Suicide Rates Rising in Men: ପୁରୁଷଙ୍କ ମଧ୍ୟରେ ବଢ଼ୁଛି ଆତ୍ମହତ୍ୟା ପ୍ରବଣତା, ରକ୍ଷା ପାଇବାକୁ ଟିପ୍ସ ଦେଲେ ଏକ୍ସପର୍ଟ

ଆତ୍ମହତ୍ୟା ଏକ ଅପରାଧ। ଏଭଳି ଏକ ଘୃଣ୍ୟ ମାନସିକତାକୁ ମନରୁ ଦୂରେଇବା ଓ ଲୋକଙ୍କ ମଧ୍ୟରେ ସଚେତନତା ଜାଗ୍ରତ କରିବା ଉଚିତ। ଆତ୍ମହତ୍ୟାର କୌଣସି ଗୋଟିଏ କାରଣ ନାହିଁ। ଏପରି ଚରମ ପଦକ୍ଷେପ ନେଉଥିବା ବ୍ୟକ୍ତି ସାମାଜିକ, ସାଂସ୍କୃତିକ, ବ୍ୟବସ୍ଥାଗତ ଓ ଅର୍ଥନୈତିକ ପରିସ୍ଥିତି ଦ୍ୱାରା ଗଭୀର ଭାବରେ ପ୍ରଭାବିତ ହୁଅନ୍ତି । ଯେଉଁ ହାରରେ ଦେଶରେ ଆତ୍ମହତ୍ୟା ବଢ଼଼ିଚାଲିଛି, ତାହା ବର୍ତ୍ତମାନ ସାଧାରଣରେ ଚିନ୍ତାର ବିଷୟ ପାଲଟିଛି। ବର୍ତ୍ତମାନ ସମୟରେ ଆତ୍ମହତ୍ୟାର ଅନେକ ଘଟଣା ଦେଖିବାକୁ ମିଳୁଛି। ଜୀବନର କୌଣସି ନା କୌଣସି ଏକ ସମୟରେ ପ୍ରତ୍ୟେକ ବ୍ୟକ୍ତି ହତାଶ ଅନୁଭବ କରିବା ସ୍ୱାଭାବିକ। ପିଲାମାନେ ଇଚ୍ଛା ମୁତାବକ ନମ୍ବର ନ ପାଇ ନିରାଶ ହୁଅନ୍ତି, ଯୁବକମାନେ ଚାକିରି ନ ପାଇ ଜୀବନକୁ ବୋଝ ବୋଲି ଅନୁଭବ କରନ୍ତି ଏବଂ ପ୍ରେମିକ ପ୍ରେମିକାମାନେ ବ୍ରେକ-ଅପ୍ ପରେ ଏକାକୀତ୍ୱକୁ ଦୂରେଇବାକୁ ଯାଇ ଅନେକ କିଛି କରିବସନ୍ତି । ଏପରି ଅନେକ ପରିସ୍ଥିତି ଆସେ, ଯେତେବେଳେ ଜଣେ ବ୍ୟକ୍ତି ହତାଶ ଆଉ ଅତିଷ୍ଠ ହୋଇ ଆତ୍ମହତ୍ୟା କରିବାକୁ ଚେଷ୍ଟା କରେ ।

ନିକଟରେ ଉତ୍ତର ପ୍ରଦେଶର ରାଜଧାନୀ ଲକ୍ଷ୍ନୌର ଓକିଲ ଅନୁପମ ତିୱାରୀ ଇନ୍ଦିରା ଡ୍ୟାମକୁ ଡେଇଁ ଆତ୍ମହତ୍ୟା କରିଛନ୍ତି। ସେହିପରି ଇନ୍ଦୋରର ଏକ ବ୍ୟାଙ୍କରେ ସେଲ୍ସ ଏକଜିକ୍ୟୁଟିଭ୍ ଭାବରେ କାମ କରୁଥିବା ଜଣେ ଯୁବତୀ ନିଜ ହାତ କାଟି ଆତ୍ମହତ୍ୟା କରିଛନ୍ତି। କୋଟାରେ ଜଣେ ୨୫ ବର୍ଷୀୟ ଛାତ୍ର ତାଙ୍କ ରୁମରେ ଫ୍ୟାନରେ ଫାଶୀ ଲଗାଇ ଆତ୍ମହତ୍ୟା କରିଛନ୍ତି। ଦିଲ୍ଲୀରେ ଜଣେ ବ୍ୟବସାୟୀ ତାଙ୍କ ପରିବାର ସହିତ ବିଷାକ୍ତ ପଦାର୍ଥ ଖାଇ ଆତ୍ମହତ୍ୟା କରିଛନ୍ତି। ପ୍ରତିଦିନ ଆମେ ଏପରି ଖବର ପଢ଼ିବାକୁ ଏବଂ ଶୁଣିବାକୁ ପାଉଛୁ। ଦେଶରେ ଆତ୍ମହତ୍ୟା ପରିସଂଖ୍ୟାନ ଅତି ଭୟଙ୍କର। ପ୍ରତିଦିନ ୪୬୮ ରୁ ଅଧିକ ଲୋକ ପ୍ରାଣ ହରାଉଛନ୍ତି, ଯେଉଁଥରେ ୭୨ ପ୍ରତିଶତ ପୁରୁଷ ଅଛନ୍ତି।

ପ୍ରତିବର୍ଷ ମେ ମାସକୁ ମାନସିକ ସ୍ୱାସ୍ଥ୍ୟ ସଚେତନତା ମାସ ଭାବରେ ପାଳନ କରାଯାଏ। ଏଥର ମାନସିକ ସ୍ୱାସ୍ଥ୍ୟ ସଚେତନତା ମାସର ବିଷୟବସ୍ତୁ ହେଉଛି - 'In Every Story, There's Strength' । ଏଥର ସଚେତନତା ମାସରେ ପୁରୁଷମାନଙ୍କ ମାନସିକ ସ୍ୱାସ୍ଥ୍ୟ ଉପରେ ବିଶେଷ ଗୁରୁତ୍ୱ ଦିଆଯାଉଛି।

ଜାତୀୟ ଅପରାଧ ରେକର୍ଡ ବ୍ୟୁରୋ (NCRB) ର ୨୦୨୨ ରିପୋର୍ଟ ଅନୁଯାୟୀ, ୨୦୨୨ ମସିହାରେ ୧ ଲକ୍ଷ ୭୧ ହଜାର ଲୋକ ଆତ୍ମହତ୍ୟା କରିଥିଲେ । ଏହା ସହିତ ଆତ୍ମହତ୍ୟା କ୍ଷେତ୍ରରେ ଭାରତ ବିଶ୍ୱରେ ଶୀର୍ଷରେ ପହଞ୍ଚିଥିଲା । ଆତ୍ମହତ୍ୟା କରିଥିବା ଲୋକଙ୍କ ମଧ୍ୟରେ ୧ ଲକ୍ଷ ୨୨ ହଜାର ୭୨୪ ପୁରୁଷ ଏବଂ ୪୮ ହଜାର ୨୮୬ ମହିଳା ଥିଲେ। ପୁରୁଷମାନଙ୍କ ପ୍ରତି ଭାବପ୍ରବଣ ଅବହେଳା ଏବଂ ପୁରୁଷମାନଙ୍କ ମଧ୍ୟରେ ବୃଦ୍ଧି ପାଉଥିବା ମାନସିକ ସ୍ୱାସ୍ଥ୍ୟ ସମସ୍ୟା ବିଷୟରେ ଏନସିଆରବି ରିପୋର୍ଟରେ ଚିନ୍ତା ପ୍ରକାଶ ପାଇଥିଲା ।

ଏସବୁ ମଧ୍ୟରେ ପ୍ରଶ୍ନ ଉଠେ ଦେଶର କେଉଁ ରାଜ୍ୟଗୁଡ଼ିକରେ ସର୍ବାଧିକ ଲୋକ ଆତ୍ମହତ୍ୟା କରୁଛନ୍ତି ? ପୁରୁଷ ଏବଂ ମହିଳା କାହିଁକି ଆତ୍ମହତ୍ୟା କରୁଛନ୍ତି, ଉଭୟ ଆତ୍ମହତ୍ୟା କରିବାର କାରଣ ସମାନ ନା ଭିନ୍ନ? ଆତ୍ମହତ୍ୟା ଚିନ୍ତାଧାରା ଆସିଲେ କ'ଣ କରିବେ, ଆପଣଙ୍କ ଚାରିପାଖରେ ଥିବା ଲୋକଙ୍କୁ କିପରି ଚିହ୍ନଟ କରିବେ ଏବଂ ରକ୍ଷା କରିବେ? ମାନସିକ ସ୍ୱାସ୍ଥ୍ୟ ସଚେତନତା ମାସରେ ବିଶେଷଜ୍ଞଙ୍କମାନେ ଅନେକ ଟିପ୍ସ ଦେଇଛନ୍ତି..

କେଉଁ ରାଜ୍ୟରେ ଆତ୍ମହତ୍ୟା ମାମଲା ସର୍ବାଧିକ ?

ମହାରାଷ୍ଟ୍ର ୨୨,୭୪୬
ତାମିଲନାଡୁ ୧୯,୮୩୪
ମଧ୍ୟପ୍ରଦେଶ ୧୫,୩୮୬
କର୍ଣ୍ଣାଟକ ୧୩୬୦୬
ପଶ୍ଚିମବଙ୍ଗ ୧୨୬୬୯
କେରଳ ୧୦୧୬୨
ତେଲେଙ୍ଗାନା ୯୯୮୦
ଗୁଜୁରାଟ ୯୦୦୨
ଆନ୍ଧ୍ର ପ୍ରଦେଶ ୮୯୦୮
ଛତିଶଗଡ଼ ୮୪୪୬
ଉତ୍ତର ପ୍ରଦେଶ ୮୧୭୬

ଜାତୀୟ ଅପରାଧ ରେକର୍ଡ ବ୍ୟୁରୋ (NCRB) ର ୨୦୨୨ ରିପୋର୍ଟ ଅନୁଯାୟୀ, ସର୍ବାଧିକ ଆତ୍ମହତ୍ୟା ମାମଲା ମହାରାଷ୍ଟ୍ର, ତାମିଲନାଡୁ ଏବଂ ମଧ୍ୟପ୍ରଦେଶରୁ ଆସିଥିଲା । ରିପୋର୍ଟ ଅନୁସାରେ ୩୦ ରୁ ୪୫ ବର୍ଷ ବୟସର ଲୋକମାନେ ଆତ୍ମହତ୍ୟା କରିବାର ସମ୍ଭାବନା ଅଧିକ । ଏହା ପରେ ୧୮ ରୁ ୩୦ ବର୍ଷ ବୟସ ମଧ୍ୟରେ ଏବଂ ୪୫ ରୁ ୬୦ ବର୍ଷ ମଧ୍ୟରେ ଅଧିକ ବ୍ୟକ୍ତି ଆତ୍ମହତ୍ୟା କରନ୍ତି ।

ଆତ୍ମହତ୍ୟାର କାରଣ କ’ଣ ?

ଆତ୍ମହତ୍ୟା କରିବାର ପ୍ରତ୍ୟେକ ବ୍ୟକ୍ତିଙ୍କର ଭିନ୍ନ କାରଣ ରହିଛି । NCRB ରିପୋର୍ଟ ଅନୁଯାୟୀ, ପାରିବାରିକ ସମସ୍ୟା (୩୧.୭%) ଏବଂ ରୋଗ (୧୮.୪%) ଯୋଗୁଁ ସର୍ବାଧିକ ସଂଖ୍ୟକ ଲୋକ ଆତ୍ମହତ୍ୟା କରୁଛନ୍ତି। ଏହାବ୍ୟତୀତ ଆତ୍ମହତ୍ୟାର ଆହୁରି ଅନେକ କାରଣ ରହିଛି..

୧. ଅବସାଦର ଶିକାର - ଦୀର୍ଘକାଳୀନ ଡିପ୍ରେସନ ଯୋଗୁଁ ମନରେ ଆତ୍ମହତ୍ୟାର ଚିନ୍ତାଧାରା ବଢ଼ିବାକୁ ଲାଗେ । ବ୍ୟକ୍ତିଟି ହତାଶ ଅନୁଭବ କରେ ଏବଂ ପ୍ରତ୍ୟେକ ସମସ୍ୟା ପାଇଁ ନିଜକୁ ଦୋଷ ଦେବାକୁ ଆରମ୍ଭ କରେ। ଏହି କାରଣରୁ ଏପରି ଲୋକମାନେ ଛୋଟ ଜିନିଷକୁ ବଡ଼ ରୂପ ଦେଇ ଚିତ୍କାର କରିବା ଆରମ୍ଭ କରନ୍ତି।

୨. ଦୀର୍ଘକାଳୀନ ଶାରୀରିକ ରୋଗରେ ପୀଡିତ ହେବା- ଯେଉଁମାନେ ଦୀର୍ଘ ସମୟ ଧରି କୌଣସି ଶାରୀରିକ ରୋଗରେ ପୀଡିତ ଅଛନ୍ତି, ସେମାନେ ନିଜକୁ ଅସହାୟ ଭାବିବା ଆରମ୍ଭ କରନ୍ତି। ତାଙ୍କ ପ୍ରତି ଅନ୍ୟମାନଙ୍କର ଦୟା ଭାବନା ତାଙ୍କୁ ଅସହଜ ମନେହୁଏ। ନିଜ କାମ ପାଇଁ ଅନ୍ୟମାନଙ୍କ ଉପରେ ନିର୍ଭରଶୀଳ ହେବା ହେତୁ ସେମାନେ ଆତ୍ମହତ୍ୟା କରିବାକୁ ଚେଷ୍ଟା କରନ୍ତି।

୩. ନିଶାଦ୍ରବ୍ୟ ଲୋକ : ମଦ୍ୟପାନ, ଧୂମପାନ ଏବଂ ନିଶାଦ୍ରବ୍ୟ ସେବନ କରୁଥିବା ଅଧିକାଂଶ ଲୋକ ଆତ୍ମହତ୍ୟା କରିବାକୁ ଚେଷ୍ଟା କରନ୍ତି। ପ୍ରକୃତରେ ଅତ୍ୟଧିକ ନିଶା ଶାରୀରିକ ଏବଂ ମାନସିକ ସ୍ୱାସ୍ଥ୍ୟକୁ କ୍ଷତି ପହଞ୍ଚାଏ। ଏହା କିଡନୀ ଏବଂ ଫୁସଫୁସ ସମେତ ଶରୀରର ଅନ୍ୟାନ୍ୟ ଅଙ୍ଗକୁ ପ୍ରଭାବିତ କରେ।

୪. ଆବେଗପୂର୍ଣ୍ଣ ବ୍ୟକ୍ତିତ୍ୱର ଲୋକ- ଯେଉଁ ଲୋକମାନେ ପ୍ରତ୍ୟେକ ଛୋଟ ଛୋଟ କଥାରେ ରାଗିଯାଆନ୍ତି ଏବଂ ନିଜକୁ ଠିକ୍ ବୋଲି ଭାବନ୍ତି, ସେମାନେ ଏପରି ବ୍ୟକ୍ତିତ୍ୱ ବିକାରର ଶିକାର ହୁଅନ୍ତି। ଆବେଗପୂର୍ଣ୍ଣ ବ୍ୟକ୍ତିତ୍ୱ ବିକାର ମଧ୍ୟ ଆତ୍ମହତ୍ୟାର କାରଣ ହୁଏ।

ପୁରୁଷ ଏବଂ ମହିଳାଙ୍କ କାରଣ ଭିନ୍ନ ଭିନ୍ନ

ମହିଳା: ଯୌତୁକ ଦାବି, ବାରମ୍ବାର ବିବାହ ଭାଙ୍ଗିବା, ସାମାଜିକ ପ୍ରତିଷ୍ଠାର ଭୟ, ଘରୋଇ ହିଂସା ଭଳି ପାରିବାରିକ ସମସ୍ୟାରେ ଅତିଷ୍ଠ ହୋଇ ସେମାନେ ଆତ୍ମହତ୍ୟା କରନ୍ତି।

ପୁରୁଷ: ଚାକିରିରୁ ବହିଷ୍କାର, ବ୍ୟବସାୟରେ କ୍ଷତିର ସମ୍ମୁଖୀନ ହେଲେ, ଋଣଗ୍ରସ୍ତ ହେଲେ, ସମ୍ପତ୍ତି ବିବାଦର ସମ୍ମୁଖୀନ ହେଲେ, ପ୍ରେମରେ ବିଫଳ ହେଲେ, ସାକ୍ଷାତକାର କିମ୍ବା ପରୀକ୍ଷାରେ ବିଫଳ ହେଲେ ସେମାନେ ମୃତ୍ୟୁକୁ ଆଲିଙ୍ଗନ କରନ୍ତି।

ପୁରୁଷ କାହିଁକି ଅଧିକ ଆତ୍ମହତ୍ୟା କରୁଛନ୍ତି?

ସମାଜରେ ପୁରୁଷଙ୍କୁ ଶକ୍ତିଶାଳୀ ବୋଲି ବିବେଚନା କରାଯାଏ । କାହା ସାମ୍ନାରେ ମାନସିକ ଦୁର୍ବଳତା ପ୍ରକାଶ ନ କରିବାକୁ ଛୋଟରୁ ଶିକ୍ଷା ମିଳିଥାଏ । ସମସ୍ତ ପରିସ୍ଥିତିରେ ଶକ୍ତିଶାଳୀ ହେବାର ଅଭିନୟ କରିବାକୁ ଏବଂ ନୀରବରେ କଷ୍ଟ ସହିବାକୁ କୁହାଯାଇଥାଏ । ସେଥିପାଇଁ ସେମାନେ ନିଜ ମନରେ ଚାଲିଥିବା ଦ୍ୱନ୍ଦ୍ୱ, ନିରାଶା ଏବଂ ହତାଶାକୁ ନିଜ ପରିବାର କିମ୍ବା ବନ୍ଧୁମାନଙ୍କ ସହିତ ବାଣ୍ଟି ପାରନ୍ତି ନାହିଁ ଏବଂ ଶେଷରେ ସେମାନେ ହାର ମାନି ମୃତ୍ୟୁକୁ ଆଲିଙ୍ଗନ କରନ୍ତି।

ବର୍ତ୍ତମାନ ସମୟରେ ପୁରୁଷମାନଙ୍କ ପ୍ରତି ଅତ୍ୟାଚାରର ଘଟଣା ବୃଦ୍ଧି ପାଇଛି। ଏଥିରେ ମିଥ୍ୟା ଅଭିଯୋଗ ଏବଂ ଭାବପ୍ରବଣ ନିର୍ଯାତନା ଠାରୁ ଆରମ୍ଭ କରି ଘରୋଇ ହିଂସା ଏବଂ ଆଇନଗତ ନିର୍ଯାତନା ପର୍ଯ୍ୟନ୍ତ ମାମଲା ସାମିଲ ରହିଛି। ମିଥ୍ୟା ଅଭିଯୋଗ ଯୋଗୁଁ ଜଣେ ମାନସିକ, ଆଇନଗତ ଏବଂ ସାମାଜିକ ଭାବରେ ନିର୍ଯାତିତ ଅନୁଭବ କରେ। ଏହା ସେମାନଙ୍କୁ ମାନସିକ ଆଘାତ ଦିଏ, ଯାହାକୁ ବୁଝିବାକୁ ଚେଷ୍ଟା କରାଯାଏ ନାହିଁ।

୫୨ ପ୍ରତିଶତ ପୁରୁଷ ହିଂସାର ଶିକାର

ହରିୟାଣାରେ ହୋଇଥିବା ଏକ ସାମ୍ପ୍ରତିକ ଅଧ୍ୟୟନରୁ ଜଣାପଡିଛି, ୫୨.୪% ବିବାହିତ ପୁରୁଷ ଲିଙ୍ଗ-ଭିତ୍ତିକ ହିଂସାର ଶିକାର ହୋଇଛନ୍ତି, କିନ୍ତୁ ସେମାନଙ୍କୁ ନା ଆଇନଗତ ସହାୟତା ମିଳିଛି ନା ମାନସିକ ସମର୍ଥନ ମିଳିଛି। ସମାଜ ପୁରୁଷମାନଙ୍କ ଯନ୍ତ୍ରଣାକୁ ଅଣଦେଖା କରୁଛି ବୋଲି ଅଧ୍ୟୟନରେ କୁହାଯାଇଛି । ଏହାକୁ ତୁରନ୍ତ ସଂଶୋଧନ କରିବା ସମୟର ଆବଶ୍ୟକତା।

ଇଣ୍ଡିଆନ୍ ଆସୋସିଏସନ୍ ଅଫ୍ କ୍ଲିନିକାଲ୍ ସାଇକୋଲୋଜିଷ୍ଟସ୍ର ସାଧାରଣ ସମ୍ପାଦକଙ୍କ ଅନୁସାରେ, ଯେଉଁ ପୁରୁଷମାନଙ୍କୁ ମିଥ୍ୟା ଅଭିଯୁକ୍ତ କରାଯାଏ କିମ୍ବା ନିର୍ଯାତନାର ଶିକାର କରାଯାଏ, ସେମାନେ ପ୍ରତିଶୋଧ କିମ୍ବା ଅବିଶ୍ୱାସର ଭୟରେ ନୀରବରେ କଷ୍ଟ ପାଆନ୍ତି। ତିକ୍ତ ଅଭିଜ୍ଞତା କେବଳ ସେମାନଙ୍କର ମାନସିକ ସ୍ୱାସ୍ଥ୍ୟକୁ ପ୍ରଭାବିତ କରେ ନାହିଁ, ବରଂ ସେମାନଙ୍କର ପରିଚୟ ଏବଂ ସୁରକ୍ଷା ଭାବନାକୁ ମଧ୍ୟ କ୍ଷୁର୍ଣ୍ଣ କରେ। ଫଳସ୍ୱରୂପ ସେମାନେ ଏକାକୀ, ଆକ୍ରମଣ ପ୍ରବଣ ଏବଂ ନିଶାର ଶିକାର ହୁଅନ୍ତି କିମ୍ବା ଆତ୍ମହତ୍ୟା ମଧ୍ୟ କରନ୍ତି।

୨୦୧୩-୧୪ ମସିହାରେ କରାଯାଇଥିବା ଏକ ସର୍ଭେରୁ ଜଣାପଡିଛି ୨୦୧୩-୧୪ ମଧ୍ୟରେ ପଞ୍ଜିକୃତ ମୋଟ ବଳାତ୍କାର ମାମଲା ମଧ୍ୟରୁ ୫୩.୨ ପ୍ରତିଶତ ଅଭିଯୋଗ ମିଥ୍ୟା ଥିଲା। ଏହି ସର୍ଭେରେ ଦିଆଯାଇଥିବା ତଥ୍ୟ ଉପରେ ମନସ୍ତତ୍ତ୍ୱବିତ୍ ଏବଂ ଆଇନ ବିଶେଷଜ୍ଞମାନେ ଚିନ୍ତା ପ୍ରକାଶ କରିଥିଲେ।

ଆତ୍ମହତ୍ୟା ଚିନ୍ତାଧାରାକୁ ଏହିପରି ନିୟନ୍ତ୍ରଣ କରନ୍ତୁ:

୧. ଲକ୍ଷଣଗୁଡ଼ିକୁ ଚିହ୍ନଟ କରନ୍ତୁ - ଅତ୍ୟଧିକ ଚାପ ଯୋଗୁଁ କିଛି ଲୋକ ପ୍ରତ୍ୟେକ ମୁହୂର୍ତ୍ତରେ ମୃତ୍ୟୁ ବିଷୟରେ ଭାବନ୍ତି। ଏହି କାରଣରୁ ବ୍ୟକ୍ତି ଭାରଗ୍ରସ୍ତ, ହତାଶା ଏବଂ ସମସ୍ୟାରେ ପଡ଼ିଥାଏ । ଅନେକ ଲୋକ ନିଜକୁ ଅଲଗା କରିଦିଅନ୍ତି ଏବଂ ସେମାନଙ୍କର ଖାଇବା ଅଭ୍ୟାସ ମଧ୍ୟ ପରିବର୍ତ୍ତନ ହେବାକୁ ଲାଗେ। ସାମାଜିକ ପରିସର ହ୍ରାସ ପାଇବା ଚାପ ଏବଂ ଚିନ୍ତାକୁ ସୂଚିତ କରେ। ଏପରି ସ୍ଥିତିରେ ଏହି ଲକ୍ଷଣଗୁଡ଼ିକୁ ଚିହ୍ନଟ କରି ନିଶ୍ଚିତ ଭାବରେ ଜଣେ ବିଶେଷଜ୍ଞଙ୍କ ସହିତ ପରାମର୍ଶ କରିବା ଉଚିତ।

୨. ଲୋକଙ୍କ ସହିତ ଭାବ ବିନିମୟ କରନ୍ତୁ - ବଢ଼ୁଥିବା ସମସ୍ୟାରେ ହତାଶ ହେବା ପରିବର୍ତ୍ତେ ଅନ୍ୟ ଲୋକଙ୍କ ସହିତ କଥା ହୁଅନ୍ତୁ ଏବଂ ସେମାନଙ୍କୁ ଆପଣଙ୍କ ସମସ୍ୟା ବିଷୟରେ କୁହନ୍ତୁ। ଏହା ମାନସିକ ସ୍ୱାସ୍ଥ୍ୟକୁ ଭଲ ରଖେ ଏବଂ ସମସ୍ୟାର ସମାଧାନ ଖୋଜିବାରେ ମଧ୍ୟ ସାହାଯ୍ୟ କରେ। ଯେଉଁମାନେ ଅନ୍ୟମାନଙ୍କ ସହିତ ଯୋଡ଼ି ହୋଇ ରୁହନ୍ତି, ସେମାନଙ୍କ ଆତ୍ମହତ୍ୟା ଚିନ୍ତାଧାରାର ଆଶଙ୍କା କମ୍ ଥାଏ। ସପ୍ତାହର ଶେଷରେ ବାହାରକୁ ଯାଆନ୍ତୁ ଏବଂ କାର୍ଯ୍ୟସ୍ଥଳରେ ମଧ୍ୟ ଲୋକଙ୍କ ସହିତ ସାକ୍ଷାତ କରନ୍ତୁ।

୩. ନିଜ ଉପରେ ଧ୍ୟାନ ଦିଅନ୍ତୁ - ଅନ୍ୟମାନେ କ'ଣ କହିବେ ସେ ବିଷୟରେ ଚିନ୍ତା କରିବା ପରିବର୍ତ୍ତେ, ଆପଣଙ୍କ ଶାରୀରିକ ଏବଂ ମାନସିକ ସ୍ୱାସ୍ଥ୍ୟର ଯତ୍ନ ନିଅନ୍ତୁ। ଏହା ଦ୍ୱାରା ବ୍ୟକ୍ତି ସକ୍ରିୟ ଏବଂ ସୁସ୍ଥ ଅନୁଭବ କରନ୍ତି। ଏହା ସହିତ ଜଣେ ଆତ୍ମହତ୍ୟା ଭଳି ଚିନ୍ତାଧାରାରୁ ଦୂରରେ ରହେ। ପୁଷ୍ଟିକର ଖାଦ୍ୟ ଖାଇବା ସହିତ ବ୍ୟାୟାମ ପାଇଁ ସମୟ ବାହାର କରନ୍ତୁ। ଏହା ଶରୀରରେ ଖୁସିର ହରମୋନ ନିର୍ଗତ କରେ, ଯାହା ନକାରାତ୍ମକ ଚିନ୍ତାଧାରା ହ୍ରାସ କରେ।

୪. ମାନସିକ ସ୍ୱାସ୍ଥ୍ୟକୁ ପ୍ରାଥମିକତା ଦିଅନ୍ତୁ- ଆତ୍ମହତ୍ୟା କରିବାର ଚିନ୍ତାଧାରା ବାରମ୍ବାର ମନକୁ ଆସିଲେ ସେଗୁଡ଼ିକୁ ଦମନ କରିବା ପରିବର୍ତ୍ତେ, ଜଣେ ମନସ୍ତତ୍ତ୍ୱବିତଙ୍କୁ ଭେଟନ୍ତୁ ଏବଂ କାରଣ ଖୋଜିବାକୁ ଚେଷ୍ଟା କରନ୍ତୁ। ଅନେକ ସମୟରେ ଦୀର୍ଘ ସମୟ ଧରି ରହିଥିବା ଅବସାଦ ଏହି ସମସ୍ୟାର କାରଣ ହେବାକୁ ଲାଗେ। ଏଥିପାଇଁ ଥେରାପି ନିଅନ୍ତୁ ଏବଂ ଡାକ୍ତରଙ୍କ ପରାମର୍ଶ ଅନୁସାରେ ଔଷଧ ମଧ୍ୟ ଖାଆନ୍ତୁ।