LIVE TV
ସଲମାନ ଖାନଙ୍କ ସହ ବନ୍ଧୁତା ପାଇଁ ଗଲା କି ବାବା ସିଦ୍ଦିକିଙ୍କ ଜୀବନ? କାରଣ, ସିଦ୍ଦିକିଙ୍କ ହତ୍ୟା ପାଇଁ ନିଜକୁ ଦାୟୀ କରିଛି ଲରେନ୍ସ ବିଷ୍ଣୋଇ ଗ୍ୟାଙ୍ଗ । ଏଥିସହ ସଲମାନଙ୍କୁ ପୁଣି ଦେଇଛି ଧମକ । ଏହାପରେ ବଢିଛି ସଲମାନଙ୍କ ସୁରକ୍ଷା । ସେପଟେ ଆଉ କିଛି ସମୟ ପରେ ମୁମ୍ବାଇ ବଡ଼ କବରିସ୍ତାନରେ ହେବ ସିଦ୍ଦିକିଙ୍କ ଅନ୍ତିମ ସଂସ୍କାର । ଘଟଣାରେ ପୋଲିସ ୨ ଅଭିଯୁକ୍ତଙ୍କୁ ଗିରଫ କରିଥିବା ବେଳେ ଆଉ ଦୁଇ ଜଣ ଫେରାର ଅଛନ୍ତି ।
ବାବା ସିଦ୍ଦିକିଙ୍କ ହତ୍ୟା ପଛରେ ଲରେନ୍ସ ବିଷ୍ଣୋଇ ଗ୍ୟାଙ୍ଗ୍.. ହତ୍ୟା ପାଇଁ ନିଜକୁ ଦାୟୀ କରି ସଲମାନ ଖାନଙ୍କୁ ବି ଧମକ । 'ଯିଏ ବି ସଲମାନଙ୍କୁ ସହଯୋଗ କରିବ, ନିଜ ହିସାବ କିତାବ କରିକି ରଖିଥିବ' । ବରିଷ୍ଠ ଏନସିପି ନେତା, ତିନି ଥରର ବିଧାୟକ ତଥା ମହାରାଷ୍ଟ୍ରର ପୂର୍ବତନ ମନ୍ତ୍ରୀ ବାବା ସିଦ୍ଦିକିଙ୍କ ମର୍ଡର ପାଇଁ ନିଜକୁ ଦାୟୀ କରିଛି କୁଖ୍ୟାତ ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ ।
ହତ୍ୟାକାଣ୍ଡର ୧୪ ଘଣ୍ଟା ପରେ ସୋସିଆଲ ମିଡିଆରେ ଗ୍ୟାଙ୍ଗ ପକ୍ଷରୁ ଏକ ପୋଷ୍ଟ କରାଯାଇଛି । ଶୁବୁ ଲୋଙ୍କର ନାଁରେ ଫେସବୁକ୍ ଆକାଉଣ୍ଟରୁ ସେୟାର ହୋଇଥିବା ଏହି ପୋଷ୍ଟରେ ଲେଖାଯାଇଛି ଯେ, ବାବା ସିଦ୍ଦିକିଙ୍କ ଚାପ୍ଟର ସରିଲା । ଦାଉଦ୍ ଇବ୍ରାହିମ୍ ସହ ତାଙ୍କର ସଂପୃକ୍ତି ରହିଥିଲା । ସଲମାନ ଖାନଙ୍କ ସହ ଆମେ କୌଣସି ଯୁଦ୍ଧ ଚାହୁଁନଥିଲୁ କିନ୍ତୁ ଆମ ଭାଇଙ୍କ ସେ ବହୁତ କ୍ଷତି ଘଟାଇଛି ।
Also Read
ଯିଏ ବି ସଲମାନ ଖାନ୍ କିମ୍ବା ଦାଉଦ ଗ୍ୟାଙ୍ଗକୁ ସହଯୋଗ କରିବ, ସିଏ ତାର ହିସାବ କରିକି ରଖିଥିବ । ସୋସିଆଲ ମିଡିଆରେ ଭାଇରାଲ ହେଉଥିବା ଏହି ପୋଷ୍ଟର ଅଧିକ ତନାଘନା ଚଳାଇଛି ମୁମ୍ବାଇ ପୋଲିସ । ପୋଷ୍ଟମର୍ଟମ ପରେ ସିଦ୍ଦିକିଙ୍କ ପାର୍ଥିବ ଶରୀରର ଶେଷ ଦର୍ଶନ ସହ ଶ୍ରଦ୍ଧାଂଜଳି ଜଣାଇବାକୁ ଛୁଟିଥିଲା ଭିଡ଼ ।
ବାସଭବନରେ ଏକାଠି ହୋଇଥିଲେ ସଲମାନଙ୍କ ପୁରା ପରିବାର ସହ ଅନେକ ବଲିଉଡ୍ ସେଲିବ୍ରିଟି ଓ ବିଶିଷ୍ଟ ବ୍ୟକ୍ତି । ସେପଟେ ସଲମାନ ଖାନଙ୍କ ଘର ଆଗରେ ବଢ଼ିଛି ସୁରକ୍ଷା । ଗାଲାକ୍ସି ଆପାର୍ଟମେଣ୍ଟକୁ ଘେରି ରହିଛନ୍ତି ପୋଲିସ । ଚର୍ଚ୍ଚା ହେଉଛି, ସଲମାନ୍ ଖାନଙ୍କ ପାଇଁ ବାବା ସିଦ୍ଦିକିଙ୍କୁ ହତ୍ୟା କରାଯାଇଛି ।
କାରଣ ସଲମାନଙ୍କ ଅତି ନିକଟତର ଏବଂ ପାରିବାରିକ ବନ୍ଧୁ ଭାବେ ଜଣାଶୁଣା ଥିଲେ ବାବା ସିଦ୍ଦିକି । ଏମିତିକି ସଲମାନ୍ ଆଉ ଶାହରୁଖଙ୍କ ମଧ୍ୟରେ ମତାନ୍ତର ଦୂର କରିବାରେ ସିଦ୍ଦିକିଙ୍କ ଥିଲା ସବୁଠୁ ବଡ଼ ଭୂମିକା । ଏବର୍ଷ ଜୁଲାଇରେ ସଲମାନଙ୍କ ଘର ଉପରେ ଗୁଳି ମାଡ଼ ହେଇଥିଲା । ତାର କିଛି ଦିନ ପୂର୍ବରୁ ବି ସଲମାନଙ୍କୁ ମିଳିଥିଲା ହତ୍ୟା ଧମକ ।
ତେଣୁ ସଲମାନ୍ ଖାନଙ୍କ ନିକଟତର ବାବା ସିଦ୍ଦିକିଙ୍କୁ ହତ୍ୟା କରି ତାଙ୍କୁ ସିଧାସଳଖ ଧମକ ଦିଆଯାଇଥିବା ସନ୍ଦେହ କରାଯାଉଛି । ଶନିବାର ରାତି ପ୍ରାୟ ୯ଟା ୩୦ । ମୁମ୍ବାଇର ବାନ୍ଦ୍ରା । ପୁଅ ଜିଶାନ ସିଦ୍ଦିକିଙ୍କ ଅଫିସ ବାହାରେ ବାଣ ଫୁଟାଉଥିଲେ ବାବା ସିଦ୍ଦିକି । ହଠାତ୍ ତିନି ଜଣ ମୁଖାପିନ୍ଧା ଯୁବକ ବାଇକରେ ଆସି ଅନ୍ଧାଧୁନ ଗୁଳି ଚଳାଇଥିଲେ ।
ସିଦ୍ଦିକିଙ୍କ ଦେହରେ ବାଜିଥିଲା ତିନିଟି ଗୁଳି । ଘଟଣାସ୍ଥଳରେ ହିଁ ସେ ଟଳି ପଡିଥିଲେ । ତାଙ୍କୁ ତୁରନ୍ତ ଲୀଲାବତୀ ହସପିଟାଲ ନିଆଯାଇଥିଲେ ବି ଡାକ୍ତର ମୃତ ଘୋଷଣା କରିଥିଲେ । ଖବର ପାଇ ନିଜର ସମସ୍ତ ସୁଟିଂ ବାତିଲ କରି ସିଦ୍ଦିକିଙ୍କୁ ଦେଖିବାକୁ ହସପିଟାଲରେ ପହଁଚିଥିଲେ ସଲମାନ୍ । ପରେ ଆରମ୍ଭ ହୋଇଯାଇଥିଲା ତନାଘନା, ତଦନ୍ତ ।
ଘଟଣାରେ ପୋଲିସ ୨ଜଣଙ୍କୁ ଗିରଫ କରିଥିଲା । ସେମାନେ ହେଲେ ହରିୟାଣାର ୨୩ ବର୍ଷୀୟ ଗୁରମେଲ୍ ସିଂ ଓ ଉତ୍ତରପ୍ରଦେଶର ୧୯ ବର୍ଷୀୟ ଧର୍ମରାଜ କଶ୍ୟପ । ମାରାଥନ୍ ଜେରା ବେଳେ ମୁମ୍ବାଇ କ୍ରାଇମବ୍ରାଞ୍ଚଙ୍କୁ ମିଳିଥିଲା ଚାଞ୍ଚଲ୍ୟକର ତଥ୍ୟ । ଏହା ଥିଲା ପ୍ରି-ପ୍ଲାନଡ ମର୍ଡର । ସିଦ୍ଦିକିଙ୍କୁ ହତ୍ୟା ପାଇଁ ଅଭିଯୁକ୍ତଙ୍କୁ ବହୁ ପୂର୍ବରୁ ମିଳିଥିଲା ସୁପାରୀ । ଏଥିପାଇଁ ମାସେ ଧରି ରେକି କରିଥିଲେ ହତ୍ୟାକାରୀ ।
ଦେଢ଼ରୁ ଦୁଇ ମାସ ହେବ ସେମାନେ ମୁମ୍ବାଇର କୁର୍ଲା ଅଂଚଳରେ ଘର ଭଡା ନେଇ ରହିଥିଲେ । ସିଦ୍ଦିକି କେତେବେଳେ କୁଆଡେ ଯାଉଛନ୍ତି, ତାଉପରେ ତୀକ୍ଷଣ ନଜର ରଖିଥିଲେ ହତ୍ୟାକାରୀ । କିଛି ଦିନ ତଳେ ସେମାନଙ୍କ ପାଖରେ ପହଞ୍ଚିଥିଲା ବନ୍ଧୁକ ଓ ଗୁଳି । ଘଟଣାର ୧୫ ଦିନ ପୂର୍ବରୁ ବାବା ସିଦ୍ଦିକିଙ୍କୁ ମିଳିଥିଲା ହତ୍ୟା ଧମକ । ତେଣୁ ତାଙ୍କୁ Y କ୍ୟାଟେଗୋରୀ ସୁରକ୍ଷା ଯୋଗାଇ ଦିଆଯାଇଥିଲା ।
ଗିରଫ ଜଣେ ଅଭିଯୁକ୍ତଙ୍କୁ ଜେରା ପାଇଁ ଅକ୍ଟୋବର ୨୧ ଯାଏଁ ରିମାଣ୍ଡରେ ଆଣିବ ମୁମ୍ବାଇ ପୋଲିସ । ଅଭିଯୁକ୍ତଙ୍କଠାରୁ ୨୮ ଟି ଜୀବନ୍ତ କ୍ୟାଟ୍ରିଜ୍ ଉଦ୍ଧାର ହୋଇଛି । ତେଣୁ ଅନ୍ତର୍ଜାତୀୟ ଗ୍ୟାଙ୍ଗ ଆଡକୁ ସନ୍ଦେହ ବଢିଛି ମୁମ୍ବାଇ କ୍ରାଇମବ୍ରାଞ୍ଚର । ସେପଟେ ତୃତୀୟ ଅଭିଯୁକ୍ତ ଶିବ କୁମାର ଏଯାଏଁ ଫେରାର ରହିଛି । ଅଭିଯୁକ୍ତଙ୍କୁ ସହଯୋଗ କରିଥିବା ଚତୁର୍ଥ ଅଭିଯୁକ୍ତ ମହମ୍ମଦ ଜିସାନ ଅଖତରଙ୍କୁ ବି ଚିହ୍ନଟ କରିସାରିଛି ପୋଲିସ । ଏହାରି ଭିତରେ ସିଦ୍ଦିକିଙ୍କ ହତ୍ୟା ତଦନ୍ତ ପାଇଁ ସ୍ୱତନ୍ତ୍ର ଟିମ୍ ପଠାଇବ ଦିଲ୍ଲୀ ପୋଲିସ ।
