ରାତିରୁ କିଛି ଖାଇନି ରାହୁଲ, ଶେଷ ପର୍ଯ୍ୟାୟରେ ଉଦ୍ଧାର କାର୍ଯ୍ୟ

ଖାଇବା ପିଇବା ଗ୍ରହଣ କରୁନି ବୋରୱେଲରେ ପଡ଼ିଥିବା ଶିଶୁ । ଛତିଶଗଡ଼ରେ ବୋରୱେଲରେ ବାଳକ ଖସିପଡ଼ିବା ଘଟଣା ଉଦ୍ଧାର କାର୍ଯ୍ୟ ଶେଷ ପର୍ଯ୍ୟାୟରେ ବୋଲି କହିଛନ୍ତି ସ୍ଥାନୀୟ ଜିଲ୍ଲାପାଳ । ହେଲେ କାଲି ରାତିରୁ ରାହୁଲ ଖାଦ୍ୟ ଗ୍ରହଣ କରି ନାହିଁ । ତଥାପି ରାହୁଲ ରେସପଣ୍ଡ୍ କରୁଛି, ଆଖି ପତା ହଲାଉଛି । କଠିନ ପଥର ଆସ୍ତରଣ ପାଇଁ ସୁଡ଼ଙ୍ଗରେ ସମସ୍ୟା ହେଉଛି ।

ଶୁକ୍ରବାରରୁ ମଙ୍ଗଳବାର ହୋଇଗଲା ତଥାପି ରାହୁଲ ଉଦ୍ଧା ହୋଇପାରିନି । ୮୦ ଫୁଟର ଗଭୀର ଗାତରୁ କେତେବେଳେ ବାହାରିବ ୧୦ ବର୍ଷର ଛୁଆରାହୁଲ ସାହୁ ? ବାସ୍ତବରେ ବୋରୱେଲ ଗାତ ଭିତରେ କେମିତି ଅବସ୍ଥାରେ ଅଛି ମାନସିକ ଅନଗ୍ରସର ଶିଶୁଟି ? କେତେବେଳେ ସରିବ ଅପରେସନ ରାହୁଲ ?

ଆଜିକୁ ୪ ଦିନ ବିତିଗଲା, ଜାରି ରହିଥିବା ଅପରେସନ୍ ସରିବାର ନାଁ ଧରୁନି । ଇତିମଧ୍ୟରେ ସମାନ୍ତରାଳ ଭାବେ ପ୍ରାୟ ୮୦ ଫୁଟ ତଳକୁ ଗାତ ଖୋଳାସରିଛି । ସୁଡ଼ଙ୍ଗ ଖୋଳା ମଧ୍ୟ ଚାଲିଛି । ରାୟପୁରରୁ ଆସିଥିବା ହେଭି ମେସିନାରୀ ସହ ରକ୍ ବ୍ରେକର ସହାୟତାରେ ଖୋଳାଯାଇଛି ସୁଡ଼ଙ୍ଗ । ଷ୍ଟୋନ ବ୍ରେକର ସହାୟତାରେ ପଥରକୁ ଭେଦି ଚାଲିଛନ୍ତି ଏନଡିଆରଏଫ୍ ଏବଂ ଏସଡିଆରଏଫ୍ ଯବାନ ।

ଗୋଟିଏ ପଟେ ଖନନ, ଅନ୍ୟପଟେ ରାହୁଲର ଜୀବନ । ସବୁଠୁ ବଡ଼ ଚାଲେଞ୍ଜ ହେଉଛି ଗାତ ଭିତରେ ଥିବା ରାହୁଲକୁ ଧୈର୍ଯ୍ୟ ଆଉ ସାହସ ଯୋଗାଇବା । ତେଣୁ ରାହୁଲକୁ ମଝିରେ ମଝିରେ ଡାକ ପକାଉଛନ୍ତି ଉଦ୍ଧାରକାରୀ ଟିମର ସଦସ୍ୟ । ତାକୁ ନିୟମିତ ବ୍ୟବଧାନରେ ତାପାଖକୁ ଖାଦ୍ୟ ପଦାର୍ଥ ଯଥା କଦଳୀ, ସେଓ ସହ ଓଆରଏସ୍ ପଠାଯାଉଛି । କେବଳ ଖାଦ୍ୟ ନୁହେଁ, ପାଇପ୍ ଜରିଆରେ ଅମ୍ଲଯାନ ପଠାଯାଉଛି ।

ଉଦବେଗଜନକ କଥା ହେଉଛି, ବୋରୱେଲ ଗାତ ଭିତରେ ରହିବାର ଏତେ ଦିନ ବିତିଯାଇଥିବାରୁ ରାହୁଲର ବେକରୁ ପାଦ ଯାଏଁ ଶେତା ପଡ଼ିଗଲାଣି ।