Special Story: ୩ ମୁଣ୍ଡ ଗଡ଼ିଲା ପରେ ବୋହିଲା ବିକାଶର ଗଙ୍ଗା

ବହୁ ଚର୍ଚ୍ଚିତ ମାଣ୍ଡିପଙ୍କା ଆମ୍ବ ଟାକୁଆ ମୃତ୍ୟୁ ଘଟଣାକୁ ଇତି ମଧ୍ୟରେ ଗୋଟିଏ ମାସ ପୁରିଛି । ପିଡିତ ପରିବାରଙ୍କ ଆଖିରେ ଏବେ ବି ଲୁହ ଶୁଖି ପାରିନି । ଘଟଣାକୁ ନେଇ ପୂରା ଗାଁ ସ୍ତବ୍ଧ ହୋଇଥିବା ବେଳେ ରାଜ୍ୟରେ ରାଜନୈତିକ ହଟଚମଟ ଲାଗି ରହିଛି ।

ସେପଟେ ମାଣ୍ଡିପଙ୍କାର ପୂରା ରୂପ ବଦଳି ଯାଇଛି। ଗାଁରେ ଖୋଲିଛି ସରକାରୀ ଖୁଚୁରା ବିକ୍ରୟ କେନ୍ଦ୍ର, ଦାଣ୍ଡରେ ପଡିଛି ପେଭର ବ୍ଲକ, ବସିଛି ୨୪ ଘଂଟିଆ ସୋଲାର ନଳକୂପ । କେବଳ ସେତିକି ନୁହେଁ, ଗାଁର ଗରିବ ଲୋକଙ୍କୁ ଆର୍ଥିକ ସ୍ୱାବଲମ୍ବୀ କରିବା ଲାଗି ୩୭ ପରିବାରଙ୍କୁ କୁକୁଡା ଚିଆଁ ପ୍ରଦାନ କରିଛି ଜିଲ୍ଲା ପ୍ରଶାସନ ।

ଅନାହାରରେ ଗାଁର ତିନି ତିନି ଜଣଙ୍କ ମୁଣ୍ଡ ଗଲା ପରେ ଲୋକଙ୍କ ପାଖରେ ପହଞ୍ଚିଛି ଜିଲ୍ଲା ପ୍ରଶାସନ। ଆମ୍ବ ଟାକୁଆ ଖାଇ ପ୍ରଥମେ ରୁମିତା ପାଟମାଝୀ ଓ ରୁନୁ ମାଝୀଙ୍କର ମୃତ୍ୟୁ ଘଟିଥିଲା । ଆଉ ତା ପରେ କଟକ ବଡ ମେଡିକାଲରେ ଆଖି ବୁଜିଥିଲେ ଜିତା ମାଝୀ । ଗୁରୁତର ଟୁନି ମାଝୀ କିନ୍ତୁ ମୃତ୍ୟୁକୁ ପରାଜୟ କରି ନୂଆ ଜୀବନ ପାଇ ଘରକୁ ଫେରିଛନ୍ତି । ସେପଟେ ପ୍ରଶାସନ ଏହି ଘଟଣା ପରେ ସରକାରଙ୍କ ଜନହିତକର ଯୋଜନା ପହଂଚାଇବା ପାଇଁ ଅଂଟା ଭିଡିଛି । ଆହୁରି ମାଣ୍ଡିପଙ୍କା ଗାଁର ଦୁର୍ବଳ ଶ୍ରେଣୀର ପରିବାରଙ୍କୁ ଛେଳି, କୁକୁଡା ଯୋଗାଇ ଦିଆ ଯିବ ବୋଲି ଦାରିଙ୍ଗବାଡି ବିଡିଓ ପ୍ରିତିରଂଜନ ରଥ କହିଛନ୍ତି ।