କାଳ ହେଲା କ୍ରିକେଟ ଖେଳ, ଜୀବନ ହାରିଲା କୁନିପୁଅ

ସାମାନ୍ୟ କ୍ରିକେଟ ଖେଳକୁ ନେଇ ବଡ଼ ଅଘଟଣ । ନାବାଳକ ଓ ତାଙ୍କ ବାପାଙ୍କ ନାମରେ ଥାନାରେ ଏତଲା । ଆଉ ଅପମାନ ସହିନପାରି ମାନସିକ ଭାରସାମ୍ୟ ହରାଇ ନାବାଳକଙ୍କ ଆତ୍ମହତ୍ୟା । ଗଞ୍ଜାମ ଜିଲ୍ଲା ଗାଙ୍ଗପୁର ଥାନା କେ. ନୂଆଗଡ଼ ଗ୍ରାମରେ ଘଟିଛି ଏଭଳି ଆତ୍ମହତ୍ୟା । ଏ ନେଇ ଗାଙ୍ଗପୁର ଥାନାରେ ଏତଲା ଦେଇଛନ୍ତି ମୃତ ନାବାଳକଙ୍କ ବାପା ।

କେ ନୂଆଁଗଡ଼ ଗ୍ରାମର ନାରାୟଣ ପରିଡ଼ାଙ୍କ ପୁଅ କ୍ଷତ୍ରୀୟବରପୁର ସ୍ଥିତ ଓଡ଼ିଶା ଆଦର୍ଶ ବିଦ୍ୟାଳୟରେ ନବମ ଶ୍ରେଣୀରେ ପାଠ ପଢୁଥିଲେ । ଗତ ମାସ ୧୭ ତାରିଖ ଦିନ ନିଜ ସାଙ୍ଗ ମାନଙ୍କ ସହିତ ଗାଁ ଦାଣ୍ଡରେ କ୍ରିକେଟ୍ ଖେଳୁଥିବାବେଳେ, ବଲ୍ ଟି ଗ୍ରାମର ଜଣେ ମହିଳାଙ୍କ ଦେହରେ ବାଜିଥିଲା I ଏ ନେଇ ମହିଳା ଜଣକ ଗାଙ୍ଗପୁର ଥାନାରେ ନାବାଳକ ଓ ତାଙ୍କ ବାପାଙ୍କ ନାମରେ ଏତଲା ଦେଇଥିଲେ । ପୋଲିସ ମାମଲା ରୁଜୁ କରିବା ପରେ ନାବାଳକ ଜଣକ ମାନସିକ ଚାପଗ୍ରସ୍ତ ହୋଇଥିଲେ । ବାରମ୍ବାର ଗ୍ରାମ ଲୋକଙ୍କ ଟାହିଟାପରା ଶୁଣିବାପରେ ମାନସିକ ଭାରସାମ୍ୟ ହରାଇ ସେ କୀଟନାଶକ ପିଇ ଆତ୍ମହତ୍ୟା ଉଦ୍ୟମ କରିଥିଲେ । 

ଗୁରୁତର ଅବସ୍ଥାରେ ତାଙ୍କୁ ଭଞ୍ଜନଗର ମେଡିକାଲ ନିଆଯାଇଥିଲା। ହେଲେ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ଏନେଇ ଚନ୍ଦନଙ୍କ ବାପା ନାରାୟଣ ପରିଡ଼ା ଗାଙ୍ଗପୁର ଥାନାରେ ତିନି ଜଣଙ୍କ ନାମରେ ଏତଲା ଦେଇଛନ୍ତି । ସେପଟେ ଏନେଇ ପୋଲିସ ତଦନ୍ତ ଆରମ୍ଭ କରିଛି । ପୂର୍ବରୁ ଏହି ମାମଲାରେ କେବଳ ନାରାୟଣଙ୍କ ନାମରେ ଏତଲା ହୋଇଥିଲା, ଘଟଣା ପରେ ନାରାୟଣ ଦେଇଥିବା ଏତଲାକୁ ଭିତ୍ତି କରି ତଦନ୍ତ ଚାଲିଥିବା ଗାଙ୍ଗପୁର IIC କହିଛନ୍ତି ।