ମୋଦିଙ୍କୁ ଅହଙ୍କାରୀ କହିଲେ ମେଘାଳୟ ରାଜ୍ୟପାଳ

‘ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅହଙ୍କାରରେ ପରିପୂର୍ଣ୍ଣ ’। ମେଘାଳୟର ରାଜ୍ୟପାଳ ସତ୍ୟପାଲ ମଲିକ କୃଷି ଆଇନକୁ ନେଇ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିବା ସହ ତାଙ୍କ କାର୍ଯ୍ୟ ଉପରେ ପ୍ରଶ୍ନ ଉଠାଇଛନ୍ତି । ଚାଷୀଙ୍କ ପ୍ରସଙ୍ଗ ଉପରେ ଆଲୋଚନା କରିବାକୁ ମୋଦିଙ୍କୁ କିଛି ଦିନ ତଳେ ଭେଟିଥିଲେ ମେଘାଳୟ ରାଜ୍ୟପାଳ ସତ୍ୟପାଲ ମଲିକ । ହେଲେ ସାକ୍ଷାତ ସମୟରେ ପ୍ରଧାନମନ୍ତ୍ରୀ ଠାରେ ଗର୍ବ ଭାବ ଜଳ ଜଳ ଦେଖାଯାଉଥିଲା । ଏପରିକି ମୋଦିଙ୍କ ଆଚରଣ ଏତେ ଖରାପ ଥିଲା ଯେ ପାଞ୍ଚ ମିନିଟ ମଧ୍ୟରେ ଝଗଡ଼ା ହୋଇଗଲା । ଆଉ ସେ ବାଧ୍ୟ ହୋଇ ସେଠାରୁ ଚାଲିଗଲେ ବୋଲି କହିଛନ୍ତି ।

ରବିବାର ଦିନ ହରିୟାଣାର ଦାଦ୍ରିରେ ଏକ କାର୍ଯ୍ୟକ୍ରମରେ ଯୋଗ ଦେବାକୁ ପହଞ୍ଚିଥିଲେ ସତ୍ୟପାଲ ମଲିକ । ଏହି କାର୍ଯ୍ୟକ୍ରମରେ ଲୋକଙ୍କ ସହ ଅନେକ ସମୟ ଧରି ଆଲୋଚନା କରିଥିଲେ । ଆଉ ସେହି ସମୟରେ ସେ ମୋଦିଙ୍କ ସମ୍ପର୍କରେ ଏହି ଟିପ୍ପଣୀ ଦେଇଛନ୍ତି । କୃଷି ଆଇନ ପ୍ରତ୍ୟାହାର ପାଇଁ କୃଷକଙ୍କ ଆନ୍ଦୋଳନ ସମୟରେ ପ୍ରଧାନମନ୍ତ୍ରୀଙ୍କୁ ଭେଟିଥିଲେ ମେଘାଳୟ ରାଜ୍ୟପାଳ । ହେଲେ ଆଲୋଚନା କରି ସମସ୍ୟାର ସମାଧାନ କ’ଣ ବାହାର କରିବେ, ମାତ୍ର ପାଞ୍ଚ ମିନିଟ୍‌ରେ ତାଙ୍କ ସହ ଝଗଡ଼ା ହୋଇଗଲା । ତାଙ୍କ ଠାରେ ଅହଙ୍କାର ଭରି ରହିଥିଲା । ଆନ୍ଦୋଳନରେ ୫୦୦ ଲୋକ ମରିଯାଇଛନ୍ତି ବୋଲି ସେ ମୋଦିଙ୍କୁ କହିଥିଲେ ।

घमंड...क्रूरता...संवेदनहीनता

भाजपा के राज्यपाल के इस बयान में पीएम मोदी के व्यक्तित्व में शामिल इन्हीं 'गुणों' का बखान है।

मगर, ये एक लोकतंत्र के लिए चिंता की बात है। pic.twitter.com/HGxzKfYsme

— Congress (@INCIndia) January 3, 2022

ହେଲେ ମୋଦି ଏଥିରେ ରାଗିଯାଇ ଥିଲେ ଆଉ କହିଥିଲେ, ସେମାନେ କ’ଣ ମୋ ପାଇଁ ମରିଛନ୍ତି କି ? ଆଉ ଏହାର ଉତ୍ତରରେ ସତ୍ୟପାଲ ମଲିକ୍ ହଁ କରିଥିଲେ । ସାରା ଦେଶର ଭାର ତାଙ୍କ ହାତରେ । ସେ ହିଁ ବର୍ତ୍ତମାନ ପାଇଁ ଦେଶର ରାଜା । ଏହିପରି ଭାବେ ଉଭୟଙ୍କ ମଧ୍ୟରେ କଟାକଟି ହେବାପରେ ମାତ୍ର ୫ ମିନିଟ୍‌ରେ ସେମାନଙ୍କ ଆଲୋଚନା ଶେଷ ହୋଇଯାଇଥିଲା ।

୫ ମିନିଟ୍‌ର ଆଲୋଚନା ପରେ ଗୃହମନ୍ତ୍ରୀ ଅମିତ ଶାହାଙ୍କୁ ଭେଟିବାକୁ କହିଥିଲେ ପ୍ରଧାନମନ୍ତ୍ରୀ । ଆଉ ତା’ପରେ ସତ୍ୟପାଲ ମଲିକ୍ ଅମିତ ଶାହାଙ୍କୁ ଭେଟିଥିଲେ । ତେବେ ଆନ୍ଦୋଳନ ସମୟରେ ମୃତ୍ୟୁବରଣ କରିଥିବା ଚାଷୀଙ୍କ ଉପରେ ପ୍ରଧାନମନ୍ତ୍ରୀଙ୍କ ନୀରବତା ଉପରେ ପୂର୍ବରୁ ଅନେକ ଥର ସେ ପ୍ରଶ୍ନ କରିଛନ୍ତି । କୃଷକଙ୍କ ଆନ୍ଦୋଳନ ସମୟରେ କେନ୍ଦ୍ର ସରକାରଙ୍କୁ ଅନେକ ଥର ଟାର୍ଗେଟ କରିଥିବା ମଲିକ କହିଛନ୍ତି, କୃଷି ଆଇନ ପ୍ରତ୍ୟାହାର ଚାଷୀଙ୍କ ପାଇଁ ଏକ ଐତିହାସିକ ବିଜୟ । ଦେଶର ମେରୁଦଣ୍ଡଙ୍କ ଆନ୍ଦୋଳନ ସରକାରଙ୍କୁ ନଇଁବା ପାଇଁ ବାଧ୍ୟ କଲା ।

ରାଜ୍ୟପାଳ ସତ୍ୟପାଲ ମଲିକଙ୍କ ଏହି ବୟାନ୍‌ ପରେ କଂଗ୍ରେସ ମୋଦି ସରକାରଙ୍କୁ ଟାର୍ଗେଟ କରିଛି । ମଲିକଙ୍କ ଏହି ଭିଡିଓକୁ ଟ୍ୱିଟରରେ ସେୟାର କରି କଂଗ୍ରେସ ଲେଖିଛି - ଗର୍ବ, ନିଷ୍ଠୁରତା ଏବଂ ସମ୍ବେଦନଶୀଳତା । ବିଜେପି ରାଜ୍ୟପାଳଙ୍କ ଏହି ବିବୃତ୍ତିରେ ମୋଦିଙ୍କ 'ଗୁଣଗୁଡିକ' ଉଲ୍ଲେଖ କରାଯାଇଛି । ଗଣତନ୍ତ୍ର ପାଇଁ ଏହା ଚିନ୍ତାର ବିଷୟ ।

ସୂଚନାଯୋଗ୍ୟ କୃଷି ଆଇନ୍‌ ସମ୍ପର୍କରେ ଚାଷୀଙ୍କ ଦୀର୍ଘ ଦିନର ସଂଘର୍ଷ ପରେ କେନ୍ଦ୍ର ସରକାର ଏହାକୁ ପ୍ରତ୍ୟାହାର କରିଛନ୍ତି । କୃଷି ଆଇନ୍‌ ପ୍ରତ୍ୟାହାର ସମ୍ପର୍କରେ ସତ୍ୟପାଲ ମଲିକ କାର୍ଯ୍ୟକ୍ରମରେ କହିଛନ୍ତି , ଆଉ କିଛି ପ୍ରସଙ୍ଗ ବାକି ଅଛି । ଏବେ ବି କୃଷକଙ୍କ ବିରୋଧରେ ମାମଲା ପଞ୍ଜିକୃତ ହୋଇଛି । ସଚ୍ଚୋଟତା ସହିତ ସମସ୍ତ ମାମଲାକୁ ପ୍ରତ୍ୟାହାର କରାଯିବା ଉଚିତ୍ । ଏହାସହ ଆଇନଗତ MSP ପାଇଁ ଗ୍ୟାରେଣ୍ଟି ଦିଆଯିବା ଉଚିତ୍ ।