LIVE TV
ଆଜି ମୃଣ୍ମୟୀ ଦେବୀଙ୍କ ମହାଷ୍ଟମୀରେ ରାଜଧାନୀର ବିଭିନ୍ନ ପୂଜା ମଣ୍ଡପକୁ ଯାଇ ମହିଷାମର୍ଦ୍ଦିନୀଙ୍କୁ ଦର୍ଶନ ସହ କୃପା ଭିକ୍ଷା କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ସାଥିରେ ଥିଲେ ପତ୍ନୀ ପ୍ରିୟଙ୍କା ମାରାଣ୍ଡି । ମୁଖ୍ୟମନ୍ତ୍ରୀ ପ୍ରଥମେ ପୁରୁଣା ଭୁବନେଶ୍ବରର ପାଟଣାସାହି ପୂଜାମଣ୍ଡପରୁ ଦର୍ଶନ ଆରମ୍ଭ କରିଥିଲେ। ତାପରେ ସୁନ୍ଦରପଦା, ବରମୁଣ୍ଡା, ନୟାପଲ୍ଲୀ, ସହିଦନଗର, ରସୁଲଗଡ଼, ବମିଖାଲ, ପୁରୁଣା ଷ୍ଟେସନବଜାର ଓ ଲକ୍ଷ୍ମୀସାଗର ପୂଜା ପେଣ୍ଡାଲ ବୁଲି ଦେବୀ ଦର୍ଶନ କରିଥିଲେ ।
Also Read
ମୁଖ୍ୟମନ୍ତ୍ରୀ କହିଛନ୍ତି- ମା'ଙ୍କ ନିକଟରେ ସେ ରାଜ୍ୟବାସୀଙ୍କ ସୁଖ, ସମୃଦ୍ଧି କାମନା କରିଛନ୍ତି । ତା ସହ ସାଢ଼େ ୪ କୋଟି ଓଡ଼ିଆଙ୍କ ଭାଗ୍ୟରେ ପରିବର୍ତ୍ତନ ହେଉ ଓ ସମସ୍ତେ ଓଡ଼ିଶାକୁ ପରିବର୍ତ୍ତନ କରିବା ରାସ୍ତାରେ ଯାଆନ୍ତୁ ବୋଲି ଗୁହାରି କରିଛନ୍ତି । ଏହାବାଦ୍ ରାଜ୍ୟବ୍ୟାପୀ ସବୁ ଦୁର୍ଗା ପେଣ୍ଡାଲର ରେଣ୍ଟ ଛାଡ଼ କରିବାକୁ ବି ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ । ପ୍ରଥମ ଥର ପାଇଁ ଜଣେ ମୁଖ୍ୟମନ୍ତ୍ରୀଙ୍କୁ ସପତ୍ନିକ ପାଖରେ ପାଇ ବେଶ୍ ଖୁସି ହୋଇ ସମ୍ବର୍ଦ୍ଧିତ କରିଥିଲେ ବିଭିନ୍ନ ପୂଜା ମଣ୍ଡପର କର୍ମକର୍ତ୍ତା ।
ତେଣେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବି ଆଜି ବୁଲିଛନ୍ତି ରାଜଧାନୀର ତିନି ପ୍ରମୁଖ ପୂଜା ପେଣ୍ଡାଲ ରସୁଲଗଡ଼, ସହିଦନଗର ଓ ବରଗଡ଼ । ସାଙ୍ଗରେ ଥିଲେ ମେୟର, ଉତ୍ତର ଭୁବନେଶ୍ବର ବିଧାୟକ ଓ ଅନ୍ୟ ବିଜେଡି ନେତା । ରାଜ୍ୟବାସୀଙ୍କ ସୁଖ ସମୃଦ୍ଧି ପାଇଁ ମାଆଙ୍କୁ ପ୍ରାର୍ଥନା କରିଥିବା ନବୀନ ଧାଡ଼ିକିଆ ପ୍ରତିକ୍ରିୟା ରଖିଥିବାବେଳେ ତାଙ୍କ ମଣ୍ଡପ ବୁଲାକୁ ନେଇ କିନ୍ତୁ ତେଜିଛି ରାଜନୀତି । ଭୁବନେଶ୍ବର ମେୟର କହିଛନ୍ତି- ନବୀନ ଏବେ ବି ଲୋକଙ୍କ ହୃଦୟରେ ଅଛନ୍ତି ଓ ତାଙ୍କର କ୍ରେଜ୍ ଅତୁଟ ରହିଛି ।
ତେଣେ ନବୀନଙ୍କ ମଣ୍ଡପ ବୁଲାକୁ ଅସ୍ବାଭାବିକ ଦର୍ଶାଇ ତେରଛା ବାଣ ମାରିଛି ବିଜେପି । ଆଇନମନ୍ତ୍ରୀ ପୃଥୀରାଜ ହରିଚନ୍ଦନ ଆକ୍ଷେପ କରିଛନ୍ତି- ଯିଏ ୨୪ ବର୍ଷ ଧରି ମୋଟେ ପୂଜା ମଣ୍ଡପ ବୁଲି ନଥିଲେ, ଏବେ ମୁଖ୍ୟମନ୍ତ୍ରୀ ମୋହନ ମାଝୀ ବୁଲୁଥୁବା କଥା ଶୁଣି ସିଏ ବୁଲୁଛନ୍ତି । ଯିଏ ରାବଣପୋଡ଼ି ଉତ୍ସବକୁ ବି ଯିବାକୁ ଅମଙ୍ଗ ହୁଅନ୍ତି, ସେ ଏବେ ନିର୍ବାଚନ ବେଳ ଭଳି ପ୍ରତିଦ୍ବନ୍ଦ୍ବିତା କରି ପେଣ୍ଡାଲ ବୁଲୁଛନ୍ତି । ତାଙ୍କୁ ଲୋକେ କେମିତି ଗ୍ରହଣ କରିବେ ବୋଲି ପାଲଟା ପ୍ରଶ୍ନ କରିଛନ୍ତି ପୃଥ୍ବୀରାଜ ।
ସେପଟେ ଚଳିତ ବର୍ଷ ଦୁର୍ଗାପୂଜା ପେଣ୍ଡାଲରେ ନୂଆ ଦୃଶ୍ୟ କ୍ରମେ ମୁଖ୍ୟମନ୍ତ୍ରୀ ଓ ପୂର୍ବତନ ମୁଖ୍ୟମନ୍ତ୍ରୀଙ୍କ ଦୁର୍ଗା ଦର୍ଶନକୁ ରାଜନୈତିକ ସମୀକ୍ଷକ କିନ୍ତୁ ଭିନ୍ନ ନଜରରେ ଦେଖୁଛନ୍ତି । ଆଉ ସାଧାରଣ ଲୋକଙ୍କ ମତ ନେତାଙ୍କ ମଣ୍ଡପ ବୁଲାରେ ରାଜନୀତି ନପଶୁ । ଆସନ୍ତାକାଲି ମହାନବମୀରେ ମୁଖ୍ୟମନ୍ତ୍ରୀ, କଟକ ଓ ଦଶହରା ଦିନ ନିଜ ଜିଲ୍ଲା କେନ୍ଦୁଝରର ବିଭିନ୍ନ ପୂଜାମଣ୍ଡପ ବୁଲିବାର କାର୍ଯ୍ୟକ୍ରମ ରହିଛି ।
