Dog Gets Residence Certificate: ପଶୁଙ୍କୁ ମିଳୁଛି ରେସିଡେନ୍ସ ସାର୍ଟିଫିକେଟ୍, ଚାଲିଛି କି ଜଙ୍ଗଲରାଜ୍ ?

ବିହାରର ପାଟନାରେ ଆଶ୍ଚର୍ଯ୍ୟଜନକ ଘଟଣା ଘଟିଛି । ଗୋଟିଏ କୁକୁରକୁ ମିଳିଛି ରେସିଡେନ୍ସ ସାର୍ଟିଫିକେଟ୍ । 'ଡଗ୍ ବାବୁ' ନାମକ ଏକ କୁକୁର ନାଁରେ ରେସିଡେନ୍ସ ସାର୍ଟିଫିକେଟ୍ (ଆବାସ ପ୍ରମାଣପତ୍ର) ଜାରି କରାଯାଇଛି । ଏହି ଘଟଣା କେବଳ ବିହାର ନୁହେଁ ସାରା ଦେଶରେ ଚର୍ଚ୍ଚାର ବିଷୟ ହୋଇଛି। ଏହି ଘଟଣାରେ ବିହାର ସରକାରଙ୍କ ପ୍ରଶାସନିକ ବ୍ୟବସ୍ଥାରେ ଥିବା ଗୁରୁତର ତ୍ରୁଟି ସାମନାକୁ ଆସିଛି ।

ଏହି ରେସିଡେନ୍ସ ସାର୍ଟିଫିକେଟରେ କୁକୁରର ନାଁ ‘ଡଗ୍ ବାବୁ’ ରହିଛି । କୁକୁର ବାପାର ନାଁ ରହିଛି ‘କୁତା ବାବୁ’ । ଡଗ୍ ବାବୁ ମାଆର ନାଁ ରହିଛି କୁତିୟା ଦେବୀ । ଠିକଣାରେ ଲେଖାଯାଇଛି କାଉଲିଚୌକ ମହଲା, ୱାର୍ଡ ନମ୍ୱର ୧୫, ନଗର ପରିଷଦ ମସାଉରି । ଏଥିରେ ରେଭେନ୍ୟୁ ଅଫିସର ମୁରାରୀ ଚୌହାନଙ୍କ ଦସ୍ତଖତ ରହିଛି । 

ଏହି ରେସିଡେନ୍ସ ସାର୍ଟିଫିକେଟ୍‌ରେ 'ଡଗ୍ ବାବୁ' ନାମକ କୁକୁରକୁ ବିହାରର ବାସିନ୍ଦା ଭାବେ ଦର୍ଶାଯାଇଛି। ଏଥିରେ କୁକୁରର ନାମ, ଠିକଣା ଏବଂ ଅନ୍ୟାନ୍ୟ ତଥ୍ୟ ମଧ୍ୟ ସାମିଲ ରହିଛି । ସାଧାରଣତଃ ମଣିଷ ପାଇଁ ଜାରି ହେଉଥିବା ସାର୍ଟିଫିକେଟ୍‌ ଏମିତି ଦିଆଯାଇଥାଏ। ଏହା ପ୍ରଶାସନିକ ବ୍ୟବସ୍ଥାରେ ଅବହେଳା କିମ୍ବା ତ୍ରୁଟିର ଏକ ଜ୍ୱଳନ୍ତ ଉଦାହରଣ ବୋଲି ବିବେଚନା କରାଯାଉଛି।

ବିରୋଧୀ ଦଳ ବିଶେଷକରି ସ୍ୱରାଜ ଇଣ୍ଡିଆର ନେତା ଯୋଗେନ୍ଦ୍ର ଯାଦବ ଏହି ଘଟଣାକୁ ନେଇ ବିହାର ସରକାରଙ୍କୁ ତୀବ୍ର ସମାଲୋଚନା କରିଛନ୍ତି। ଯାଦବ କହିଛନ୍ତି ଯେ, ଏହି ଘଟଣା ବିହାରର ପ୍ରଶାସନିକ ବ୍ୟବସ୍ଥାରେ ଥିବା ଅବ୍ୟବସ୍ଥା ଏବଂ ଅବହେଳାକୁ ପ୍ରତିଫଳିତ କରୁଛି। ସେ ଏହାକୁ ଏକ ହାସ୍ୟାସ୍ପଦ ଘଟଣା ଭାବେ ବର୍ଣ୍ଣନା କରି କହିଛନ୍ତି ଯେ, ବିହାରରେ ଏଭଳି ଅବସ୍ଥା ଗ୍ରହଣୀୟ ହୋଇପାରେ, କିନ୍ତୁ ଏହା ଆଧାର କାର୍ଡ ଜାରି କରିବାରେ ଗ୍ରହଣୀୟ ନୁହେ। ଅନ୍ୟ ବିରୋଧୀ ନେତାମାନେ ମଧ୍ୟ ଏହାକୁ ନେଇ ସରକାରଙ୍କ ଦାୟିତ୍ୱହୀନତା ଉପରେ ପ୍ରଶ୍ନ ଉଠାଇଛନ୍ତି।

ଏହି ଘଟଣା ସାମ୍ନାକୁ ଆସିବା ପରେ ବିହାର ସରକାର ଏବଂ ପ୍ରଶାସନ ଏହାକୁ ଏକ ଭୁଲ୍‌ ବୋଲି ସ୍ୱୀକାର କରିଛନ୍ତି। ଏହି ଘଟଣାର ତଦନ୍ତ କରାଯାଉଛି । ଏହା କିପରି ଘଟିଲା ସେ ନେଇ ଖୋଳତାଡ ଆରମ୍ଭ ହୋଇଛି ।

ମିଳିଥିବା ସୂଚନା ଅନୁଯାୟୀ, ଏହା ଏକ ଟେକ୍ନିକାଲ୍ ତ୍ରୁଟି କିମ୍ବା କୌଣସି ବ୍ୟକ୍ତିର ନକରାତ୍ମକ କାର୍ଯ୍ୟ ହୋଇପାରେ। ସରକାର ଏହାକୁ ଗୁରୁତର ଭାବେ ନେଇଛନ୍ତି ।

ଏହି ଘଟଣା ସୋସିଆଲ ମିଡିଆରେ ବ୍ୟାପକ ଚର୍ଚ୍ଚାର ବିଷୟ ହୋଇଛି। ଅନେକ ଏହାକୁ ମଜାଦାର ଭାବେ ନେଇଥିବା ବେଳେ, ଅନ୍ୟମାନେ ଏହାକୁ ବିହାର ସରକାରଙ୍କ ଅପାରଗତାର ପ୍ରମାଣ ଭାବେ ଦେଖୁଛନ୍ତି। ରାଜନୈତିକ ଦୃଷ୍ଟିରୁ ବିରୋଧୀ ଦଳମାନେ ଏହାକୁ ସରକାରଙ୍କ ବିରୋଧରେ ଏକ ମୁଖ୍ୟ ଅସ୍ତ୍ର ଭାବେ ବ୍ୟବହାର କରୁଛନ୍ତି। ଏହା ସାଧାରଣ ଜନତାଙ୍କ ମଧ୍ୟରେ ସରକାରୀ ବ୍ୟବସ୍ଥା ପ୍ରତି ଅସନ୍ତୋଷ ସୃଷ୍ଟି କରିପାରେ । ଏହା ଆଗାମୀ ନିର୍ବାଚନରେ ରାଜନୈତିକ ପ୍ରଭାବ ମଧ୍ୟ ପକାଇପାରେ ବୋଲି ସମୀକ୍ଷକମାନେ ମତ ଦେଉଛନ୍ତି । ଗୋଟିଏ ପଶୁକୁ ରେସିଡେନ୍ସ ସାର୍ଟିଫିକେଟ୍ ଦିଆଯିବା ଏକ ଅଦ୍ଭୂତପୂର୍ବ ଘଟଣା । ଏହା ସରକାରୀ ବ୍ୟବସ୍ଥାରେ ଡିଜିଟାଲ ଏବଂ ମାନବକୃତ ତ୍ରୁଟିର ଏକ ଗୁରୁତର ଉଦାହରଣ ଭାବେ ଦେଖାଯାଉଛି । ଏହାକୁ ନେଇ ବିହାର ସରକାର ସାଧାରଣରେ ନିନ୍ଦିତ ହୋଇଛନ୍ତି ।

ଅଧିକ ପଢ଼ନ୍ତୁ: ଖେଳନା ଭାବି ନାଗ ସାପକୁ କାମୁଡି ମାରିଦେଲା ୩ ବର୍ଷର ବାଳକ, ଡାକ୍ତର କହିଲେ ଏହା ଆଶ୍ଚର୍ଯ୍ୟ ଓ ବିରଳ ଘଟଣା