ଗରିବର ଜୀବନ କ’ଣ ଜୀବନ ନୁହେଁ! ପାର୍ଟିରୁ ଫେରୁଥିବା ଯୁବତୀଙ୍କ BMW ଧକ୍କାରେ ଯୁବକ ମୃତ

ଗରିବଦୁଃଖୀଙ୍କ ଜୀବନର ମୂଲ୍ୟ କ’ଣ କିଛି ନାହିଁ ? ଜୀବନ ଡଙ୍ଗାରେ ଏକା ନାଉରୀ ସାଜିଥିବା ମଣିଷ କ’ଣ ଏହିପରି ଜୀବନ ହାରିବ ? ତା’ ଅନ୍ତେ ଏବେ ତା ପରିବାର କଥା ବୁଝିବ କିଏ, ଛୋଟ ଛୋଟ ପିଲାଙ୍କ ପେଟ ପାଳିବ କିଏ ? କିରାଣା ଦୋକାନ କରି ପରିବାର ପୋଷୁଥିବା ଜଣେ ଯୁବକ BMW କାର୍‌ ଧକ୍କାରେ ଜୀବନ ହରାଇଛନ୍ତି । ଆଉ କାର୍‌କୁ ଚଳାଉଥିଲେ ଜଣେ ଧନୀକ ଯୁବତୀ । ରାଜଧାନୀ ଦିଲ୍ଲୀରେ ଏପରି ଏକ ଘଟଣା ଘଟିଛି ।

ପାର୍ଟିରୁ ଫେରୁଥିବା ବେଳେ ଜଣେ ଯୁବତୀଙ୍କୁ ବିଏମଡବ୍ଲୁ କାର ଧକ୍କାରେ କିରାଣା ଦୋକାନୀଙ୍କ ମୃତ୍ୟୁ ହୋଇଛି । ଦିଲ୍ଲୀର ମୋତି ନଗର ଅଂଚଳରେ ଏହି ହୃଦୟବିଦାରକ ଘଟଣା ଘଟିଛି । ଏ ସମ୍ପର୍କରେ ସୂଚନା ପାଇବା ପରେ ଦିଲ୍ଲୀ ପୋଲିସ ଏ ବାବଦରେ ମାମଲା ଦାଏର କରିଛି । ଏହା ସହିତ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଯୁବତୀ ମଧ୍ୟ ଗିରଫ କରାଯାଇଛି । ଦୁର୍ଘଟଣା ସମୟରେ ସେ ମଦ୍ୟପାନ କରିଥିଲେ କି ନେଇ ପୋଲିସ ଜାଣିବାକୁ ଚେଷ୍ଟା କରୁଛି ।

ଅଧିକ ପଢ଼ନ୍ତୁ: ଆଖି ପିଛୁଳାକେ ଅଘଟଣ, ବସ୍ ଧକ୍କାରେ ଆଗପଛ ହୋଇ ଚାଲିଗଲେ ବାପା ଓ ଦୁଇ ଝିଅ

ଯୁବତୀଙ୍କ ଗାଡ଼ି ଧକ୍କାରେ ଏକ ଗ୍ରୋସରୀ ଦୋକାନ ଚଳାଉଥିବା ୩୬ ବର୍ଷିୟ ଅଜୟ ଗୁପ୍ତାଙ୍କର ମୃତ୍ୟୁ ଘଟିଛି । ସେ ଡାକ୍ତରଖାନାରୁ ଔଷଧ ନେଇ ଘରକୁ ଫେରୁଥିବା ବେଳେ ଦୁର୍ଘଟଣା ଘଟିଥିବା ତଦନ୍ତରୁ ଜଣାପଡ଼ିଛି । ଦୁର୍ଘଟଣା ପରେ ଆହତ ବ୍ୟକ୍ତିଙ୍କୁ ଡାକ୍ତରଖାନା ନିଆଯାଇଥିଲା, ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।

ଗିରଫ ହୋଇଥିବା ଯୁବତୀ ଜଣକ ବୃତ୍ତିରେ ଜଣେ ଆର୍କିଟେକ୍ଟ । ସେ ଦ୍ରୁତ ଗତିରେ ବିଏମଡବ୍ଲୁ ଗାଡ଼ି ଚଳାଉଥିବାର ଅଭିଯୋଗ ହୋଇଛି । ପ୍ରଥମେ ଏକ ଜେନେରେଟରକୁ ଧକ୍କା ଦେଇଥିଲେ ତା’ପରେ ଅଜୟ ଗୁପ୍ତାଙ୍କୁ ନିଜ କାର୍‌ରେ ଦଳିଦେଇଥିଲେ ।

ଆଖପାଖ ସ୍ଥାନରେ ଲାଗିଥିବା ସିସିଟିଭି ଆଧାରରେ ଦୁର୍ଘଟଣା ସମୟରେ କାରର ବେଗ ଯାଞ୍ଚ କରୁଛି ପୋଲିସ୍‌ । ଏହି ଦୁର୍ଘଟଣା ପରେ ଅନେକ ସଂଖ୍ୟକ ଲୋକ ଘଟଣାସ୍ଥଳରେ ଏକାଠି ହୋଇ ପୋଲିସ୍‌ ଓ ଅଭିଯୁକ୍ତଙ୍କ ବିରୋଧରେ ସ୍ଲୋଗାନ ଦେଇଥିଲେ । ଦିଲ୍ଲୀରେ ବାରମ୍ବାର ଏପରି ଘଟଣା ଘଟୁଥିବାବେଳେ ପୁଲିସ ହାତବାନ୍ଧି ବସି ରହୁଥିବା ଲୋକମାନେ ଅଭିଯୋଗ କରିଛନ୍ତି ।