LIVE TV
କିଏ ରାସନକାର୍ଡ ପାଇବେ ନାହିଁ, ତା’ ତଥ୍ୟ ଏବେ ସାମନାକୁ ଆସିଛି । ପ୍ରାଥମିକ ତଦନ୍ତ ରିପୋର୍ଟ ବି ଆସିଯାଇଛି । ଏବେ କାର୍ଯ୍ୟାନୁଷ୍ଠାନ ହେବ । ତେବେ ଏହାରି ଭିତରେ କାର୍ଡ ହାତେଇ ଚାଉଳ ଚଳୁ କରିଛନ୍ତି ଜଣେ ଅଧ୍ୟକ୍ଷା ମ୍ୟାଡମ । ମ୍ୟାଡମଙ୍କ ନାଁରେ ଚାରି ଚକିଆ କାର ଅଛି । ଟିଟିଲାଗଡ ସହରରେ ନିର୍ମାଣ ହେଉଛି ଆଲିଶାନ କୋଠା । ଖାଲି ଗୋଟିଏ ବଙ୍ଗଳା ନୁହେଁ, ଗାଁରେ ବି ଘର ଅଛି । ଏମିତିକି କହିବାକୁ ଗଲେ ସରକାରୀ ଦରମା କହିଲେ ମିଳୁଛି ୧୫ ହଜାର । କିନ୍ତୁ ମ୍ୟାଡମ୍ଙ୍କୁ ଘାରିଛି ଚାଉଳ ଚଳୁ କରିବାର ନିଶା।
ଏପଟେ ଜିଲ୍ଳା ମୁଖ୍ୟ ଯୋଗାଣ ଅଧିକାରୀ ସ୍ପଷ୍ଟ ଉତ୍ତର ରଖିଛନ୍ତି, ନିୟମ ଅନୁଯାୟୀ, ପ୍ରଥମେ ବଜାର ମୂଲ୍ୟରେ ଦଶ ପ୍ରତିଶତ ସୁଧ ସହିତ ନେଇଥିବା ଚାଉଳ ଆଦାୟ କରାଯିବ । ଦ୍ବିତୀୟରେ ଅପରାଧିକ ମାମଲା ରୁଜୁ କରାଯିବ । ତୃତୀୟରେ ସରକାର କାର୍ଯ୍ୟାନୁଷ୍ଠାନ ନେବେ । ଏକଥା ଶୁଣି ମ୍ୟାଡମ ବି ଭୁଲ୍ ମାନିଛନ୍ତି ।
Also Read
ଅଧିକ ପଢ଼ନ୍ତୁ: ଡିଜିଟାଲ ଆରେଷ୍ଟ; ଠକି ନେଲେ ୫୦ ଲକ୍ଷ, ଜୀବନ ହାରିଲେ ସ୍ବାମୀ-ସ୍ତ୍ରୀ...
ଅଧ୍ୟକ୍ଷା ମ୍ୟାଡମ ସଂଯୁକ୍ତା ନାଏକଙ୍କ ଘର ବଲାଙ୍ଗିର ଜିଲ୍ଲା ମନିଗାଁ ପଞ୍ଚାୟତରେ । ପୂରା ଗାଁରେ ରହିଛି ଝାଟିମାଟି ଘର । ଗାଁରେ ରହୁଥିବା ଗରିବ ଗୁରୁବା ଚାଉଳ ପାଇବାରୁ ବଞ୍ଚିତ ଅଛନ୍ତି । ସମସ୍ତ ଯୋଗ୍ୟତା ଥାଇ ସୁଦ୍ଧା ସରକାରୀ ଚାଉଳ ପାଉନାହାନ୍ତି ଗାଁର ଖଟିଖିଆ ମଜୁରିଆ । କିନ୍ତୁ ଆଲିଶାନ ଘରେ ରହି, ଚାରିଚକିଆ କାର ଚଢି, ଚାଉଳ ନେଉଥିଲେ ମ୍ୟାଡମ ଅଧ୍ୟକ୍ଷା ।
ତେବେ ଇ.କେ.ୱାଇ.ସି ପରେ, ସାମ୍ନାକୁ ଆସିଲା ମ୍ୟାଡମଙ୍କ କଳା ଚେହେରା । କିନ୍ତୁ କାର୍ଯ୍ୟାନୁଷ୍ଠାନ ନେବା ପରିବର୍ତ୍ତେ, ତୁନି ପଡିଥିଲା ପ୍ରଶାସନ । ଏନେଇ ଓଟିଭିରେ ଖବର ପ୍ରସାରଣ ପରେ ଏବେ ପ୍ରଶାସନର ତଦନ୍ତ ବାହାନା । କିନ୍ତୁ ଏଇଠି ପ୍ରଶ୍ନ, ଜାନୁୟାରୀ ମାସରୁ କାର୍ଡ କଟିଥିଲେ ବି, ମାର୍ଚ୍ଚ ମାସ ଯାଏ କାହିଁକି ଅଧ୍ୟକ୍ଷାଙ୍କୁ ଅନୁକଂପା ଦେଖାଉଛି ପ୍ରଶାସନ । ସେପଟେ ଲୋକେ କହିଲେଣି, ଧନୀ ଲୁଟୁଛନ୍ତି, ଗରିବ ବାଦ ପଡୁଛନ୍ତି । ଏ ସଂପର୍କରେ ଅଧ୍ୟକ୍ଷା ମ୍ୟାଡମ ସଂଯୁକ୍ତା ନାଏକଙ୍କ ପ୍ରତିକ୍ରିୟା ମିଳିପାରିନାହିଁ ।
ଅଧିକ ପଢନ୍ତୁ: ସରି ଆସୁଛି ଲାଲଗଡ଼ରେ ମାଓବାଦୀଙ୍କ ଆୟୁଷ; ମୂଳପୋଛ ହୋଇଯିବେ ବିକାଶ ବିରୋଧୀ !
