ଜଙ୍ଗଲରେ ଟାଣିଟାଣି ନେଉଥିଲା ବାଘ; ଦୁଇ ମହିଳା ବଞ୍ଚାଇଲେ ବନ୍ଧୁର ଜୀବନ

ବାଘ ମୁହଁରୁ ବଞ୍ଚିଲା ମହିଳାଙ୍କ ଜୀବନ । ସାହସ ଦେଖାଇଲେ ଦୁଇ ମହିଳା ସାଙ୍ଗ । ଦୁଇ ମହିଳା ବନ୍ଧୁ ଜଣେ ଅନ୍ୟ ଜଣେ ମହିଳାଙ୍କୁ ବାଘ ମୁହଁରୁ ଟାଣିଆଣିବାରେ ସଫଳ ହୋଇଛନ୍ତି । ବାଘଟି ମହିଳାଙ୍କୁ କିଛି ବାଟ ଘୋଷାଡ଼ି ନେଇଥିଲେ ମଧ୍ୟ ତାଙ୍କ ଜୀବନ ଫେରାଇ ଆଣିଛନ୍ତି ଦୁଇ ମହିଳା ।

ସୂଚନା ଅନୁସାରେ ୩ ଜଣ ମହିଳା ଜଙ୍ଗଲକୁ ଯାଇଥିଲେ । ସେଠାରେ କିଛି ଜଙ୍ଗଲଜାତ ଦ୍ରବ୍ୟ ସଂଗ୍ରହ କରିବା ସମୟରେ ବାଘ ହାବୁଡ଼ରେ ପଡ଼ିଯାଇଥିଲେ । ଫଳରେ ବାଘଟି ସେମାନଙ୍କ ନିକଟକୁ ଆସିବା ସହ ଜଣେ ମହିଳାଙ୍କୁ ଆକ୍ରମଣ କରିଥିଲା । ଏମିତିକି ତା’ର ପାଟିରେ ଜାବୁଡ଼ି ଧରି ଜଙ୍ଗଲ ଭିତରକୁ ଟାଣି ଟାଣି ନେଇଯାଇଥିଲା ।

ସେହି ସମୟରେ ଦୁଇ ମହିଳା ଭୟ ନକରି ନିଜର ସାହସିକତା ଦେଖାଇଥିଲେ । ବାଘଠାରୁ ନିଜ ବନ୍ଧୁଙ୍କ ଜୀବନ ବଞ୍ଚାଇବାକୁ ଚେଷ୍ଟା କରିଥିଲେ । ଏମିତିକି ବାଘ ସମ୍ମୁଖରେ ଠିଆ ହୋଇ ବାଘଟିକୁ ପ୍ରବଳ ଢେଲା ଓ ପଥର ମାଡ଼ କରିଥିଲେ । ଫଳରେ ମହିଳାଙ୍କୁ ବାଘଟି ଜଙ୍ଗଲ ଭିତରେ ଛାଡ଼ି ଚାଲିଯାଇଥିଲା ।

ଏପରି ଏକ ସାହସିକତା ଘଟଣା ଉତ୍ତରାଖଣ୍ଡରୁ ସାମ୍‌ନାକୁ ଆସିଛି । ଗତ ମଙ୍ଗଳବାର ଦିନ ଚମ୍ପାୱାଟ ଜିଲ୍ଲାର ବୁନ୍ ଜଙ୍ଗଲ ପରିସରରେ ଏହି ଘଟଣା ଘଟିଛି । ବାଘଟି ୩୬ ବର୍ଷିୟ ମହିଳା ଗୀତା ଦେବୀଙ୍କୁ ଆକ୍ରମଣ କରିଥିବା ଜଣାପଡ଼ିଛି ।

ଏହି ଘଟଣାକୁ ନେଇ ରେଞ୍ଜର ଗୁଲଜାର ହୁସେନ୍ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, ବାଘଟି ଜଙ୍ଗଲରେ ଗୀତା ଦେବୀଙ୍କୁ ଆକ୍ରମଣ କରିଥିଲା । ପରେ ପରେ ତାଙ୍କୁ ଟାଣିଟାରି ୪୦ ମିଟର ଯାଏଁ ନେଇଯାଇଥିଲା । ସେହି ସମୟରେ ତାଙ୍କ ବନ୍ଧୁ ଜାନକୀ ଦେବୀ ଓ ପାର୍ବତୀ ଦେବୀ ଭୟ ନକରି ସାହସିକତାର ସହ ତାଙ୍କୁ ଉଦ୍ଧାର କରିଥିଲେ । ବାଡ଼ି ସାହାଯ୍ୟରେ ବାଘଟିକୁ ଆକ୍ରମଣ କରିବା ସହ ଢେଲା ପଥର ମାଡ଼ କରିଥିଲେ । ଶେଷରେ ବାଘଟିକୁ ଘଉଡେଇ ଦେବାରେ ସଫଳ ହେବା ସହ ଗୀତାଙ୍କ ଜୀବନ ବଞ୍ଚାଇଥିଲେ ।

ପରେ ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ମେଡିକାଲରେ ଭର୍ତ୍ତି କରାଯାଇଥିଲା । ବର୍ତ୍ତମାନ ମଧ୍ୟ ତାଙ୍କ ସ୍ୱାସ୍ଥ୍ୟାବସ୍ଥା ସଙ୍କଟାପନ୍ନ ରହିଥିବା ଡାକ୍ତର ସୂଚନା ଦେଇଛନ୍ତି । ହେଲେ ଦୁଇ ମହିଳାଙ୍କ ସାହସିକତାକୁ ସମସ୍ତେ ଭୁରି ଭୁରି ପ୍ରଶଂସା କରିଛନ୍ତି ।