LIVE TV
ଆରମ୍ଭ ହେଲା ସଂସଦର ୫ ଦିନିଆ ସ୍ୱତନ୍ତ୍ର ଅଧିବେଶନ । ଆଜି ପୁରୁଣା ସଂସଦ ଭବନର ଉଭୟ ଗୃହରେ ଆଲୋଚନା ହୋଇଥିଲା । ଲୋକସଭାରେ ଆଲୋଚନା ଆରମ୍ଭ କରି ସଂସଦର ୭୫ ବର୍ଷ ଯାତ୍ରା ଉପରେ ଆଲୋକପାତ କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ୧୯୪୬ ଡିସେମ୍ବର ୯ରେ ସମ୍ବିଧାନ ସଭାର ପ୍ରଥମ ବୈଠକ ଠାରୁ ଏବେ ଯାଏଁ ସଂସଦର ସଫଳତା, ଅଭିଜ୍ଞତା, ସ୍ମୃତି ଆଦି ସଂପର୍କରେ ଆଲୋଚନା କରିଥିଲେ ସାଂସଦମାନେ । ତେବେ ଆସନ୍ତାକାଲିଠୁ ନୂଆ ସଂସଦ ଭବନ କାର୍ଯ୍ୟକ୍ଷମ ହେବ ଏବଂ ଇତିହାସ ପାଲଟିବ ୧୯୨୭ ମସିହାରେ ନିର୍ମିତ ଏହି ଐତିହାସିକ ସୌଧ ।
୯୬ ବର୍ଷ ପୁରୁଣା ବୟୋବୃଦ୍ଧ ସଂସଦ ଭବନ... ସରକାର ଗଢ଼ିଛି, ସରକାର ଭାଙ୍ଗିଛି... ଆଇନ ବନିଛି, ଇତିହାସ ବଦଳିଛି... ସ୍ୱାଧୀନତା ସଂଗ୍ରାମଠୁ ସମ୍ବିଧାନ ପ୍ରଣୟନ... ଆନ୍ଦୋଳନଠୁ ଆତଙ୍କୀ ଆକ୍ରମଣ... ଆସନ୍ତାକାଲି ଇତିହାସ ପାଲଟିବାକୁ ଯାଉଛି ଅଗଣିତ ଐତିହାସିକ ଘଟଣାର ଏହି ମୁକସାକ୍ଷୀ । ଆଜି ଶେଷ ଥର ପାଇଁ ସରଗରମ ହୋଇଥିଲା ଏହାର ଉଭୟ ଗୃହ । ଆଜିଠୁ ୨୨ ତାରିଖ ଯାଏଁ ଚାଲିବାକୁ ଥିବା ୫ ଦିନିଆ ସ୍ୱତନ୍ତ୍ର ଅଧିବେଶନ, ଛୋଟ କିନ୍ତୁ ଐତିହାସିକ ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
Also Read
ଦେଶର ୭୫ ବର୍ଷର ସଂସଦୀୟ ଯାତ୍ରା ଉପରେ ଆଲୋକପାତ କରି, ଜବାହରଲାଲ ନେହରୁଙ୍କ ବହୁଚର୍ଚ୍ଚିତ 'ଷ୍ଟ୍ରୋକ୍ ଅଫ୍ ମିଡନାଇଟ' ଅଭିଭାଷଣଠୁ ଅଟଳ ବିହାରୀ ବାଜପେୟୀଙ୍କ 'ସରକାର ଆସିବେ-ଯିବେ, କିନ୍ତୁ ଦେଶ ରହିବ' ଉକ୍ତି କଥା ସ୍ମରଣ କରିଛନ୍ତି ମୋଦି । ସଂସଦରେ ପ୍ରଥମ ଥର ପ୍ରବେଶବେଳେ, ସେ କିପରି ଏହି ଗଣତନ୍ତ୍ରର ମନ୍ଦିରକୁ ଭୂମିଷ୍ଠ ପ୍ରଣାମ କରିଥିଲେ ସେ କଥା ମନେ ପକାଇ କହିଛନ୍ତି ଯେ, ମୁଁ କେବେ ଭାବିନଥିଲି ଯେ, ମୋ ଭଳି ଜଣେ ଗରିବ ଘରର ପିଲା ସଂସଦରେ ପହଞ୍ଚିବ । ଏହି ଅବସରରେ ଧାରା ୩୭୦ ଉଚ୍ଛେଦ, ଜିଏସ୍ଟି, ୱାନ୍ ରାଙ୍କ୍ ୱାନ୍ ପେନସନ୍, ଜି-ଟ୍ୱେଣ୍ଟି ସଫଳତା, ଚନ୍ଦ୍ରୟାନ ମିଶନ୍ ଆଦି କଥା ଉଲ୍ଲେଖ କରିବା ସହ ଆଜିର ଲମ୍ବା ଅଭିଭାଷଣରେ ବିରୋଧୀଙ୍କୁ ବି କଟାକ୍ଷ କରିବାକୁ ସେ ଭୁଲିନଥିଲେ ।
ଆସନ୍ତାକାଲିଠୁ ନବନିର୍ମିତ ସଂସଦ ଭବନରେ ଚାଲିବ ଉଭୟ ରାଜ୍ୟସଭା ଓ ଲୋକସଭାର ଗୃହକାର୍ଯ୍ୟ । ଗ୍ରୁପ୍ ଫଟୋ ସେସନ୍ ପରେ ଦିନ ୧୧ଟାରେ ପୁରୁଣା ସଂସଦ ଭବନର ସେଣ୍ଟ୍ରାଲ୍ ହଲରେ ବସିବ ମିଳିତ ଅଧିବେଶନ । ଏଥିରେ ଭାରତୀୟ ସଂସଦର ସମୃଦ୍ଧ ପରଂପରା ଏବଂ ୨୦୪୭ ସୁଦ୍ଧା ଭାରତକୁ ଏକ ବିକଶିତ ଦେଶରେ ପରିଣତ କରିବା ଦିଗରେ ଆଲୋଚନା ହେବ । ଚଳିତ ସ୍ୱତନ୍ତ୍ର ଅଧିବେଶନରେ ୪ଟି ବିଲ୍ ଆଲୋଚନା ପାଇଁ ଆସିବ ବୋଲି ସରକାର ପୂର୍ବରୁ ସୂଚନା ଦେଇଛନ୍ତି ।
ଆସନ୍ତାକାଲିଠୁ ନୂଆ ସଂସଦ ଭବନ କାର୍ଯ୍ୟକ୍ଷମ ହେଉଥିଲେ ବି, ପୁରୁଣା ସଂସଦ ଭବନ ଅବ୍ୟବହୃତ ଅବସ୍ଥାରେ ପଡ଼ିବନି କି ଏହାକୁ ଭଙ୍ଗାଯିବନି । ଏହାକୁ ସଂରକ୍ଷିତ କରାଯିବ ଏବଂ ସେଠାରେ ଆନୁସଙ୍ଗିକ ସଂସଦୀୟ କାର୍ଯ୍ୟକ୍ରମ ଅନୁଷ୍ଠିତ ହେବ । ସମ୍ଭବତଃ ସେଠାରେ ଏକ ସଂଗ୍ରହାଳୟ ସ୍ଥାପନ ପାଇଁ ବି ଯୋଜନା ଥିବା ଚର୍ଚ୍ଚା ହେଉଛି ।
