LIVE TV
ବିଶ୍ୱର ସର୍ବୋଚ୍ଚ ରେଳବ୍ରିଜ୍ ଉପରେ ଗଡିଲା ଟ୍ରେନ୍ । ପରୀକ୍ଷାମୂଳକ ଭାବେ ଚେନାବ ବ୍ରିଜ୍ ଉପରେ ଭାରତୀୟ ରେଲୱେ ପକ୍ଷରୁ ଇନ୍ସପେକ୍ସନ କାର୍ ଛଡାଯାଇଥିଲା । ସଫଳତାର ସହ ଏହା ଜାମ୍ମୁ କାଶ୍ମୀରର ସଙ୍ଗଲଦାନରୁ ରିଆସି ଯାଏଁ ଚଳାଚଳ କରିଥିବା ରେଳମନ୍ତ୍ରୀ ଅଶ୍ବିନୀ ବୈଷ୍ଣବ ସୋସିଆଲ ମିଡିଆରେ ସୂଚନା ଦେଇଛନ୍ତି। ସଙ୍ଗଲଦାନରୁ ରିଆସି ଚଳାଚଳ ମଧ୍ୟରେ ଟ୍ରେନ୍ଟି ସଫଳତାର ସହ ଚେନାବ ବ୍ରିଜ୍ ମଧ୍ୟ ଅତିକ୍ରମ କରିଛି। କେବଳ ଟନେଲ୍-୧ର ଅଳ୍ପ କିଛି କାମକୁ ବାଦ୍ ଦେଲେ ଉଦ୍ଧମପୁର-ଶ୍ରୀନଗର-ବାରମୁଲା ରେଲ୍ ଲିଙ୍କର ବଳକା ନିର୍ମାଣ କାମ ଶେଷ ପର୍ଯ୍ୟାୟରେ ପହଞ୍ଚିଥିବା ରେଳମନ୍ତ୍ରୀ ସୂଚନା ଦେଇଛନ୍ତି।
Also Read
ଚେନାବ ବ୍ରିଜ ପ୍ୟାରିସର ଇଫେଲ ଟାୱାରଠାରୁ ଉଚ୍ଚ ଅଟେ । ଇଫେଲ ଟାୱାରର ଉଚ୍ଚତା ୩୩୦ ମିଟର ହୋଇଥିବାବେଳେ ଏହି ୧.୩ କିଲୋମିଟର ଲମ୍ବା ସେତୁ ଚେନାବ ନଦୀ ଉପରେ ୩୫୯ ମିଟର ଉଚ୍ଚରେ ନିର୍ମିତ ହୋଇଛି । ରେଳ ମନ୍ତ୍ରଣାଳୟର ସୂତ୍ର ଅନୁଯାୟୀ, ସାଙ୍ଗଲଦାନରୁ ରିଆସି ମାର୍ଗରେ ଇଲେକ୍ଟ୍ରିକ୍ ଇଞ୍ଜିନର ସଫଳ ପରୀକ୍ଷଣ ପରେ ଏହି ମାର୍ଗରେ ପ୍ରଥମ ଟ୍ରେନ୍ ଜୁନ୍ ୩୦ରେ ଚାଲିବ।
ଅଧିକ ପଢ଼ନ୍ତୁ: ଯାତ୍ରୀଗଣ ଧ୍ୟାନ ଦିଅନ୍ତୁ...ଆଗାମୀ ଦୁଇ ମାସରେ ଟ୍ରାକ୍ରେ ଦୌଡିବ ବନ୍ଦେ ଭାରତ ସ୍ଲିପର୍
ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ ଉଧମପୁର ଶ୍ରୀନଗର ବାରାମୁଲ୍ଲା ରେଳ ଲିଙ୍କ (USBRL) ପ୍ରକଳ୍ପ ଅଧୀନରେ ଥିବା ସମସ୍ତ ନିର୍ମାଣ କାର୍ଯ୍ୟ ପ୍ରାୟ ଶେଷ ହୋଇସାରିଛି। ଟନେଲ ନମ୍ବର ୧ରେ କିଛି ନିର୍ମାଣ କାର୍ଯ୍ୟ ବାକି ଅଛି । USBRL ପ୍ରକଳ୍ପ ସମାପ୍ତ ହେବା ସହିତ ଭାରତୀୟ ରେଳ କାଶ୍ମୀର ଉପତ୍ୟକାକୁ ଦେଶର ବାକି ରେଳ ନେଟୱାର୍କ ସହିତ ସଂଯୋଗ କରିବା ଦିଗରେ ଆଉ ଏକ ପଦକ୍ଷେପ ହେବ ।
USBRL ପ୍ରକଳ୍ପ ୧୯୯୭ରେ ଆରମ୍ଭ ହୋଇଥିଲା ଏବଂ ଏହା ଅଧୀନରେ ୨୭୨ କିଲୋମିଟର ରେଳ ଲାଇନ ସ୍ଥାପନ କରାଯିବାର ଥିଲା । ଏପର୍ଯ୍ୟନ୍ତ ବିଭିନ୍ନ ପର୍ଯ୍ୟାୟରେ ୨୦୯ କିଲୋମିଟର ରେଳ ଲାଇନ କାର୍ଯ୍ୟ ଶେଷ ହୋଇଛି । ଚଳିତ ବର୍ଷ ଶେଷ ସୁଦ୍ଧା ରିଆସିକୁ କଟ୍ରା ସହିତ ସଂଯୋଗ କରୁଥିବା ଶେଷ ୧୭ କିଲୋମିଟର ଲାଇନ ମଧ୍ୟ ସ୍ଥାପନ କରାଯିବ।
ସ୍ୱାଧୀନତାର ୭୬ ବର୍ଷ ସମାପ୍ତ ହେବା ପରେ ମଧ୍ୟ ତୁଷାରପାତ ସମୟରେ କାଶ୍ମୀର ଉପତ୍ୟକା ଦେଶର ଅନ୍ୟାନ୍ୟ ସ୍ଥାନରୁ ବିଚ୍ଛିନ୍ନ ହୋଇଯାଉଥିଲା । ୨୨ ଫେବୃଆରୀ ୨୦୨୪ ପର୍ଯ୍ୟନ୍ତ କାଶ୍ମୀର ଉପତ୍ୟକାକୁ କେବଳ ଜାତୀୟ ରାଜପଥ-୪୪ ମାଧ୍ୟମରେ ପହଞ୍ଚିପାରୁଥିଲେ। ତେବେ ତୁଷାରପାତ ଯୋଗୁଁ କାଶ୍ମୀର ଉପତ୍ୟକାକୁ ଯାଉଥିବା ଏହି ରାସ୍ତା ମଧ୍ୟ ବନ୍ଦ ହୋଇଯାଉଥିଲା ।
ଏହା ବ୍ୟତୀତ କାଶ୍ମୀର ଯିବାକୁ ଟ୍ରେନ୍ କେବଳ ଜାମ୍ମୁ-ତାୱି ପର୍ଯ୍ୟନ୍ତ ଯାଉଥିଲା। ଯେଉଁଠାରୁ ଲୋକଙ୍କୁ ସଡ଼କ ମାର୍ଗରେ ପ୍ରାୟ ୩୫୦ କିଲୋମିଟର ଯାତ୍ରା କରିବାକୁ ପଡ଼ୁଥିଲା । ଜବାହର ଟନେଲ ଦେଇ ଯାଉଥିବା ଏହି ମାର୍ଗ ଦେଇ ଜାମ୍ମୁ-ତାୱିରୁ ଲୋକମାନଙ୍କୁ କାଶ୍ମୀର ଉପତ୍ୟକାକୁ ଯିବା ପାଇଁ ୮ ରୁ ୧୦ ଘଣ୍ଟା ସମୟ ଲାଗୁଥିଲା ।
ଅଧିକ ପଢ଼ନ୍ତୁ: ଡିପ୍ ଫେକ୍ କଣ୍ଟେଣ୍ଟର ମୁକାବିଲା ପାଇଁ ଡିଜିଟାଲ୍ ଇଣ୍ଡିଆ ବିଲ୍
୨୦୦୩ ରେ ଭାରତ ସରକାର କାଶ୍ମୀର ଉପତ୍ୟକାକୁ ଦେଶର ଅନ୍ୟାନ୍ୟ ଅଂଶ ସହିତ ସବୁ ପାଗ ଭିତ୍ତିରେ ସଂଯୋଗ କରିବା ପାଇଁ ଚେନାବ ବ୍ରିଜ ନିର୍ମାଣ କରିବାକୁ ନିଷ୍ପତ୍ତି ନେଇଥିଲେ। ସେହି ବର୍ଷ ସରକାର ଚେନାବ ବ୍ରିଜ ପ୍ରକଳ୍ପକୁ ମଧ୍ୟ ଅନୁମୋଦନ କରିଥିଲେ। ଏହି ସେତୁ ୨୦୦୯ ସୁଦ୍ଧା ପ୍ରସ୍ତୁତ ହେବାକୁ ଥିଲା । ମାତ୍ର ଏହି ଅବଧି ମଧ୍ୟରେ ଏହା ସରିନଥିଲା ।
ବର୍ତ୍ତମାନ ପ୍ରାୟ ୨ ଦଶନ୍ଧି ପରେ ଚେନାବ ନଦୀ ଉପରେ ନିର୍ମିତ ଏହି ସେତୁ ପ୍ରସ୍ତୁତ ହୋଇଛି । ଏହି ବ୍ରିଜ୍ ୪୦ କିଲୋଗ୍ରାମ ପର୍ଯ୍ୟନ୍ତ ବିସ୍ଫୋରକ ଏବଂ ରିକ୍ଟର ସ୍କେଲରେ ୮ ମ୍ୟାଗ୍ନିଚ୍ୟୁଡ୍ ପର୍ଯ୍ୟନ୍ତ ଭୂକମ୍ପକୁ ସହ୍ୟ କରିପାରିବ । ଏହି ସେତୁ ଆସନ୍ତା ୧୨୦ ବର୍ଷ ପାଇଁ ନିର୍ମାଣ କରାଯାଇଛି ।
