Himachal Samosa Controversy: ମୁଖ୍ୟମନ୍ତ୍ରୀଙ୍କ ବଦଳରେ ଷ୍ଟାଫ୍‌ ଖାଇଦେଲେ ‘ସିଙ୍ଗଡ଼ା’, ଶେଷରେ କରିବାକୁ ପଡ଼ିଲା CID ଯାଞ୍ଚ

କୁଆଡ଼େ ଗଲା ହିମାଚଳ ପ୍ରଦେଶ ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁଙ୍କ ସିଙ୍ଗଡ଼ା । ହିମାଚଳ ପ୍ରଦେଶରେ ଏବେ ସିଙ୍ଗଡ଼ାକୁ ନେଇ ଏବେ ରାଜନୈତିକ ମାହୋଲ ସରଗରମ ରହିଛି । ଏମିତି କି ଏହି ମାମଲାର ତଦନ୍ତ ସିଆଇଡିକୁ କରିବାକୁ ପଡ଼ିଛି । ସୂଚନା ଅନୁସାରେ ହିମାଚଳ ପ୍ରଦେଶର ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁଙ୍କ ପାଇଁ ପ୍ରସ୍ତୁତ ସିଙ୍ଗଡା ଏବଂ କେକ୍‌ ତାଙ୍କ ସୁରକ୍ଷା କର୍ମୀଙ୍କୁ ଦିଆଯାଇଥିଲା । ଯାହାକୁ ନେଇ ଏକ ବିବାଦ ଉପୁଜିଥିଲା । ସ୍ଥିତି ଏମିତି ହେଲା କି ବାଧ୍ୟ ହୋଇ ଏହି ମାମଲାର ତଦନ୍ତ ସିଆଇଡିକୁ କରିବାକୁ ପଡ଼ିଲା । ମୁଖ୍ୟମନ୍ତ୍ରୀଙ୍କ ସିଙ୍ଗଡ଼ା ହଜିବା ଘଟଣାକୁ ସରକାର ବିରୋଧୀ କାର୍ଯ୍ୟ ବୋଲି ଦର୍ଶାଇଲା ତଦନ୍ତକାରୀ ସଂସ୍ଥା । ଅକ୍ଟୋବର ୨୧ରେ ଘଟିଥିବା ଏହି ଘଟଣାରେ ସିଆଇଡିରେ କାର୍ଯ୍ୟ କରୁଥିବା ଜଣେ ବରିଷ୍ଠ ଅଧିକାରୀ କହିଛନ୍ତି, ମୁଖ୍ୟମନ୍ତ୍ରୀ ସିଆଇଡି ମୁଖ୍ୟାଳୟ ପରିଦର୍ଶନ ବେଳେ ଦାୟିତ୍ୱରେ ଥିବା ବ୍ୟକ୍ତିମାନେ ଏଜେଣ୍ଡା ଅନୁଯାୟୀ କାର୍ଯ୍ୟ କରିଥିଲେ ।

ଏହି ଘଟଣାରେ ହିମାଚଳ ପ୍ରଦେଶରେ ଥିବା କଂଗ୍ରେସ ସରକାରକୁ ଟାର୍ଗେଟ କରି ବିରୋଧୀ ବିଜେପି କହିଛି, ସୁଖୁ ସରକାର ରାଜ୍ୟର ବିକାଶ ପାଇଁ ଚିନ୍ତା କରୁନାହିଁ ବରଂ ଏହି ସରକାରର ଏକମାତ୍ର ଚିନ୍ତା ହେଉଛି ‘ମୁଖ୍ୟମନ୍ତ୍ରୀଙ୍କ ସିଙ୍ଗଡା’ ।

ଅଧିକ ପଢ଼ନ୍ତୁ: ଭୁଲିଗଲେ ସୌଜନ୍ୟ ! ଧାରା ୩୭୦କୁ ନେଇ ବିଧାନସଭାରେ ପ୍ରବଳ ହଙ୍ଗାମା

ସୂଚନା ଅନୁସାରେ ଅକ୍ଟୋବର ୨୧ରେ ମୁଖ୍ୟମନ୍ତ୍ରୀ ସୁଖବିନ୍ଦର ସିଂ ସୁଖୁ ସିମଲା ସ୍ଥିତ ସିଆଇଡି ହେଡକ୍ବାର୍ଟର ପରିଦର୍ଶନରେ ଯାଇଥିବା ବେଳେ ସେଠାରେ ମୁଖ୍ୟମନ୍ତ୍ରୀଙ୍କ ଜଳଖିଆ ପାଇଁ ସିଙ୍ଗଡ଼ା ମଗାଯାଇଥିଲା । ଲକର ବଜାରସ୍ଥିତ ହୋଟେଲ ରେଡିସନ୍‌ ବ୍ଲୁରୁ ତିନୋଟି ବକ୍ସରେ ସିଙ୍ଗଡ଼ା ମଗାଯାଇଥିଲା । ତେବେ ଖାଇବାକୁ ଦେବା ବେଳେ ମୁଖ୍ୟମନ୍ତ୍ରୀଙ୍କ ପରିବର୍ତ୍ତେ ସେସବୁ ତାଙ୍କ ସୁରକ୍ଷା କର୍ମୀଙ୍କୁ ଦିଆଯାଇଥିଲା । ମୁଖ୍ୟମନ୍ତ୍ରୀଙ୍କ ପାଇଁ ସିଙ୍ଗଡ଼ା ନଥିବା ଦେଖିବା ପରେ ଏହାର ତଦନ୍ତ କରାଯାଇଥିଲା । ସିଆଇଡି ଘଟଣାର ତଦନ୍ତ କରିବା ସହ ଏହା ସରକାର ବିରୋଧୀ କାର୍ଯ୍ୟ ବୋଲି ରିପୋର୍ଟରେ ଦର୍ଶାଇଥିବା ସୂଚନା ମିଳିଛି ।

ରିପୋର୍ଟରେ କୁହାଯାଇଛି ଯେ ଜଣେ ଆଇଜି ରାଙ୍କର ଅଧିକାରୀ ଜଣେ ସବ୍-ଇନ୍ସପେକ୍ଟର (SI)ଙ୍କୁ ସିଏମ ପରିଦର୍ଶନ ପାଇଁ ହୋଟେଲରୁ କିଛି ଖାଦ୍ୟ ସାମଗ୍ରୀ ଆଣିବାକୁ କହିଥିଲେ । SI ପ୍ରତିବଦଳରେ ଏକ ଆସିଷ୍ଟାଣ୍ଟ SI (ASI) ଏବଂ ହେଡ୍ କନଷ୍ଟେବଳଙ୍କୁ ଜଳଖିଆ ଆଣିବାକୁ ନିର୍ଦ୍ଦେଶ ଦେଇଥିଲେ । ASI ଏବଂ ହେଡ୍ କନଷ୍ଟେବଳ ହୋଟେଲରୁ ତିନୋଟି ସିଲ୍ ବାକ୍ସରେ ଜଳଖିଆ ଆଣି SIଙ୍କୁ ଜଣାଇଥିଲେ ।

ପୋଲିସ ଅଧିକାରୀମାନେ ସେମାନଙ୍କ ବିବୃତ୍ତିରେ କହିଛନ୍ତି ଯେ ଯେତେବେଳେ ସେ ଡ୍ୟୁଟିରେ ଥିବା ପର୍ଯ୍ୟଟନ ବିଭାଗର କର୍ମଚାରୀଙ୍କୁ ପଚାରିଥିଲେ ଯେ ତିନିଟି ବାକ୍ସରେ ରଖାଯାଇଥିବା ସ୍ନାକ୍ସକୁ ମୁଖ୍ୟମନ୍ତ୍ରୀଙ୍କୁ ଦିଆଯିବ କି ନାହିଁ, ସେମାନେ କହିଥିଲେ ଯେ, ଏଗୁଡ଼ିକ ମେନୁରେ ଅନ୍ତର୍ଭୁକ୍ତ ନୁହେଁ ।

ଯାଞ୍ଚ ରିପୋର୍ଟରେ ଦର୍ଶାଯାଇଛି ଯେ ଏହି ତିନୋଟି ବାକ୍ସ ସିଙ୍ଗଡ଼ା ମୁଖ୍ୟମନ୍ତ୍ରୀ ସୁଖୁ ପାଇଁ ଉଦ୍ଦିଷ୍ଟ ବୋଲି କେବଳ SI ଜାଣିଥିଲେ । ତେବେ ଏହି ଖାଦ୍ୟ ସାମଗ୍ରୀ ଯେଉଁ ମହିଳା ଇନ୍ସପେକ୍ଟରଙ୍କୁ ଦିଆଯାଇଥିଲା । ସେ କୌଣସି ବରିଷ୍ଠ ଅଧିକାରୀଙ୍କ ପରାମର୍ଶ ନକରି ଆସିଥିବା ଟିଫିନ୍‌କୁ ମେକାନିକାଲ୍ ଟ୍ରାନ୍ସପୋର୍ଟ (MT) ବିଭାଗକୁ ପଠାଇଲେ । ଏହି ପ୍ରକ୍ରିୟାରେ, ତିନୋଟି ବାକ୍ସରେ ଆସିଥିବା ଖାଦ୍ୟ ସାମଗ୍ରୀ ଅନେକ ଲୋକଙ୍କ ହାତକୁ ଯାଇଥିଲା ।

କୌତୁହଳର ବିଷୟ ହେଉଛି, ସିଆଇଡି ବିଭାଗର ଜଣେ ଉଚ୍ଚ ପଦସ୍ଥ ଅଧିକାରୀ ତାଙ୍କ ବିବୃତ୍ତିରେ କହିଛନ୍ତି, ଯାଞ୍ଚ ରିପୋର୍ଟରେ ନାମିତ ସମସ୍ତ ବ୍ୟକ୍ତି ସରକାରୀ ବିରୋଧି କାମ କରିଛନ୍ତି । ଯେଉଁଥିପାଇଁ ଖାଦ୍ୟ ସାମଗ୍ରୀ VVIPଙ୍କୁ ଦିଆଯାଇପାରିଲା ନାହିଁ । ତେବେ ହିମାଚଳରେ ସିଙ୍ଗଡ଼ାକୁ ନେଇ ହୋଇଥିବା ବିବାଦ ବିରୋଧି ଦଳ ବିଜେପିକୁ ସୁଖୁ ସରକାରକୁ ଟାର୍ଗେଟ କରିବାର ସୁଯୋଗ ଦେଇଛି । ବିଜେପି ମୁଖ୍ୟ ମୁଖପାତ୍ର ରଣଧୀର ଶର୍ମା ଗୁରୁବାର ପ୍ରକାଶିତ ବିବୃତ୍ତିରେ କହିଛନ୍ତି ଯେ ରାଜ୍ୟର ବିକାଶକୁ ନେଇ ରାଜ୍ୟ ସରକାର ଚିନ୍ତିତ ନୁହଁନ୍ତି ଏବଂ ଏହାର ଏକମାତ୍ର ଚିନ୍ତା ହେଉଛି 'ମୁଖ୍ୟମନ୍ତ୍ରୀଙ୍କ ସିଙ୍ଗଡ଼ା' ।

ଅଧିକ ପଢ଼ନ୍ତୁ: Sharad Pawar: ରାଜନୀତିରୁ ସନ୍ୟାସ ନେବେ ଶରଦ ପାୱାର ! କହିଲେ...