ସରକାରୀ ସ୍କୁଲ୍‌ରେ ରାସନ ସାମଗ୍ରୀ ବଣ୍ଟନ

ସରକାରୀ ସ୍କୁଲ୍‌ଗୁଡିକର ଅବସ୍ଥା ଆଜିକାଲି କ’ଣ ତାହା ପ୍ରାୟ ଉଣାଅଧିକେ ସମସ୍ତେ ଜାଣନ୍ତି। କେଉଁ ଶ୍ରେଣୀଗୃହଗୁଡିକ ବିପଦସଂକୁଳ ଅବସ୍ଥାରେ ଥାଏ ତ ଆଉ କେଉଁଠି ଗୋଟିଏ କୋଠରୀରେ ଦୁଇଟି ଶ୍ରେଣୀର ପିଲା ବସୁଥିବା ଦେଖାଯାଏ। କିନ୍ତୁ ଏସବୁକୁ ପାର ହେଇଯିବ ଏହି ଖବରଟି।

ସୂଚନାମୁତାବକ ଏକ ସରକାରୀ ସ୍କୁଲ୍‌ର ଶ୍ରେଣୀଗୃହକୁ କରାଯାଇଛି ଜବରଦଖଲ। ଏଠାରେ ଚାଲିଛି ରାସନ ସାମଗ୍ରୀ ବଣ୍ଟନ। ଏହା ଖୋଲାଖୋଲିଭାବେ ଚାଲୁଥିଲେ ବି କାହାରି ନଜର ପଡୁନି। ଏହି ମାମଲା ମଧ୍ୟପ୍ରଦେଶର ସାଗର ଜିଲ୍ଲାରେ ଥିବା ସହିତ ଜଡିତ। ଏଠାରେ ଥିବା ବଡୌରା ପ୍ରାଥମିକ ବିଦ୍ୟାଳୟରେ ୩ ବର୍ଷ ଧରି ଜଣେ ପ୍ରଭାବଶାଳୀ ରାସନ ବଣ୍ଟନକାରୀ ଗହମ, ଚାଉଳ, ଲୁଣ ଏବଂ ଅନ୍ୟାନ୍ୟ ରାସନ ସାମଗ୍ରୀ ରଖିଛନ୍ତି।

ଏହି ଘଟଣା ସାମ୍ନାକୁ ଆସିବା ପରେ ପ୍ରଶାସନରେ ଉତ୍ତେଜନା ଦେଖାଦେଇଥିଲା। ଯଥାଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ସ୍କୁଲ କୋଠରୀକୁ ରାସନ ବିକ୍ରେତାଙ୍କ ଠାରୁ ମୁକ୍ତ କରାଯାଇଛି। ଅନ୍ୟପକ୍ଷରେ, ଏହି ମାମଲାରେ ରାସନ ଦୋକାନୀ ସମସ୍ତ ଅଭିଯୋଗକୁ ଭିତ୍ତିହୀନ ବୋଲି କହିଥିଲେ। ତାଙ୍କ କହିବା କଥା କରୋନା ସମୟରେ ଖାଦ୍ୟ ଶସ୍ୟ ରଖିବା ପାଇଁ କୌଣସି ଜାଗା ନଥିଲା କିନ୍ତୁ ଗ୍ରାମବାସୀଙ୍କୁ ଏସବୁ ବଣ୍ଟନ କରିବାର ଥିଲା। ତେଣୁ ଗ୍ରାମବାସୀଙ୍କ ଖାଲି ଓ ବିପଦସଙ୍କୁଳ ଅବସ୍ଥାରେ ଥିବା କୋଠରୀରେ ବଣ୍ଟନ ସାମଗ୍ରୀକୁ ରଖାଯାଇଥିଲା।

ମଧ୍ୟପ୍ରଦେଶ ମାନବ ଅଧିକାର ଆୟୋଗ ଏହି ଘଟଣା ବିଷୟରେ ଜାଣିବା ପରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଆସନ୍ତା ତିନି ଦିନ ମଧ୍ୟରେ ଆୟୋଗଙ୍କୁ ରିପୋର୍ଟ ଦାଖଲ କରିବାକୁ କହିଛନ୍ତି। ଏହି ଖବର ସାମ୍ନାକୁ ଆସିବା ପରେ ପ୍ରଶାସନ କାର୍ଯ୍ୟାନୁଷ୍ଠାନ ଗ୍ରହଣ କରି ରାସନ ସାମଗ୍ରୀ ଖାଲି କରି ଅନ୍ୟ ଜାଗାକୁ ସ୍ଥାନାନ୍ତରିତ କରିଛି।

ସୂଚନା ମୁତାବକ ରାହାତଗଡ ବ୍ଲକ ଅନ୍ତର୍ଗତ ବଡୌରା ଗାଁର ପ୍ରାଥମିକ ବିଦ୍ୟାଳୟରେ ୫ଟି କୋଠରୀ ଅଛି। ବିଦ୍ୟାଳୟରେ ୬୯ ଜଣ ଛାତ୍ର ଥିବାବେଳେ ୨ଟି କୋଠରୀରେ କ୍ଲାସ୍ କରାଯାଏ। ଅନ୍ୟ ତିନୋଟି କୋଠରୀ ଖରାପ ବିପଦସଂକୁଳ ଅବସ୍ଥାରେ ରହିଛି।

ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ସବିତା ସାହୁ କୁହନ୍ତି ଯେ ସେ ଏଠାକୁ ମାତ୍ର ଏକ ବର୍ଷ ପୂର୍ବେ ଆସିଛନ୍ତି, କିନ୍ତୁ ୫ ବର୍ଷ ଧରି ୩ଟି କୋଠରୀ ଖାଲିପଡିଛି। କାରଣ ସେଗୁଡିକ ପିଲାମାନଙ୍କ ବସିବା ପାଇଁ ଉପଯୁକ୍ତ ଅବସ୍ଥାରେ ନାହିଁ। ଅନ୍ୟପକ୍ଷରେ ଜିଲ୍ଲା ଖାଦ୍ୟ ଅଧିକାରୀ ପିଏଲ ତନ୍ତୁବାୟ କହିଛନ୍ତି ଯେ ଆପତ୍ତି ପରେ ରାସନ ଦୋକାନକୁ ସ୍କୁଲ ରୁମରୁ ଅନ୍ୟ ସ୍ଥାନକୁ ସ୍ଥାନାନ୍ତର କରାଯାଇଛି।