Indigo Flight: ଉଡାଣ ପରେ ବିମାନରେ ଯାନ୍ତ୍ରିକ ତ୍ରୁଟି, ଫେରିବା ପୂର୍ବରୁ ୪୦ ମିନିଟ୍ ଆକାଶରେ ଘୂରି ବୁଲିଲା

ତିରୁପତିରୁ ହାଇଦ୍ରାବାଦ ଅଭିମୁଖେ ଯାଉଥିବା ଇଣ୍ଡିଗୋର ଫ୍ଲାଇଟ୍ 6E 6591 ଉଡାଣ ଭରିବାର କିଛି ସମୟ ପରେ ଯାନ୍ତ୍ରିକ ତ୍ରୁଟି ଦେଖାଯିବାରୁ ପୁଣି ତିରୁପତିକୁ ୟୁ-ଟର୍ଣ୍ଣ ନେଇଥିଲା। ଫ୍ଲାଇଟ୍ 6E 6591 ରବିବାର ସନ୍ଧ୍ୟା ୭:୫୫ରେ ତିରୁପତି ବିମାନବନ୍ଦରରୁ ଉଡ଼ାଣ ଭରିଥିଲା। ହେଲେ ମଝି ଆକାଶରେ ଏକ ସାଂଘାତିକ ବୈଷୟିକ ତ୍ରୁଟିର ସମ୍ମୁଖୀନ ହୋଇଥିଲା।

ସତର୍କତାମୂଳକ ପଦକ୍ଷେପ ଭାବେ ବିମାନଟି ପ୍ରାୟ ୪୦ ମିନିଟ୍ ଧରି ଆକାଶରେ ଘୂରିଥିଲା। ନିରାପତ୍ତା ଦୃଷ୍ଟିରୁ କ୍ରୁ ସଦସ୍ୟମାନେ ବିମାନକୁ ପୁନର୍ବାର ତିରୁପତିକୁ ଫେରାଇ ନେଇଥିଲେ ଏବଂ ରାତ୍ର ୮:୩୦ରେ ନିରାପଦରେ ଅବତରଣ କରାଇଥିଲେ। ଏହି ଘଟଣାରେ କୌଣସି ଆହତ କିମ୍ବା ଜରୁରୀ ପରିସ୍ଥିତି ସୃଷ୍ଟି ହୋଇନଥିଲା ଏବଂ ସମସ୍ତ ଯାତ୍ରୀ ନିରାପଦ ଥିଲେ। ତେବେ, ଏହା ଦିନର ଶେଷ ଫ୍ଲାଇଟ୍ ଥିବାରୁ ବିମାନ ବାତିଲ କରାଯାଇଥିଲା, ଯାହା ଯାତ୍ରୀମାନଙ୍କୁ ଅସୁବିଧାରେ ପକାଇଥିଲା। ଇଣ୍ଡିଗୋ ଏହି ଘଟଣା ସମ୍ପର୍କରେ ଆନୁଷ୍ଠାନିକ ବିବୃତି ଜାରି କରିନାହିଁ। ଯାତ୍ରୀମାନଙ୍କ ପାଇଁ ପରବର୍ତ୍ତୀ ଦିନ ସକାଳ ୮:୨୦ରେ ଏକ ବିକଳ୍ପ ଫ୍ଲାଇଟ୍ ବ୍ୟବସ୍ଥା କରାଯାଇଥିଲା।

ଏହା ସହିତ, ସେହି ଦିନ ସକାଳେ ଆଉ ଏକ ଇଣ୍ଡିଗୋ ଫ୍ଲାଇଟ୍ (6E 2696) ମଧ୍ୟ ସମାନ ରୁଟରେ ବୈଷୟିକ ତ୍ରୁଟି ଯୋଗୁଁ ତିରୁପତିକୁ ଫେରିଥିଲା। ସକାଳ ୬:୧୯ରେ ଉଡ଼ାଣ କରିଥିଲା ଏବଂ ଉଡ଼ାଣ ପରେ କ୍ରୁ ଟିମ୍ ବିମାନକୁ ୟୁ-ଟର୍ଣ୍ଣ ନେବାକୁ ନିଷ୍ପତ୍ତି ନେଇଥିଲେ। ତେବେ କୌଣସି ଜରୁରୀ ସ୍ଥିତି ସୃଷ୍ଟି ହୋଇନଥିଲା ଏବଂ ବିମାନରେ ଥିବା ସମସ୍ତ ଯାତ୍ରୀ ସୁରକ୍ଷିତ ଥିଲେ। କର୍ତ୍ତୃପକ୍ଷ ବର୍ତ୍ତମାନ ବିମାନରେ ଦେଖା ଦେଇଥିବା ଟେକ୍ନିକାଲ ତ୍ରୁଟିର କାରଣ ଅନୁସନ୍ଧାନ କରୁଛନ୍ତି।

ଅଧିକ ପଢ଼ନ୍ତୁ: ଥାଇଲାଣ୍ଡ ଯାଉଥିବା ଏୟାର ଇଣ୍ଡିଆ ଏକ୍ସପ୍ରେସ୍ ବିମାନ ମଝି ଆକାଶରୁ ଫେରିଆସିଲା, କଲା ଏମରଜେନ୍ସି ଲ୍ୟାଣ୍ଡିଂ