ସୁପ୍ରିମକୋର୍ଟଙ୍କ ବଡ଼ ନିଷ୍ପତ୍ତି, ଏବେ କୋଟା ଭିତରେ ସୃଷ୍ଟି କରାଯାଇପାରିବ କୋଟା

ସଂରକ୍ଷଣକୁ ନେଇ ସୁପ୍ରିମକୋର୍ଟ ପକ୍ଷରୁ ବଡ଼ ନିଷ୍ପତ୍ତି । ସୁପ୍ରିମକୋର୍ଟ କୋଟା ମଧ୍ୟରେ କୋଟାକୁ ଅନୁମୋଦନ କରିଛନ୍ତି । ସୁପ୍ରିମକୋର୍ଟର ୭ ଜଣିଆ ବିଚାରପତିଙ୍କ ବେଞ୍ଚ ବହୁମତ ସହ କହିଛନ୍ତି ଯେ ଅନୁସୂଚିତ ଜାତି ଓ ଅନୁସୂଚିତ ଜନଜାତି ମଧ୍ୟରେ ରାଜ୍ୟ ସରକାର ଉପ-ବର୍ଗ ସୃଷ୍ଟି କରିପାରିବେ ।

୨୦୦୪ ମସିହାରେ ଇଭି ଚିନ୍ନାୟା ମାମଲାରେ ଦିଆଯାଇଥିବା ୫ ଜଣ ବିଚାରପତିଙ୍କ ନିଷ୍ପତ୍ତିକୁ ୭ ଜଣିଆ ବିଚାରପତିଙ୍କ ଖଣ୍ଡପୀଠ ଖାରଜ କରି ଦେଇଛନ୍ତି । ୨୦୦୪ରେ ଦିଆଯାଇଥିବା ସେହି ନିଷ୍ପତ୍ତିରେ ସୁପ୍ରିମକୋର୍ଟ କହିଥିଲେ ଯେ ଏସସି / ଏସଟି ଆଦିବାସୀମାନଙ୍କ ମଧ୍ୟରେ ଉପ-ବର୍ଗ ସୃଷ୍ଟି କରାଯାଇପାରିବ ନାହିଁ । କିନ୍ତୁ ବର୍ତ୍ତମାନ ସୁପ୍ରିମକୋର୍ଟ କହିଛନ୍ତି ଯେ ଆମେ ୬:୧ ସହିତ ନିଷ୍ପତ୍ତି ନେଇଛୁ ଯେ ଏସସି, ଏସଟି କୋଟାରେ ଉପ-ବର୍ଗୀକରଣ କରାଯାଇପାରିବ।

ଅଧିକ ପଢ଼ନ୍ତୁ: କର୍ମଚାରୀଙ୍କ ପଦୋନ୍ନତି, ସେମାନଙ୍କର ମୌଳିକ ଅଧିକାର: ସୁପ୍ରିମକୋର୍ଟ

ଗୁରୁବାର ସୁପ୍ରିମକୋର୍ଟ କହିଛନ୍ତି କୋଟା ଭିତରେ କୋଟା ସୃଷ୍ଟି କରାଯାଇପାରିବ । ସିଜେଆଇ କହିଛନ୍ତି ଯେ ଅନୁସୂଚିତ ଜାତି ଓ ଜନଜାତିର ଉପ-ବର୍ଗୀକରଣ ଧାରା ୧୪କୁ ଉଲ୍ଲଂଘନ କରୁନାହିଁ । କାରଣ ଏହି ଉପ-ବର୍ଗଗୁଡିକ ତାଲିକାରୁ ବାଦ ପଡ଼ିନାହିଁ । କୋର୍ଟ କହିଛନ୍ତି ଯେ ଅନୁଚ୍ଛେଦ ୧୫, ୧୬ରେ ଏମିତି କିଛି ନାହିଁ, ଯାହାକି ରାଜ୍ୟକୁ କୌଣସି ଜାତିକୁ ଉପ-ବର୍ଗ କରିବାରେ ବାରଣ କରିଥାଏ । ସୁପ୍ରିମକୋର୍ଟ ଏହା ମଧ୍ୟ କହିଛନ୍ତି ଯେ ଉପ-ବର୍ଗୀକରଣର ଆଧାର ରାଜ୍ୟର ସଠିକ ତଥ୍ୟ ଉପରେ ଆଧାରିତ ହେବା ଉଚିତ। ଏହି ପ୍ରସଙ୍ଗରେ ରାଜ୍ୟ ନିଜ ଇଚ୍ଛାରେ କାର୍ଯ୍ୟ କରିପାରିବ ନାହିଁ ।

ଜଷ୍ଟିସ୍ ବି.ଆର ଗବାଇ କହିଛନ୍ତି ଯେ ପଛୁଆ ସମ୍ପ୍ରଦାୟକୁ ପ୍ରାଥମିକତା ଦେବା ରାଜ୍ୟର କର୍ତ୍ତବ୍ୟ। କେବଳ ଏସସି / ଏସଟି ବର୍ଗର କିଛି ଲୋକ ସଂରକ୍ଷଣର ଲାଭ ଉପଭୋଗ କରୁଛନ୍ତି । ସେ କହିଛନ୍ତି ଯେ, ଏସସି / ଏସଟି ମଧ୍ୟରେ ଏମିତି ଅନେକ ବର୍ଗ ଅଛି ଯେଉଁମାନଙ୍କୁ ବହୁ ବର୍ଷ ଧରି ଅତ୍ୟାଚାରର ସମ୍ମୁଖୀନ ହେବାକୁ ପଡ଼ୁଛି । ଜଷ୍ଟିସ୍ ବି.ଆର ଗବାଇ ବାବା ସାହେବ ଆମ୍ବେଦକରଙ୍କ ଏକ ବିବୃତ୍ତି ମଧ୍ୟ ପଢ଼ିଛନ୍ତି। ଯାହା ଦର୍ଶାଏ କି - 'ଇତିହାସ ଦର୍ଶାଏ ଯେ ଯେତେବେଳେ ନୈତିକତା, ଅର୍ଥବ୍ୟବସ୍ଥାକୁ ସାମ୍ନା କରେ, ସେତେବେଳେ ଅର୍ଥବ୍ୟବସ୍ଥାର ବିଜୟ ହୁଏ ।

ସୂଚନା ଅନୁସାରେ ୨୦୦୪ ନିଷ୍ପତ୍ତିରେ ସୁପ୍ରିମକୋର୍ଟ କହିଥିଲେ ଯେ, ସଂରକ୍ଷଣ ଯୋଗାଇବା ପାଇଁ ଅନୁସୂଚିତ ଜାତି ଏବଂ ଅନୁସୂଚିତ ଜନଜାତିରେ ଉପ-ବର୍ଗ ସୃଷ୍ଟି କରିବାର ଅଧିକାର ରାଜ୍ୟମାନଙ୍କର ନାହିଁ । କିନ୍ତୁ ଏହି ନିଷ୍ପତ୍ତିକୁ ୭ ଜଣିଆ ବିଚାରପତିଙ୍କ ଖଣ୍ଡପୀଠ ଖାରଜ କରି ଦେଇଛନ୍ତି ।

ଅଧିକ ପଢ଼ନ୍ତୁ: ସୁପ୍ରିମକୋର୍ଟଙ୍କ ବଡ ରାୟ; ଗୃହିଣୀଙ୍କ ତ୍ୟାଗକୁ ସମ୍ମାନ ଦିଅ