LIVE TV
ମାତ୍ର ୪ ଲିଟର ପେଟ୍ରୋଲ ପକାଇ ଦେଲେ ୧୬ ହଜାର ଟଙ୍କା । ଏକଥା ଆପଣଙ୍କୁ ଆଶ୍ଚର୍ଯ୍ୟ ଲାଗୁଥିବ ନିଶ୍ଚୟ । କାରଣ ପେଟ୍ରୋଲ ରେଟ୍ ଏବେ ଏତେ ଯେ, ଏହାର ଦର ସମସ୍ତଙ୍କ ଜିଭ ଅଗରେ । ତେଣୁ ଆପଣ ଏବେ ମନେ ମନେ ହିସାବ କରିସାରିଥିବେ ଯେ, ୪ ଲିଟର ପେଟ୍ରୋଲ ଦର ପ୍ରାୟ ୪୧୫ ଟଙ୍କା ହେବ । କିନ୍ତୁ ୧୬ ହଜାର ଟଙ୍କା କାହିଁକି ଜଣେ ଦେବ । ଏ ପ୍ରଶ୍ନ ଆପଣଙ୍କ ମନରେ ନିଶ୍ଚୟ ଆସୁଥିବ ।
Also Read
ତେବେ ଏଭଳି ଏକ ଦୁଃସ୍ଥିତି ବା ଠକେଇର ସାମ୍ନା କରିଛନ୍ତି ଗୁଜରାଟ ଦେବଭୂମିର ଜଣେ ୩୪ ବର୍ଷୀୟ ଯୁବ ଚାଷୀ ବିଶାଲ ହିରପାରା । ସେ ୪ ଲିଟର ପେଟ୍ରୋଲ ପାଇଁ ଡେବିଟ କାର୍ଡ ବ୍ୟବହାର କରିଥିଲେ। ତାପରେ ତାଙ୍କ ବ୍ୟାଙ୍କ ଆକାଉଣ୍ଟରେ ଥିବା ୧୬ ହଜାର ଟଙ୍କା କଟି ଯାଇଥିଲା । ପିଓଏସ୍ ମେସିନ ଦ୍ୱାରା ତାଙ୍କ ଡେଭିଟ କାର୍ଡର ତଥ୍ୟକୁ ହ୍ୟାକ କରି ସାଇବର ଲୁଟେରାମାନେ ତାଙ୍କୁ ଚୂନ ଲଗାଇଛନ୍ତି ।
ବିଶାଲ ୪ ଲିଟର ପେଟ୍ରୋଲ ପାଇଁ କାର୍ଡ ଦ୍ୱାରା ପେମେଣ୍ଟ କରିଥିଲେ। ହେଲେ ସେ ଡେବିଟ କାର୍ଡ ପିଓଏସ ପଏଣ୍ଟରେ ଲଗାଇବା କ୍ଷଣି ସାଇବର ଠକମାନେ ତାଙ୍କ ଆକାଉଣ୍ଟରେ ଥିବା ସମସ୍ତ ୧୬ ହଜାର ଟଙ୍କା ଲୁଟି ନେଇଛନ୍ତି । ଏକଥା ତାଙ୍କୁ ଆଚମ୍ବିତ କରିଛି । ସେ ହଠାତ୍ ବୁଝିପାରି ନଥିଲେ କେମିତି ଏମିତି ହେଲା ।
ଏକଥା ଜାଣିବା ପରେ ବିଶାଲ ତୁରନ୍ତ ସାଇବର କ୍ରାଇମ ହେଲପଲାଇନକୁ ଫୋନ କରି ଅଭିଯୋଗ ଦାଖଲ କରିଛନ୍ତି । ବିଶାଲଙ୍କ କହିବା କଥା ଯେ ସେ କେବେ ହେଲେ ତାଙ୍କ ଡେବିଟ କାର୍ଡର ତଥ୍ୟ କାହାକୁ ଦେଇ ନାହାନ୍ତି। ଅନଲାଇନ ବ୍ୟାଙ୍କିଂ ତଥ୍ୟ ତାଙ୍କ ଛଡ଼ା ଆଉ କାହାକୁ ଜଣାନଥିଲା। ତଥାପି ସେ ସାଇବର ଠକାମୀରେ ପଡ଼ିଥିବାରୁ ଆଶ୍ଚର୍ଯ୍ୟ ହୋଇଛନ୍ତି।
