ବିବେକାନନ୍ଦ ରକ୍‌କୁ ଆସି ମୋତେ ଅଦ୍ଭୁତ-ଅଲୌକିକ ଉର୍ଜାର ଅନୁଭବ ହେଲା: ପ୍ରଧାନମନ୍ତ୍ରୀ ମୋଦି

କନ୍ୟାକୁମାରୀ ବିବେକାନନ୍ଦ ରକ୍ ରେ ଧ୍ୟାନ ସଂପୂର୍ଣ୍ଣ ହେବା ପରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କର ଏକ ଲିଖିତ ବାର୍ତ୍ତାକୁ ସୋସିଆଲ ମିଡିଆରେ ସେୟାର କରିଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ । ସେଥିରେ ମୋଦି ଲେଖିଛନ୍ତି ଯେ, ବିବେକାନନ୍ଦ ରକ୍ କୁ ଆସି ମୋତେ ଅଦ୍ଭୁତ ଓ ଅଲୌକିକ ଉର୍ଜାର ଅନୁଭବ ହେଲା ।

ଏହି ଶିଳା ଉପରେ ମାଆ ପାର୍ବତୀ ଏବଂ ସ୍ୱାମୀ ବିବେକାନନ୍ଦ ତପସ୍ୟା କରିଥିଲେ । ପରବର୍ତ୍ତୀ ସମୟରେ ଏକନାଥ ରାନାଡ଼େ ଏହି ସ୍ମାରକ ଭାବେ ବିବେକାନନ୍ଦଙ୍କ ଚିନ୍ତାଧାରାକୁ ଜୀବନ୍ତ କରିଥିଲେ । ଆଧ୍ୟାତ୍ମିକ ନବଜାଗରଣର ପ୍ରଣେତା ବିବେକାନନ୍ଦ ମୋ ଆଦର୍ଶ, ମୋ ଉର୍ଜା ଓ ମୋ ସାଧନାର ସ୍ରୋତ ରହିଆସିଛନ୍ତି ।

ବହୁ ବର୍ଷ ପୂର୍ବରୁ ସାରାଦେଶ ଭ୍ରମଣ ପରେ ସେ ଯେତେବେଳେ ଏଠାରେ ଧ୍ୟାନ କରିଥିଲେ, ଭାରତର ପୁନରୁତ୍ଥାନ ପାଇଁ ତାଙ୍କୁ ନୂଆ ଦିଶା ମିଳିଥିଲା । ଏହା ମୋର ସୌଭାଗ୍ୟ ଯେ, ବହୁ ବର୍ଷ ପରେ ଯେତେବେଳେ ସ୍ୱାମୀ ବିବେକାନନ୍ଦଙ୍କ ମୂଲ୍ୟବୋଧ ଓ ଆଦର୍ଶ ଅନୁସାରେ ତାଙ୍କର ସ୍ୱପ୍ନର ଭାରତ ରୂପ ନେଉଛି, ସେତେବେଳେ ମୋତେ ଏହି ପବିତ୍ର ସ୍ଥଳରେ ସାଧନାର ସୁଯୋଗ ମିଳିଲା ।

ମାଆ ଭାରତୀଙ୍କ ଚରଣରେ ବସି ମୁଁ ପୁଣି ଏହି ସଂକଳ୍ପକୁ ଦୋହରାଉଛି ଯେ, ମୋ ଜୀବନର ପ୍ରତିଟି ମୁହୂର୍ତ୍ତ ଓ ମୋ ଶରୀରର ପ୍ରତିଟି କଣିକା ସର୍ବଦା ଦେଶର ସେବାରେ ସମର୍ପିତ ରହିବ । ଅନ୍ତିମ ପର୍ଯ୍ୟାୟ ନିର୍ବାଚନ ପ୍ରଚାର ସରିବା ପରେ, ଗତ ୩୦ ତାରିଖ ସନ୍ଧ୍ୟାରୁ ବିବେକାନନ୍ଦ ରକ୍ ର ଧ୍ୟାନ ମଣ୍ଡପମ୍ ରେ ୪୫ ଘଣ୍ଟା ପାଇଁ ମୌନବ୍ରତ ପାଳନ ସହ ଧ୍ୟାନରେ ବସିଥିଲେ ମୋଦି ।

ଏହି ସମୟରେ ସେ କେବଳ ପଇଡ଼ ପାଣି ଓ ଅଙ୍ଗୁର ରସ ଗ୍ରହଣ କରିଥିଲେ । ଗତକାଲି ଏହା ସଂପୂର୍ଣ୍ଣ ହେବା ପରେ, ସେ ୧୩୩ ଫୁଟ୍ ଉଚ୍ଚ ଥିରୁବଲ୍ଲଭର ମୂର୍ତ୍ତି ପରିଦର୍ଶନ ସହ ପୁଷ୍ପାଞ୍ଜଳି ଅର୍ପଣ କରିଥିଲେ । ସୂଚନା ଅନୁସାରେ, ଚଳିତ ନିର୍ବାଚନରେ ୭୫ ଦିନରେ ରାଲି ଓ ରୋଡ ସୋ'କୁ ମିଶାଇ ପ୍ରାୟ ୨୦୬ଟି ପ୍ରଚାର କାର୍ଯ୍ୟକ୍ରମରେ ଯୋଗ ଦେଇଥିଲେ ପ୍ରଧାନମନ୍ତ୍ରୀ ମୋଦି । ଏଥିସହ ଓଟିଭି ସମେତ ବିଭିନ୍ନ ଗଣମାଧ୍ୟମକୁ ୮୦ଟି ସାକ୍ଷାତକାର ଦେଇଥିଲେ ।