ରାତାରାତି କୋଟିପତି ବନିବାର ନିଶା ଘାରିଛି ଯୁବପିଢ଼ିଙ୍କୁ । ଚବିଶି ଘଣ୍ଟା ମାତିଛନ୍ତି ଅନଲାଇନ୍ ଜୁଆରେ। କିନ୍ତୁ କିଛିଦିନ ତଳେ ଆପ୍ ରେ IPL ମ୍ୟାଚ୍ ପାଇଁ ଟିମ୍ ଗଠନ କରି କେନ୍ଦୁଝରର ଜଣେ ଯୁବକ କୋଟିପତି ବନିଥିବା ବେଳେ ସମସ୍ତଙ୍କ ଭାଗ୍ୟ କିନ୍ତୁ ସମାନ ନୁହେଁ । ବିଭିନ୍ନ ସୂତ୍ରରୁ ଯୋଗାଡ଼ କରିଥିବା ଅର୍ଥକୁ ଗ୍ୟାମ୍ବଲିଂ ଓ ବେଟିଂ ଆପ୍ ରେ ବିନିଯୋଗ କରି ସର୍ବସ୍ବାନ୍ତ ହୋଇଛନ୍ତି ବହୁ ଯୁବକ ।
ଡେଞ୍ଜର୍ ସାଜିଛି ଡିଜିଟାଲ୍ ଜୁଆ,ବରବାଦ୍ କରୁଛି ବାଜି ଲଗାଇଥିବା ଆଚ୍ଛା ଆଚ୍ଛାଙ୍କୁ,ନିଜର ମାୟାଜାଲରେ ଗୋଲ୍ କରିଦେଉଛି କଷ୍ଟ ଉପାର୍ଜିତ ଟଙ୍କା । କିଏ ସର୍ବସ୍ବାନ୍ତ ହୋଇଯାଉଛନ୍ତି ତ କିଏ ଧନଶୂନ୍ୟ ହୋଇ ହତାଶ ହେଉଛନ୍ତି । ଗଞ୍ଜାମ ଜିଲ୍ଲା ଖଲ୍ଲିକୋଟ୍ ବ୍ଲକ ଅନ୍ତର୍ଗତ ବଡ଼ରାମପଲ୍ଲୀ ଗାଁର କୃଷ୍ଣଚନ୍ଦ୍ର ମହାକୁଡ଼ ନାମକ ଜଣେ ବ୍ୟକ୍ତି ଏକ ଆପ୍ ଜରିଆରେ ଡିପୋଜିଟ୍ କରିଥିଲେ ୪ ହଜାର ଟଙ୍କା । ତାଙ୍କ ୱାଲେଟକୁ ଦିନକୁ କୁଆଡ଼େ ଆସୁଥିଲା ୮ଶହ ଟଙ୍କା । ଏହାକୁ ଦେଖି ଗାଁର ଅନ୍ୟ ଯୁବକ ପଡ଼ିଗଲେ ସେହି ଆପ୍ ମାୟାରେ । କିଛିଦିନ ଠିକଠାକ୍ ଚାଲିଲା । ପରେ କିନ୍ତୁ ବନ୍ଦ ହୋଇଗଲା ଆପ୍ । ନା ୱାଲେଟକୁ ଟଙ୍କା ଆସିଲା ନା ବ୍ୟାଙ୍କ ଆକାଉଣ୍ଟକୁ ।
Also Read
ଏଭଳି ଭାବେ ୧୨ ଜଣ ଯୁବକ ୧ ଲକ୍ଷ ୧୨ ହଜାର ହିସାବରେ ଡିପୋଜିଟ୍ କରିଥିବା ପ୍ରାୟ ୧୩ ଲକ୍ଷ ଟଙ୍କା ଚାଲିଗଲା । ଆଉ ଦର୍ଶନ ମିଳିଲାନି ସେହି ଆପ୍ ର । କେବଳ ଗଞ୍ଜାମ କାହିଁକି, ଏଭଳି ଆପ୍ ବହୁ ଲୋକଙ୍କୁ ଚୂନ ଲଗାଇଛି। କାରଣ ଆଶା, କାଳେ ଭାଗ୍ୟ ସାଥ୍ ଦେବ ଓ ବନିଯିବେ କୋଟିପତି । ସେଥିପାଇଁ ସାରା ଦେଶରେ ପ୍ରତିଦିନ କୋଟି କୋଟି ଲୋକ ଖେଳରେ ବାଜି ଲଗାଉଛନ୍ତି ।
ଏବେ ଜାରି ରହିଥିବା ଫଟାଫଟ୍ କ୍ରିକେଟ୍ ଆଇପିଏଲ୍ ଲଢ଼େଇ ଭିତରେ ଟ୍ରେଣ୍ଡରେ ଅଛି ବହୁ ଆପ୍ । ଯାହାର ପ୍ରମୋସନ୍ ବି କରୁଛନ୍ତି ସେଲିବ୍ରିଟି । ଏଭଳି ଆପ୍ ଜରିଆରେ ବେଟିଂ କରି କେନ୍ଦୁଝର ଜିଲ୍ଲାର ଗୁରୁଚରଣ ଜାମୁଦା ନାମକ ଜଣେ ଯୁବକ କୁଆଡ଼େ କୋଟିପତି ବି ବନିଛନ୍ତି । ହେଲେ ଗୁରୁଚରଣଙ୍କ ଭଳି ଭାଗ୍ୟ କୋଟିଏରେ ଗୋଟିଏ । ଲାଭ କମ୍ କ୍ଷତି ସହୁଛନ୍ତି ଅସଂଖ୍ୟ ଯୁବକ ।
ସାଇବର ଏକ୍ସପର୍ଟଙ୍କ ମତରେ ଅନଲାଇନ୍ ଗେମ୍ବଲିଂ ଏବଂ ବେଟିଂ କିଛି ରାଜ୍ୟରେ ଆଇନତଃ ବୈଧ, ତ ଆଉ କିଛି ରାଜ୍ୟରେ ଏହା ବେଆଇନ ଅଟେ । ତଥାପି ଅନଲାଇନ୍ ଜୁଆ ଓ ବେଟିଂ ବିରୋଧରେ ଆଖିଦୃଶିଆ ଆକ୍ସନ ହେଉନଥିବାରୁ ବହୁ ଆପ୍, ଭୁଆଁ ବୁଲାଉଛନ୍ତି । ଲାଭବାନ ହେଉଛନ୍ତି କେବଳ ଆପ୍ ନିର୍ମାତା କମ୍ପାନୀ ଓ ତାକୁ ପ୍ରୋମୋଟ୍ କରୁଥିବା ସେଲିବ୍ରିଟି । ତେଣୁ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ହେବା ଉଚିତ ବୋଲି ସାଇବର ଏକ୍ସପର୍ଟ ଏବଂ ଆଇନଜୀବୀ ମତ ପ୍ରକାଶ କରିଛନ୍ତି ।