇଛି I ବିଜେଡି କର୍ମୀ ଧସେଇ ପଶି ବ୍ୟାରିକେଡ୍ ଭାଙ୍ଗିବା ବେଳେ ୭ ଜଣ ପୋଲିସ କର୍ମଚାରୀ ଆହତ ହୋଇଛନ୍ତି। ଆହତ ପୋଲିସ କର୍ମଚାରୀଙ୍କୁ କ୍ୟାପିଟାଲ ହସ୍ପିଟାଲରେ ପୋଲିସ କମିଶନର ଭେଟିଛନ୍ତି।

ତେବେ ରଣକ୍ଷେତ୍ର ପାଲଟିଲା ଲୋୟର ପିଏମଜି । ବିଜେଡି କର୍ମୀ-ପୋଲିସ୍ ମୁହାଁମୁହିଁ । ଆନ୍ଦୋଳନକାରୀଙ୍କ ଉପରେ ପୋଲିସର ପାଣି ମାଡ଼ ଓ ଲୁହବୁହା ଗ୍ୟାସ୍ ପ୍ରୟୋଗ୍ । ପାଣି ମାଡ଼ ପରେ ଛତ୍ରଭଙ୍ଗ ଦେଲେ ବିଜେଡି ନେତା ଓ କର୍ମୀ । ଏଫଏମ୍ ଛାତ୍ରୀ ମୃତ୍ୟୁ ଘଟଣାକୁ ନେଇ ବିଜେଡିର ଲୋକସେବା ଭବନ ଘେରାଉ କରିଥିଲା ।

ଆନ୍ଦୋଳନ ବେଳେ ପ୍ରଥମ ବ୍ୟାରିକେଡ୍ ଭାଙ୍ଗି ଆଗକୁ ବଢିଥିଲେ ବିଜେଡି କର୍ମୀ । ପୋଲିସ-ବିଜେଡି କର୍ମୀ ମୁହାଁମୁହିଁ ହେବାପରେ ପ୍ରଥମେ ପାଣିମାଡ଼ ପରେ ଲୁହବୁହା ଗ୍ୟାସ ପ୍ରୟୋଗ କରିଥିଲା ପୋଲିସ । ଆନ୍ଦୋଳନକାରୀଙ୍କୁ ଉଠାଇ ନେଇଛି କମିଶନରେଟ୍ ପୋଲିସ । ଶତାଧିକ ବିଜେଡି କର୍ମୀଙ୍କୁ ଉଠାଇ ନେଇ ଅଟକ ରଖିଛି ପୋଲିସ । ଆନ୍ଦୋଳନ ସମୟରେ ପୋଲିସ ସହ ଧସ୍ତାଧସ୍ତି ସମୟରେ କିଛି ବିଜେଡି ନେତା ଓ କର୍ମୀ ଆହତ ହୋଇଛନ୍ତି । ବିଜେଡି ନେତା ପ୍ରଣବ ପ୍ରକାଶ ଦାସ ଓ ପ୍ରୀତିରଞ୍ଜନ ଘଡ଼ାଇ ଆହତ ହୋଇଥିବା ସୂଚନା ମିଳିଛି ।

ଅଧିକ ପଢନ୍ତୁ: ବୋହୂଙ୍କୁ ଦୁଷ୍କର୍ମ କରି ହତ୍ୟା କଲା ଶ୍ବଶୁର, ୧୦ ଫୁଟ ଗାତରୁ ମିଳିଲା ମୃତଦେହ