ପୋଲିସ ଷ୍ଟେସନ୍‌ ଉପରକୁ ରକେଟ୍‌ ଲଞ୍ଚରରେ ହମଲା; ଆକ୍ରମଣରେ ଆତଙ୍କବାଦୀ ଲିଙ୍କ୍‌ ସନ୍ଦେହ

ଥାନା ଉପରେ ରକେଂଟ୍ ଲଂଚରରେ ହମଲା । ପଞ୍ଜାବ ତରନତାରନ ଜିଲ୍ଲାର ସରହାଲି ଥାନା ଉପରେ ରକେଟ୍ ଲଂଚର ମାଡ଼ ହୋଇଛି । ଅମୃତସର-ଭାଟିଣ୍ଡା ଜାତୀୟ ରାଜପଥରେ ଥିବା ଥାନା ଉପରେ ମଧ୍ୟରାତ୍ରିରେ ହମଲା ହୋଇଥିଲା । ରାତି ପ୍ରାୟ ଗୋଟାଏ ସମୟରେ ହମଲା କରିଥିଲେ ଦୁର୍ବତ୍ତ । ରକେଟ୍ ଲଂଚରଟି ଥାନାର ଏକ ପିଲାରକୁ ମାଡ଼ କରିବା ପରେ କୋଠରୀ ଭିତରେ ପଡିଥିଲା ।

ଆକ୍ରମଣରେ ଥାନାର କୋଠା ସାମାନ୍ୟ କ୍ଷତିଗ୍ରସ୍ତ ହୋଇଛି । ନିଶା ମାଫିଆ ଏହି ଆକ୍ରମଣ କରିଥିବା ସନ୍ଦେହ କରାଯାଉଛି । ଘଟଣାସ୍ଥଳରେ ଫରେନସିକ୍ ଟିମ୍ ପହଞ୍ଚି ତଦନ୍ତ କରୁଛି । ବିଏସ୍ଏଫ୍ ସହ ପଞ୍ଜାବ ପୋଲିସ ଘଟଣାର ମିଳିତ ଭାବେ ତଦନ୍ତ କରୁଛନ୍ତି । ଏଥିସହ କେନ୍ଦ୍ରୀୟ ତଦନ୍ତକାରୀ ସଂସ୍ଥାର ସହଯୋଗ ଲୋଡ଼ା ଯାଇଛି ।  ଆକ୍ରମଣରେ ଆତଙ୍କବାଦୀ ଲିଙ୍କ୍ ଥିବା ମଧ୍ୟ ସନ୍ଦେହ କରାଯାଉଛି । ଆକ୍ରମଣ ହୋଇଥିବା ସରହାଲି ହେଉଛି ଖଲିସ୍ତାନୀ ଆତଙ୍କବାଦୀ ହରବିନ୍ଦର ସିଂହ ରିନ୍ଦାର ଘର ।

ନିକଟରେ ହରବିନ୍ଦର ସିଂ ରିନ୍ଦାର ପାକିସ୍ତାନରେ ମୃତ୍ୟୁ ଘଟିଛି । ହରବିନ୍ଦରର ଅନେକ ଆତଙ୍କବାଦୀ ହମଲାରେ ହାତ ରହିଛି । ନିଶିଦ୍ଧ ଘୋଷିତ ଖଲିସ୍ତାନୀ ସଂଗଠନ ବାବର ଖାଲସା ଇଣ୍ଟରନାସନାଲର ସଦସ୍ୟ ହେଉଛି ହରବିନ୍ଦର । ଗତ ମେ ମାସରେ ପଞ୍ଜାବ ପୋଲିସ ମୁଖ୍ୟାଳୟ ଉପରକୁ ରକେଟ୍ ହମଲାରେ ମଧ୍ୟ ତାର ସମ୍ପୃକ୍ତି ଥିଲା । ପୋଲିସ ମୁଖ୍ୟାଳୟ ହମଲାର ମାଷ୍ଟରମାଇଣ୍ତକୁ ଗତକାଲି ଉତ୍ତରପ୍ରଦେଶରୁ ଗିରଫ କରାଯାଇଛି ।