ଉଦ୍ଧବ ଠାକରେଙ୍କୁ ଆଶ୍ୱସ୍ତି: ନିଷ୍ପତ୍ତି ନେବାକୁ ନିର୍ବାଚନ କମିଶନଙ୍କୁ ମନାକଲେ ସୁପ୍ରିମକୋର୍ଟ

ଶିବସେନା ଉପରେ ପ୍ରକୃତରେ କାହାର କର୍ତ୍ତୃତ୍ୱ ରହିବ? ଶିବସେନା କାହା ନେତୃତ୍ୱରେ ରହିବ? ଏନେଇ ହୋଇଥିବା ମାମଲାରେ ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଥାକରେଙ୍କ ଗୋଷ୍ଠୀକୁ ସୁପ୍ରିମକୋର୍ଟରୁ ସାମାନ୍ୟ ଆଶ୍ୱସ୍ତି ମିଳିଛି । ତାଙ୍କ ଗୋଷ୍ଠୀ ହିଁ ପ୍ରକୃତ ଶିବସେନା ବୋଲି ଦାବି କରି ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଧେ କରିଥିବା ଆବେଦନ ଉପରେ ନିଷ୍ପତ୍ତି ନ ନେବାକୁ ନିର୍ବାଚନ କମିଶନକୁ ସୁପ୍ରିମକୋର୍ଟ କହିଛନ୍ତି ।

ତେବେ ଏ ମାମଲା ସାମ୍ବିଧାନିକ ଖଣ୍ଡପୀଠକୁ ପଠାଯିବ କି ନାହିଁ ସେନେଇ ଆଶନ୍ତା ସୋମବାର ଦିନ ସୁପ୍ରିମକୋର୍ଟ ନିଷ୍ପତ୍ତି ଶୁଣାଇ ପାରନ୍ତି । ମାମଲାର ଶୁଣାଣି ବେଳେ ଏକନାଥ ସିନ୍ଧେଙ୍କ ଗୋଷ୍ଠୀ ଦାବି କରିଥିଲେ ଯେ, ଗାଣତାନ୍ତ୍ରିକ ପଦ୍ଧତିରେ ତାଙ୍କ ପାଖରେ ସଂଖ୍ୟାଗରିଷ୍ଠ ରହିଛି । ଦଳ ଉପରେ ମଧ୍ୟ ତାଙ୍କର ନିୟନ୍ତ୍ରଣ ରହିବ । ତେଣୁ ଏ ଦଳୀୟ ନିଷ୍ପତ୍ତିରେ କୋର୍ଟ ହସ୍ତକ୍ଷେପ ନ କରନ୍ତୁ ବୋଲି ସିନ୍ଧେଙ୍କ ଓକିଲ ହରୀଶ ସାଲଭେ କୋର୍ଟଙ୍କୁ କହିଥିଲେ ।

ତେବେ ଯଦି ଜଣେ ନିର୍ବାଚିତ ହେବା ପରେ ନିଜ ଦଳକୁ ଆଦୌ ନ ପଚାରେ, ତାହା କଣ ଗଣତନ୍ତ୍ର ପ୍ରତି ବିପଦ ନୁହଁ କି ବୋଲି ମାମଲାର ଶୁଣାଣି କରୁଥିବା ପ୍ରଧାନ ବିଚାରପତି ଜଷ୍ଟିସ ଏନ୍. ଭି. ରମନ୍ନା ସିନ୍ଧେଙ୍କୁ ପ୍ରଶ୍ନ କରିଥିଲେ । ତେବେ ଏ ପ୍ରଶ୍ନର ଉତ୍ତରରେ ସାଲଭେ ନା ବୋଲି କହିଥିଲେ । ଯେହେତୁ ବିଦ୍ରୋହୀ ବିଧାୟକମାନେ ଅଯୋଗ୍ୟ ଘୋଷଣା ହେବାର ସ୍ପଷ୍ଟତା ରହିଛି, ତା ଭିତରେ ନିର୍ବାଚନ କମିଶନ ଏନେଇ ନିଷ୍ପତ୍ତି ନେଇପାରିବେ ନାହିଁ ବୋଲି ଥାକରେଙ୍କ ଗୋଷ୍ଠୀ କହିଥିଲେ ।