ରାହୁଲଙ୍କୁ ପାକିସ୍ତାନର ପ୍ରଶଂସା, ମୋଦି ଦେଲେ କଡ଼ା ଜବାବ

ନିର୍ବାଚନ ଋତୁରେ ଜାରି ରହିଛି ରାଜନୈତିକ ଉଷ୍ମତା । ଏହା ଭିତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ କଂଗ୍ରେସ ରାଜକୁମାର ରାହୁଲ ଗାନ୍ଧିଙ୍କ ମଧ୍ୟରେ କଥା କଟାକଟି ଚରମ ସୀମାରେ ପହଞ୍ଚିଛି । ଏ ସବୁ ମଧ୍ୟରେ ନିଆଁରେ ଘିଅ ଢାଳିବା ସଦୃଶ କାର୍ଯ୍ୟ କରିଛନ୍ତି ପାକିସ୍ତାନର ପୂର୍ବତନ ମନ୍ତ୍ରୀ ଫୱାଦ୍ ହୁସେନ୍ । ନିଜ ସୋସିଆଲ ମିଡିଆରେ ରାହୁଲଙ୍କୁ ନେଇ ସେ ଏକ ପୋଷ୍ଟ କରିଛନ୍ତି । ଏହି ପୋଷ୍ଟକୁ ନେଇ ବିଜେପି ନେତାମାନେ ତୀବ୍ର ସମାଲୋଚନା କରିଛନ୍ତି ।

ଅଧିକ ପଢ଼ନ୍ତୁ: ରାଏବରେଲୀ ଓ ଆମେଥିରୁ କିଏ ? ପ୍ରିୟଙ୍କା କି ରାହୁଲ ଗାନ୍ଧି ?

ବିଜେପିର ଆଇଟି ସେଲ୍ ମୁଖ୍ୟ ଅମିତ ମାଲବ୍ୟ, ତୀବ୍ର ସମାଲୋଚନା କରିଛନ୍ତି । କଂଗ୍ରେସ ପାକିସ୍ତାନ ସହ ହାତ ମିଶାଇଛି ବୋଲି ମଧ୍ୟ ସେ କହିବାକୁ ପଛାଇ ନାହାନ୍ତି । ସୂଚନା ଓ ପ୍ରସାରଣ ମନ୍ତ୍ରୀ ଭାବରେ ଇମ୍ରାନ ଖାନ କ୍ୟାବିନେଟରେ କାର୍ଯ୍ୟ କରିଥିବା ଫୱାଦ୍ ହୁସେନ୍, ରାହୁଲ ଗାନ୍ଧିଙ୍କୁ ସମର୍ଥନ କରୁଛନ୍ତି । କଂଗ୍ରେସ ପାକିସ୍ତାନରେ ନିର୍ବାଚନ ଲଢ଼ିବାକୁ ଯୋଜନା କରୁଛି କି ବୋଲି ସେ ପ୍ରଶ୍ନ କରିଛନ୍ତି ?

କଂଗ୍ରେସକୁ ପାକିସ୍ତାନ ସହଯୋଗ କରୁଥିବା ଅଭିଯୋଗ କରି ବିଜେପି ରାଷ୍ଟ୍ରୀୟ ମୁଖପାତ୍ର ଶେହଜାଦ ପୁନାୱାଲା ମଧ୍ୟ ସମାନ ପ୍ରତିକ୍ରିୟା ପ୍ରକାଶ କରିଛନ୍ତି । ‘କଂଗ୍ରେସ କା ହାତ୍ ପାକିସ୍ତାନ କେ ସାଥ୍’ ବୋଲି ସେ ନିଜ ସୋସିଆଲ ମିଡିଆରେ ପୋଷ୍ଟ କରିଛନ୍ତି । ସୂଚନାଯୋଗ୍ୟ, କିଛିଦିନ ପୂର୍ବରୁ ହାଫିଜ୍ ସଇଦ୍ କହିଥିଲେ ଯେ, କଂଗ୍ରେସ ହେଉଛି ତାଙ୍କର ପ୍ରିୟ ଦଳ ।

ତେବେ ହୁସେନ୍‌ଙ୍କ ଦ୍ୱାରା ସେୟାର କରାଯାଇଥିବା ଭିଡିଓରେ ରାହୁଲ ଗାନ୍ଧି ବିଜେପି ତଥା ପ୍ରଧାନମନ୍ତ୍ରୀ ମୋଦିଙ୍କୁ ଟାର୍ଗେଟ କରି ସମାଲୋଚନା କରୁଥିବା ଶୁଣିବାକୁ ମିଳୁଛି । ଉକ୍ତ କ୍ଲିପ୍‌ରେ ରାମ ମନ୍ଦିର ପ୍ରାଣ ପ୍ରତିଷ୍ଠାକୁ ନେଇ ଦଳିତ ସମ୍ପ୍ରଦାୟର ସ୍ୱାର୍ଥକୁ ଅବହେଳା କରାଯାଇଥିବା ରାହୁଲ ଗାନ୍ଧି କହୁଥିବାର ଶୁଣିବାକୁ ମିଳୁଛି ।

ଅନ୍ୟପଟେ ପାକିସ୍ତାନର ଏପରି କାର୍ଯ୍ୟକୁ ନାପସନ୍ଦ କରିଛନ୍ତି ପ୍ରଧାନମନ୍ତ୍ରୀ । କଂଗ୍ରେସ 'ଶେହଜାଦା' ରାହୁଲ ଗାନ୍ଧିଙ୍କୁ ପ୍ରଧାନମନ୍ତ୍ରୀ କରିବା ପାଇଁ ପାକିସ୍ତାନ ଚେଷ୍ଟା କରୁଛି ବୋଲି ପ୍ରଧାନମନ୍ତ୍ରୀ କହିଛନ୍ତି । ଏହା ସହ କଂଗ୍ରେସ ପାକିସ୍ତାନର ଅନୁଗାମୀ ବୋଲି ପ୍ରଧାନମନ୍ତ୍ରୀ କହିଛନ୍ତି ।

ଗୁଜୁରାଟର ଆନନ୍ଦରେ ଏକ ନିର୍ବାଚନୀ ସମାବେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଛନ୍ତି ଯେ ପାକିସ୍ତାନ ନେତାମାନେ ରାହୁଲଙ୍କୁ ଭାରତର ପ୍ରଧାନମନ୍ତ୍ରୀ ଭାବେ ଦେଖିବାକୁ ଚାହୁଁଛନ୍ତି । କଂଗ୍ରେସ ଦଳକୁ ନିନ୍ଦା କରି ପ୍ରଧାନମନ୍ତ୍ରୀ କହିଛନ୍ତି ଯେ, ଦେଶରେ କଂଗ୍ରେସ ୬୦ ବର୍ଷ ଧରି ଶାସନ କରିଛି ।

ଅଧିକ ପଢ଼ନ୍ତୁ: ଧାରଣା ନଥାଇ ରାହୁଲ ଦେଇଥିବା ବୟାନ ବିଭେଦ ସୃଷ୍ଟିକାରୀ: ଚମ୍ପତ୍ତ ରାୟ

ବିଜେପିର ମାତ୍ର ୧୦ ବର୍ଷର ସେବା ଲୋକେ ଦେଖିଛନ୍ତି । କଂଗ୍ରେସର ୬୦ ବର୍ଷ କାର୍ଯ୍ୟକାଳରେ ୬୦% ଘରେ ମଧ୍ୟ ଶୌଚାଳୟ ସୁବିଧା ନଥିଲା । ଅନ୍ୟପଟେ ବିଜେପି ମାତ୍ର ୧୦ ବର୍ଷ ମଧ୍ୟରେ ଏହା କରି ଦେଖାଇ ପାରିଛି । କଂଗ୍ରେସ ଧର୍ମ ଆଳରେ ସମ୍ବିଧାନକୁ ପରିବର୍ତ୍ତନ କରି ମୁସଲମାନମାନଙ୍କୁ ଅନୁସୂଚିତ ଜାତି, ଜନଜାତି (ଏସଟି) ଏବଂ ପଛୁଆ ବର୍ଗରେ ସାମିଲ କରିବାକୁ ପ୍ରୟାସ କରୁଛି । ଧର୍ମକୁ ନେଇ ଭାରତର ସମ୍ବିଧାନକୁ ଭାଗ କରିପାରିବେ ନାହିଁ ବୋଲି ପ୍ରଧାନମନ୍ତ୍ରୀ କହିଛନ୍ତି ।

ଅନ୍ୟପଟେ ବିଜେପିର ସଫଳତା ବଖାଣିବାକୁ ଯାଇ ପ୍ରଧାନମନ୍ତ୍ରୀ କହିଛନ୍ତି, “ଗତ ୧୦ ବର୍ଷରେ ୧୪ କୋଟି ଘରକୁ ଟ୍ୟାପ୍ ୱାଟର ସଂଯୋଗ ଦିଆଯାଇଛି । କଂଗ୍ରେସ ୬୦ ବର୍ଷରେ ମାତ୍ର ୩ କୋଟି ଘରକୁ ଦେଇଥିଲା । ମୋର କେବଳ ଗୋଟିଏ ସ୍ୱପ୍ନ, ସ୍ୱାଧିନତାର ୧୦୦ ବର୍ଷ ପୂର୍ତ୍ତିରେ 'ବିକଶିତ ଭାରତ' ହେବ । ସେ ପର୍ଯ୍ୟନ୍ତ ମୁଁ ୨୪ ଘଣ୍ଟା କାର୍ଯ୍ୟ କରିବି ।